Amokonzi ti sewa: i ngbâ lakue ti sala anzoni ye ti yingo
1 Atâa so lo lango na popo ti azo ti vorongo yanda nga na ti petengo goro ti Babylone teti angu mingi, a hinga Daniel tongana zo so asala na Jéhovah “lakue” (Dan. 6:16, 20). Tongana nyen lo bata lani dutingo ti lo na lege ti yingo? Bible afa so lo yeke sala lakue akusala so andu tâ vorongo. Na tapande, a yeke na yâ ngobo ti salango ye ti lo ti sambela fani ota na yâ lango oko na yâ kubu ti lo na nduzu (Dan. 6:10). Kite ayeke dä pëpe so lo yeke nga na ambeni kusala ti yingo tongana dikongo Ndia. Tongaso, tongana lo wara mbeni tara so na yâ ni angbâ kete lo kui, Daniel ayengi lâ oko pëpe na yâ vorongo ti lo na Jéhovah so asö lo na lege ti kpene.—Dan. 6:4-22.
2 Legeoko laso, a lingbi e sala ngangu ti tene ‘lê ti e akpengba lakue’. (aEph. 6:18). Sese so e yeke dä ayeke na “tïtî wato-sioni.” (1 Jean 5:19). Kangango lege wala akpale alingbi ti si na ngoi so e ku pëpe, na azia mabe ti e na tara. Na ngoi ti kota ye ti vundu, awakua ti Nzapa ayeke ga ande tâ azo so Gog ti Magog ayeke sala kota bira na ala, so mo bâ mo tene, na yâ ni, lege ti kpengo ni ayeke dä pëpe. Ye so ahunda ande ti zia bê kue na Jéhovah.—Ezéch. 38:14-16.
3 Drame ti kota bungbi ti district ti ngu 1998, so li ti tënë ni ayeke “Asewa, zia i diko Bible lâ oko oko!” akomanse na kete tënë so: “Mbeni kota ye ti sala ayeke ti diko lakue, ti manda na ti sala lisoro na ndo Bible na sewa.” E kiri e diko: “Tongana asewa ayeke sala ye so lakue lakue na salango ngangu si Tënë ti Nzapa aduti na wâ, biani tongana ala zia Bible na yâ fini ti ala ti lâ oko oko, ala lingbi ti wara alengo ti nzoni mingi. Ti diko lakue Bible ayeke kono hingango ye ti e, a kpengba mabe ti e, na a fa na e atapande ti mû pekoni: akoli na awali ti giriri so aduti na kota mabe, azo so alingbi ti mû ngangu na e, ti pusu e ti tiri teti tâ tënë.” Na ngoi so e yeke bi bê na ndo ambage nde nde ti nzoni salango aye ti yingo lakue, a yeke nzoni amokonzi ti sewa agi alege, oko wala use tongaso, ti sala si programme ti sewa ti ala na lege ti yingo aga nzoni.
4 Gi nda ti Tënë ti Nzapa lâ oko oko: “Na ngoi so Royaume ti Nzapa akomande, na awato ayeke dä pëpe, nga a sala na sese ye so bê ti lo aye tongana ti so a sala na yayu, fade azo ti sioni, atâa anyama, ‘asala sioni oko pëpe wala asala pëpe si afuti ye’ (Es. 11:9; Mat. 6:9, 10). Atënë so asigigi na yâ Gingo Nda ti Tënë ti Nzapa Lâ Oko Oko 2001 na yâ acommentaire ti versê ti lango 11 ti nze ti septembre. So tâ ye ti dengo bê si dango bê so afa na gigi! Teti so mo yeke mokonzi ti sewa, mo yeke bâ lakue versê ti Bible ti lâ oko oko nga na acommentaire ni na sewa ti mo? Ye so ayeke ga na aye ti nzoni mingi. Tongana lege ayeke dä pëpe ti bungbi legeoko na ndapelele, peut-être mo lingbi ti sala ni na mbeni ngoi nde na yâ lango ni. Mbeni babâ atene: “Tengo kobe ti lakui ayeke mbeni nzoni ngoi teti ti e ti sala lisoro na ndo versê ti lâ oko oko.”
5 Tongana mo yeke diko lakue versê ti Bible lâ oko oko na sewa, mo lingbi na gonda. Mo lingbi peut-être ti wara ye ti nzoni na ndo ni na dikongo mbeni mbage ti Bible na oko ngoi ni. Ambeni ayeke diko ka lakue chapitre kue so agboto versê ti lango ni dä. Ambeni ayeke soro buku ti Bible ti diko ni oko na oko na peko ti tele. Fade dikongo Bible lâ oko oko ayeke mû maboko na sewa ti mo ti kono nzoni mbito ti kpe ti nzere pëpe na lê ti Jéhovah, na ayeke maï ande nzara ti ala ti sala ye so bê ti lo aye.—Deut. 17:18-20.
6 Programme ti dikongo Bible na sewa ti mo, nga bango versê ti lâ oko oko ayeke ga ande na aye ti nzoni mingi ahon ti kozo, tongana mo lingbi ti mû ambeni kete penze-ngbonga ti sala lisoro na ndo lege ti sala kusala na ye so ala manda. Buku Ekole ti Kusala amû wango so na lembeti 60: “Mo lingbi . . . ti soro ambeni versê na yâ dikongo Bible ti yenga ni, ti sala lisoro na ndo ti nda ni, na pekoni, ti hunda atënë tongana: ‘Ye so afa lege na e tongana nyen? Tongana nyen e lingbi ti sala kusala na aversê so na fango tënë? A fa nyen na ndo Jéhovah nga na ndo lege so lo yeke sala na ye, nga tongana nyen ayeke kono yekiango ndo so e yeke na ni na mbage ti lo?’ ” Mara ti lisoro na ndo aye ti yingo tongaso ayeke mû maboko ande na azo ti da ti mo kue ti “hinga nda ti ye so Seigneur aye.”—aEph. 5:17.
7 Mandango ye na sewa: Mungo li ni lakue na yâ mandango ye na sewa yenga oko oko ayeke mbeni pendere lege teti amokonzi ti sewa ti fa na amolenge ti ala so a lingbi a zia aye ti yingo na kozo ndo. Mbeni maseka-koli adabe ti lo: “Ngoi na ngoi, teti so babâ ti mbi anze tongana lo londo na kua lo ga, lo yeke tiri na lango. Atâa so kue, mandango ye ni ayeke dä kamême, na salango ni lakue tongaso amû maboko na e ti bâ nene ti mandango ye ni.” Amolenge alingbi nga ti mû mbage ti ala si lekengo ye ni ague na li ni. Mbeni sewa so ayeke na amolenge gumbaya ayeke zingo ka lakue na ngbonga oku ti ndapelele ti manda ye, teti so mbeni ngoi nde ti sala ni ayeke dä pëpe.
8 Ti tene mandango ye na sewa alë lengo, a lingbi mokonzi ti sewa ni ‘asala hange na fango ye ti lo.’ (1 Tim. 4:16). Buku Ekole ti Kusala na lembeti 32 atene: “E lingbi ti tene so mbeni mandango ye na sewa so alë lengo ahunda ti tene mo hinga sewa ti mo ni nzoni kozo si. Azo ti sewa ti mo ague na li ni na lege ti yingo? . . . Tongana mo yeke fa tënë na amolenge ti mo, ala yeke na mbito pëpe ti fa tele ti ala tongana aTémoin ti Jéhovah na gbele akamarade ti ala? Ala wara ngia na yâ programme so mo sala ti diko Bible na ti manda ye na sewa? Ala yeke sala biani si lege ti Jéhovah aga lege ti ala? Na bingo lê nzoni na ndo asalango ye tongaso ayeke fa ande na mo, mokonzi ti sewa ni, ye so a hunda na mo ti sala ti maï na ti kpengba alengo ti yingo ti zo oko oko kue ti da ti mo.”
9 Abungbi ti kongregation: A lingbi lekengo tele na guengo na abungbi aduti mbeni kota mbage ti salango ye ti mo ti yenga oko oko (aHéb. 10:24, 25). Ngoi na ngoi mo lingbi ti leke tele teti ambeni bungbi ni na sewa. Ahon ti ku juska ngoi ni aga ndulu, mo lingbi ti leke tele kozoni? Fade salango ye lakue tongaso ayeke sala si lekengo tele ti mo nga aye so mo wara na lege ti abungbi aga nzoni ahon ti kozo.—aProv. 21:5.
10 Ngbango lakue ti sala ye nzoni afa na gigi so aye ti yingo so mbeni zo asala lakue ayeke lë lengo. Mo yeke sala nyen tongana ambeni ye asi so a yeke ngangu na mo ti leke tele teti abungbi kue? Buku Ekole ti Kusala amû wango so na lembeti 31: “Kpe gbanda ti dikongo ye na loro ti hunzi ni hio, wala, ti so ayeke sioni mingi, ti manda ye oko pëpe teti mo lingbi pëpe ti sala ni kue. Nde na so, gi ti bâ ye oke mo lingbi ti manda, na sala ye so nzoni. Sala ni yenga oko oko. Tongana ngoi ayeke hon, sala ngangu ti leke ambeni bungbi nde.”
11 Tongana asewa aga hio na abungbi, ye so ayeke mû maboko na ala ti leke bibe ti ala ti sepela Jéhovah na ti wara nzoni na lege ti wango so lo mû. Sewa ti mo ayeke sala ka ni? A hunda ti leke aye kozoni, nga mungo maboko ti zo kue na yâ ti da ni. Tongana mo bâ so sewa ti mo ayeke sala ye gi na loro na ye ahon ndo ti ala na lakui kozoni ti gue na bungbi, mo lingbi ti leke ambeni ye na yâ salango ye ti mo ti lakue? Ambeni ye ayeke dä so a lingbi a sala ni kozoni? Tongana mbeni zo ti sewa ni ayeke na akua ti salango ni so ahon ndo ti lo, ambeni alingbi ti mû maboko na lo pëpe? A yeke kiri ande na peko agingo bê tongana, ambeni penze-ngbonga kozo na guengo na bungbi, zo oko oko ahunzi ti leke tele kue? Nzoni lekengo ye asala si bibe ti siriri na yâ ti sewa ni nga na yâ ti kongregation amaï.—1 aCor. 14:33, 40.
12 Fango tënë: Ti zia mbeni mbilimbili ngoi teti fango tënë ayeke mbeni mbage ti ye ti yingo so a yeke sala lakue. Mbeni maseka-koli so iri ti lo ayeke Jayson atene: “Na yâ sewa ti mbi, a bata lakue andapelele ti samedi gi teti fango tënë. Ye so ayeke lani nzoni mingi teti mbi ngbanga ti so tongana mbi yeke sigigi na fango tënë mingi, mbi yeke bâ nga akota ye ti nzoni so a yeke sala, na mbi yeke wara ngia na yâ ni mingi nga.” Aita mingi so akono na yâ asewa ti aTémoin atene nga so dutingo na mbeni mbilimbili ngoi so azia ni gi teti fango tënë yenga oko oko amû maboko lani na ala ti gue na li ni tongana awakua Chrétien.
13 Nzoni salango ye lakue alingbi nga ti sala si ngoi so sewa ti mo amû teti fango tënë aduti ye so amû ngia na alë lengo mingi. A lingbi ti sala ye so tongana nyen? Tour ti Ba Ndo ti lango oko ti nze ti juillet 1999, lembeti 31 amû wango so ge: “Na ambeni ngoi, mo yeke gbu ndembe ti mandango ye na sewa ti mû maboko na azo ti da ti mo ti leke tele teti fango tënë na yenga ni? Salango tongaso alingbi ti ga na ye ti nzoni mingi (2 Timothée 2:15). A lingbi ti mû maboko na ala ti sala si nda ti kusala ti ala ayeke dä na alë lengo. Na ambeni ngoi, mo lingbi ti mû ngoi kue ti mandango ye ni teti lekengo tele tongaso. Fani mingi, mo lingbi ti sala tënë ti ambeni mbage ti kusala ti fango tënë na yâ ti alisoro so ayo pëpe na hunzingo ti mandango ye na sewa, wala na ambeni ngoi nde na yâ ti yenga ni.” Sewa ti mo atara ti sala tongaso awe?
14 Gue na li ni: Na lege ti ye so e manda ge, mo bâ ambeni ye so na yâ ni sewa ti mo ayeke sala kusala dä nzoni? Gonda sewa ti mo, na sala ngangu ti tene a kiri aga nzoni ahon ti kozo. Tongana mo bâ aye mingi so a yeke nzoni a leke ni, soro oko wala use ti sala kusala dä kozo. Tongana a ga awe mbage ti ye ti yingo so mo sala lakue, sala kusala na ndo mbeni oko wala use nde. Duti na nzoni bango ndo na sala ye na lege ni (aPhil. 4:4, 5). A hunda ti sala ngangu mingi ti ngbâ lakue ti sala ye ti yingo na yâ sewa ti mo. Ye oko, a yeke ye so alingbi na ni biani, teti so Jéhovah amû zendo: “Zo so aleke lege ti lo mbilimbili, fade Mbi fa na lo salut ti Nzapa.”—Ps. 50:23.