Kota Bungbi ti Circonscription: Fini Programme Ni
E hinga so Jéhovah Nzapa alingbi na ndoye ti e nga na vorongo so e mu gi na lo oko. Ye oko, sese agi ti kanga lege na e ti duti na akpengba songo na lo. (Jean 17:14) Ti kono ndoye so e yeke na ni teti Jéhovah na ti kpengba lekengo na bê ti e ti ke aye so, na yâ ti sese, alingbi ti buba dutingo ti e na lege ti yingo, fade kota li ti tene ti programme ti kota bungbi ti circonscription ti ngu ti kusala ti 2001 ayeke “I Ndoye Nzapa, Pepe Aye ti Sese So.”—1 Jean 2:15-17.
Kota ndoye ti e teti Jéhovah apusu e ti sala tene ti témoin ti lo. Ye oko, teti mingi ti awakua ti Nzapa, fango tene ayeke kete ye pepe. Na mango diskur “Ndoye Teti Nzapa Apusu E ti Fa Tene,” i manda tongana nyen ambeni zo ahon ndo ti kamela ti ala nga na ambeni kangango lege ti mu mbage ti ala kue na kusala so.
Na lege wa futingo ti akpengba-ndia ti salango ye ti sese so asala ye na ndo ti e? Laso a ba asalango ye so giriri azo ake ni tongana mbeni ye so ayeke na lege ni. Fade diskur so li ti tene ni ayeke “Azo so Andoye Jéhovah Ake Ye so Ayeke Sioni” nga na mbeni diskur so ambage ni ayeke mingi, “Aye so Ayeke na Yâ ti Sese so: E Ba ni Tongana Nyen?” ayeke kpengba lekengo na bê ti e ti ke anzala ti sioni.
Fade a yeke sala tapande ti abungbi use: Ekole ti Kusala ti Théocratie na Bungbi ti Kusala, nga na ndulu tene ti Tour ti Ba Ndo ti yenga ni. Fade kota diskur “E Hon Sese na Ngangu na Lege ti Ndoye nga na Mabe” ayeke tisa e ti manda tapande ti Jésus na lutingo na gbele ngangu ti sese so. (Jean 16:33) E glisa pepe ti tisa azo so e yeke manda Bible na ala. A lingbi zo kue so aye ti mu batême asala tene ni hio na surveillant-président si lo lingbi ti sala aye so ahunda.
Fade kota bungbi ti circonscription so ayeke mu lege na e ti bata lê ti e na ndo ti aye so a lingbi e yekia ni ti wara adeba nzoni mingi ti Jéhovah. Zia e ga na tongo nda ni juska na hunzingo ti bungbi ni!