Mungo maboko tâ na ngoi ni

¹ Tongana bazengele Pierre abâ so a yeke nzoni lo kpengba amba ti lo wamabe, gingo bê ti lo na mbage ti ala apusu lo ti dabe ti ala na lege ti ndoye, na ti wa ala (2 Pi. 1:12, 13; 3:1). Lo wa mingi ‘ala so awara mabe’ ti bata si asalango ye ti ala na lege ti yingo angbâ ti maï, na tongaso, ala ‘duti senge pëpe, me ala lë lengo, si ala hinga Seigneur ti ala Jésus-Christ nzoni mingi.’ (2 Pi. 1:1, 5-8). Ye so Pierre agi ayeke lani ti mû maboko na ala ti sala si lege so a hiri nga a soro na ala, so alondo na Jéhovah, aduti biani tâ ye, tongaso si ‘Lo lingbi wara ala na yâ siriri, me na yâ sioye wala ye ti kirikiri pëpe.’ (2 Pi. 1:10, 11; 3:14). Ti mingi ti awamabe, wango ti Pierre aduti lani mbeni mungo maboko so aga tâ na ngoi ni.

² Laso, asurveillant Chrétien ayeke na mara ti bibe tongaso na ndo awakua ti Nzapa. Na “lâ ti ye ti ngangu” so e yeke na yâ ni, a lingbi awakua ti Jéhovah mingi atiri na akpale (2 Tim. 3:1). Teti so akpale ti nginza, ti yâ ti sewa, wala ti zo mveni angbâ lakue ti gue na li ni, ambeni ita ayeke peut-être na mara bibe ti David: “Sioye mingi so zo alingbi ti diko pëpe angoro mbi; sioye ti mbi agbu mbi, tongaso mbi lingbi yä lê ti mbi pëpe; a yeke mingi ahon kuali ti mbi; na ngangu ti bê ti mbi awe.” (Ps. 40:13). Akpale so alingbi ti ga kota, na asala si aita tongaso abâ peut-être na nene ni pëpe akungba ti ala ti yingo so ayeke kota ye mingi, na asala si ala zia ti mû mbage ti ala mingi na kusala ti fango tënë. Ye oko, atâa akpale ti ala, ‘ala girisa komandema ti Jéhovah pëpe.’ (Ps. 119:176). A yeke fadeso tâ ngoi ti tene a-ancien amû maboko so alingbi na aita tongaso.​—Es. 32:1, 2.

³ Ti sala ni, a wa a-ancien ti sala kue ti mû maboko na ala so amû mbage ti ala pëpe na kusala ti fango tënë na ngoi so. A to nda ni na ngoi so juska na hunzingo ti nze ti mars, a yeke sala ngangu kue ti mû maboko na aita ni. A wa nga asurveillant ti mandango buku ti sala vizite na aita so azia ti fa tënë, ti mû maboko na ala na lege ti yingo na bibe ti kiri ti sala kusala ti ala na yâ kongregation. Na ndo so a hunda ti sala ni, a lingbi peut-être ti leke ti sala étude na ita ni. A lingbi ti hunda mungo maboko ti ambeni wafango tënë. Tongana a hunda mo ti sala ni, ngangu so mo yeke sala alingbi ti ga na aye ti nzoni mingi, mbilimbili tongana mo mû wango ni na lege ti nzobe.

⁴ E kue e yeke na anda ti tënë ti duti na ngia tongana mbeni ita akiri asala kusala ti lo na yâ kongregation (Luc 15:6). Angangu so e sala ti wa aita so azia ti fa tënë ayeke ga na ‘mbeni tënë so atene ni na tâ ngoi ti lo.’​—aProv. 25:11.