Ekole ti Kusala ti aChrétien ti ngu 2015 ayeke mû maboko na e ti maï akode ti fango ye ti e

¹ David, mbeni wasungo psaume, atene: “Zia tënë ti yanga ti mbi na bibe ti mbi amû ngia na Mo, O L’Éternel, Tênë ti mbi na Zo Ti Ton mbi.” (Ps. 19:15). E ye ti tene atënë ti e anzere na Jéhovah tongana ti David, ndali ti so e bâ tongana kota ye pasa so e yeke na ni ti fa tâ tënë na yâ ti congrégation nga na fango tënë. Ekole ti Kusala ti aChrétien ayeke mbeni lege so Jéhovah ayeke fa na e kode ti kua ti e ti fango tënë. Fango ye so ayeke tambela yenga oko oko na yâ ti acongrégation ahon 111 000 na yâ ti dunia kue. Fango ye so amû maboko na aita na ndo ti sese kue ti ga awafango tënë so ahinga ti fa ye nzoni, so alingbi ti ga na azo ti yeda na tâ tënë, ti sara ye na ndara nga na mbeto pëpe.—Kus. 19:8; aCol. 4:6.

² A yeke yôro ande na yâ ti mbeti-kapa ti ekole ti ngu 2015 li ti atënë so ayeke “Atënë ti Mbeti ti Nzapa ti sara na lisoro” so ayeke na yâ ti Fini dunia. Na ndo ni, a changé ngoi so ayeke sara na angbongboro tënë ti dikongo Bible nga na Devoir 1. Achangement nga na awango so afa tongana nyen la a yeke sara ambage oko oko ti ekole so ayeke na yâ ti aparagraphe so ayeke ga na peko.

³ Angbongboro tënë ti Bible: Ita so ayeke sara mbage so ayeke na penze-ngbonga 2 ti sara tënë na ndo ti mbeni nzoni ye ti manda oko so a yeke na yâ ti dikongo Bible ti yenga ni. Tongana lo leke tere ti lo nzoni, a yeke sara si lo yeke sigigi na mbeni nzoni ye ti manda oko na yâ ti ngoi so a hunda. Na pekoni, tongana ti so a yeke sara ka, lo yeke zia penze-ngbonga omene na aita ti sara tënë nduru (ahon seconde 30 pëpe) ti fa aye ti nzoni so ala wara na dikongo Bible ti yenga ni. Ti mû pendere commentaire nduru (seconde 30) a hunda ti leke tere nzoni; me sarango tongaso ayeke mbeni nzoni lege ti fa ye na tere ti e wani. A yeke sara nga si amba ti e alingbi ti fa aye ti nzoni so ala wara na yâ ti gingo nda ti aye ti ala.

⁴ Devoir 1: A kiri na ngoi ti dikongo Bible ni na gbe ni, ahon penze-ngbonga 3 pëpe, nga wungo ti aversê so a yeke zia ti tene a diko a yeke duti mingi ape. A yeke nzoni a-élève so ayeke sara devoir so adiko ni na kota go fani mingi, nga ala diko ni na lege ni tongaso si atënë ni atoto na mbeni lege so azo alingbi ti mä yâ ni. A lingbi awakua ti Jéhovah kue asara ngangu ti diko ye nzoni, ndali ti so dikongo mbeti ayeke kota ye na yâ ti vorongo ti e. Anzere na e mingi so amolenge ti e ayeke diko ye nzoni, na e gonda ababâ na amama so ayeke sara ngangu ti mû maboko na amolenge ti ala ti diko ye nzoni.

⁵ Devoir 2: A yeke mû ande mbage so na mbeni ita-wali ti sara ni na yâ ti penze-ngbonga 5. A yeke nzoni élève ni asara kua na mama-tene so a mû na lo. Tongana devoir so a mû na mo aluti na ndo ti tënë so ayeke na yâ ti Fini dunia, a lingbi mo sara ye alingbi na mbeni cadre ti fango tënë so ayeke tâ ye nga so alingbi na territoire ti congrégation ni. Tongana devoir ni ayeke na ndo ti iri ti mbeni zo so Bible asara tënë ti lo, a yeke nzoni élève ni a gi asango na ndo ti zo ni, lo soro aversê so lo yeke diko, nga lo fa ye so e lingbi ti manda na lege ti tapande ti zo ni. Mo lingbi ti yôro nga ambeni versê nde ti Bible so ague oko na mama-tene ni na yâ ti devoir ni. Surveillant ti ekole ayeke mû ande na mo mbeni zo oko ti tene mo na lo sara devoir ni.

⁶ Devoir 3: A yeke mû ande mbage so na mbeni ita-koli wala ita-wali ti sara ni na yâ ti penze-ngbonga 5. Tongana a mû mbage so na mbeni ita-wali, a yeke nzoni lo sara ni tongana ti so a yeke sara na Devoir 2. Tongana a mû ni na mbeni ita-koli, lo yeke sara ni tongana mbeni diskur; a lingbi lo bi bê na azo kue so aga na Da ti Royaume. A lingbi élève ni azi nda ti mama-tene ni, lo soro aversê so lo yeke diko, nga lo fa ye so e lingbi ti manda na lege ti tapande ti zo ni so Bible asara tënë ti lo so.

⁷ Mbeni fini kode ti sarango na Devoir 3 ndali ti aita-koli: Tongana mbage so a mû ayeke na yâ ti Fini dunia, a lingbi a sara ni tongana mbeni démonstration na ngoi ti vorongo Nzapa na yâ ti sewa wala tongana ti so a yeke fa tënë na mbeni zo. Surveillant ti ekole ayeke mû ande mbeni zo ti tene mo na lo asara ni nga lo yeke fa cadre ni. Na ambeni ngoi, a lingbi ti mû devoir ni so na mbeni ancien. Ancien ni alingbi ti soro zo so lo na lo ayeke sara ni nga na cadre ni. Kite ayeke dä pëpe so a yeke nzere ande mingi na aita ti bâ kode so ancien ni ayeke fa ye na mbeni zo ti sewa ti lo wala na mbeni ita-koli.

⁸ Wango: Surveillant ti ekole ayeke mû penze-ngbonga use na peko ti devoir oko oko ti gonda a-élève ni nga ti mû awango so ayeke na yâ ti buku Wara nzoni na lege ti Ekole ti Kusala ti aChrétien. Na ngoi so surveillant ti ekole ni ayeke iri élève oko oko ti sara devoir, lo yeke fa pëpe point so élève ni ayeke sara na kua. Na peko ti devoir oko oko, a lingbi surveillant ni agonda élève ni na bê ti lo kue, lo fa point so élève ni asara kua na ndo ni, lo fa mbilimbili tongana nyen la élève ni asara kua nzoni na point ni so, wala na nzoni bê lo fa ngbanga ti nyen a lingbi élève ni akiri asara kua na point ni so.

⁹ A yeke wara mbeti ti awango ndali ti élève oko oko na yâ ti buku Ekole ti Kusala lembeti 79 ti si na 81. Na peko ti so mbeni élève asara devoir ti lo awe, surveillant ti ekole ni ayeke sû na yâ ti buku ti élève ni mbilimbili tënë na ndo ti point so lo sara na kua, nga na peko ti bungbi lo lingbi ti hunda lo ti hinga wala lo tara tere ti lo na ndo ti point so a mû na lo. Na peko ti bungbi wala na mbeni ngoi nde, lo lingbi ti gonda élève ni na ti fa na lo ambeni ye nde so lo lingbi ti sara. A lingbi a bâ ngoi so a yeke mû ti bi bê na ndo ti élève oko oko tongana mbeni nzoni lege ti mû maboko na lo ti maï na lege ti yingo.—1 Tim. 4:15.

¹⁰ Tongana mbeni élève ahon ngoi so a mû na lo, surveillant ti ekole wala mbeni zo so ayeke mû maboko na lo alingbi ti sara mbeni signe, na tapande ti pika banc, ti fa na lo so ngoi so a mû na lo ahunzi awe. Tongana élève ni ahinga so lo hon ngoi ni, zia lo hunzi tanga ti tënë so angbâ na yanga ti lo na lo descend na ndo ti estrade ni.—Bâ buku Ekole ti Kusala, l. 282, par. 4.

¹¹ A wa azo kue so asara ye alingbi na ye so a hunda ti tene ala zia iri ti ala na Ekole ti Kusala ti aChrétien. (Bâ buku Ekole ti Kusala, l. 282, par. 6.) Ekole so amû lege na awakua ti Jéhovah ti sara tënë nga ti fa nzoni tënë ti Royaume na bê ti ala kue, na nengo zo nga na ndoye. Kite ayeke dä pëpe so a nzere na Jéhovah mingi ti tene azo kue so awara ye ti nzoni na lege ti ekole so agonda lo.—Ps. 148:12, 13; És. 50:4.