Zia na gbele mo aye ti yingo
1 So tâ yekiango ndo si a yeke duti ande ti sepela Jéhovah teti lakue lakue! Ti mû maboko na e ti sala ni, e lingbi ti zia fade fade na gbele e aye ti yingo mingi, na ti sala ngangu kue ti wara ni. Salango tongaso ayeke mû lege na e ti sala kusala na ngangu ti e na lege ti ndara (1 aCor. 9:26). Aye wa, so mo lingbi ti wara, mo zia na gbele mo?
2 Mandango Bible: Mo yeke leke tele teti abungbi kue ti kongregation? Tongana mo yeke sala ni, mo yeke mû ngoi ti gi na ti gbu li na ndo ye so mo yeke manda? Na tapande, tongana mo yeke leke tele teti Mandango Tour ti Ba Ndo nga na Mandango Buku ti Kongregation, mo yeke sû gi kamba na gbe ti akiringo tënë ni, wala mo yeke gi nga aversê so a fa tënë ti yâ ni pëpe na mo yeke gbu li na ndo nda ti atënë so a fa na ndo ni? Mo lingbi ti zia na gbele mo, yenga oko oko, ti gi nda ti ambeni kete tënë nde na ndo dikongo Bible so ayeke na yâ ti programme ti Ekole ti Kusala ti aChrétien? A hunda ngoi nga na ngangu ti hasa nda ti atënë ti yingo tongaso. Ye oko, a yeke ga na gba ti adeba nzoni na lege ti yingo.—aProv. 2:4, 5.
3 Abungbi ti kongregation: Mbeni ye ti zia na gbele mo ti wara ayeke ti gue lakue na abungbi kue ti kongregation. Singo hio ti bungbi na aita na ti mû mbage na hengo bia nga na sambela ti tongo nda ni ayeke mû maboko ti tene dutingo ti kongregation na lege ti bibe akpengba. A lingbi nga e sala ngangu ti kiri na tënë na ngoi ti abungbi kue, na ti tara ti sala si akiringo tënë ti e aga nzoni ahon ti kozo. Peut-être mo lingbi ti fa tongana nyen mbeni versê ti paragraphe ni andu lisoro ni, wala tongana nyen tënë ni andu fini ti e ti lâ oko oko.—aHéb. 10:24, 25.
4 Kusala ti fango tënë: Kusala ti e ti fango tënë ayeke ga nzoni mingi ahon tongana e zia ambeni ye na gbele e ti wara. Mo yeke na mbeni wungo ti angbonga so mo leke ti fa na tënë nze oko oko? Ambeni ita abâ so a yeke ye ti mungo maboko. Wala mo lingbi ti leke mbeni mbage ti kusala ti fango tënë ti mo si a kiri aga nzoni, tongana salango kusala na Bible ti fa tënë da na da, salango afini vizite mbilimbili, salango ngangu ti komanse mbeni mandango Bible, wala ti fa ye nzoni ahon so alë lengo?
5 Babâ na mama, i yeke wa amolenge ti i ti zia na gbele ala aye ti sala na yâ kusala ti Jéhovah? I mû maboko na ala ti bâ so salango kusala tongana pionnier, wala ti duti mbeni oko ti sewa ti Béthel ayeke mbeni pendere lege ti fa kota bê ti kiri singila ti ala na Jéhovah.—Zo-ti. 12:3.
6 Tongana e yeke gi nda ti akusala ti e, a yeke nzoni e zia na gbele e aye ti yingo, na pekoni, ti sala ngangu kue ti wara ni. Fade e yeke wara kota ngia mingi ahon na yâ kusala ti e, na e yeke duti lingu ti kpengba ambeni zo.—aRom. 1:12.