Lekengo aDa ti Royaume na ando nde nde na yâ ambeni kodoro ti Poto
1 Na yâ mbeni Kusala ti Royaume so ahon ade ti ninga pëpe (bâ km 9/02 3-6), e sala lani tënë na ndo lekengo aDa ti Royaume na Afrika. Azo mingi na popo ti e aye ti hinga ye wa a yeke sala na Poto.
2 Giriri, a kanga lege na kusala ti aTémoin ti Jéhovah na yâ akodoro mingi ti Poto, so andu Poto ti Tö. Mingi ni, akangango lege ni akpengba ngangu. Ti sala abungbi na lê ti azo, a yeke lani kete ye pëpe. A yeke nga lani ngangu ti sala abungbi so na yâ Da ti Royaume. Me na yâ angu so ahon ade ti ninga pëpe, “L’Eternel asala kota ye teti e, na e yeke na ngia.”—Ps. 126:3.
3 A to nda ni na ngu 1983, yeke yeke, ngangu so a sala na ndo aTémoin ti Jéhovah awoko. Ti si na ngu 1989, ndia ayeda na kusala ti aTémoin ti Jéhovah na Pologne nga na Hongrie. Ti Russie, a yeke na ngu 1991. Ngbele ye na ngoi ni so, kusala ni amaï na Russie nga na yâ angbele kodoro ti Union Soviétique. A londo na mars 1996 ti si na octobre 1998, Wabatango Bungbi ayeda na akuda 359 so afiliale, so abâ lege ti kusala na yâ akodoro 11 ti Poto, ahunda ti leke na aDa ti Royaume.
4 Na ngoi so mo yeke bâ afoto ni na yâ supplément so, gbu li na ndo apendere kota kusala so Jéhovah asala teti azo ti lo (Ps. 136:4). Mo yeke duti na ngia ti hinga so a yeke sala kusala pendere mingi na a-offrande so aita na ndo sese kue amû. So alingbi na ye so Jésus atene na Jean 13:35: “Na lege so, fade azo kue ahinga i yeke adisciple ti Mbi, tongana i ndoye tele ti i na popo ti i.”
5 Na popo ti akodoro ti Poto so awara nzoni na lege ti ye so a leke ti mû maboko na lekengo aDa ti Royaume na yâ akodoro so mosoro ayeke dä mingi pëpe, a wara Roumanie. Ngbele ye na juillet ngu 2000, a leke awe aDa ti Royaume 36. Na salango kusala na mbeni plan so aye ti lingbi na tanga ti aDa ti Royaume kue, Ukraine aleke aDa ti Royaume 61 na yâ ngu 2001, nga 76 na ngu 2002. Na lege ti anginza so a mû teti aDa ti Royaume, a leke awe aDa ti Royaume ngbangbo mingi na Bulgarie, Croatie, Macédoine, Moldavie, Russie, nga Serbie na Monténegro.
6 Lekengo aDa ti Royaume na yâ ambeni kodoro ayeke kete ye pëpe. A lingbi a sala ngangu mingi kozoni si tâ lekengo da ni alingbi ti to nda ni. Mingi ni, ye tongaso amû ngoi mingi. Nga, na pekoni nginza so a mû ti leke na Da ti Royaume kâ ayeke kota ahon ti so a sala na mingi ti akodoro ti Afrika na ti Amerika ti Mbongo. Ye oko, ndali ti kota guengo na li ni ti azo so ayeke voro Jéhovah, a hunda lakue ti leke aDa ti Royaume ngbangbo mingi na yâ akodoro ti Poto so ayeke na mosoro mingi pëpe.
7 So mbeni pendere ye ti bâ mara ti guengo na li ni tongaso ti lekengo aDa ti Royaume so! Aye mingi so asi afa so a sala nzoni tënë ti témoin na ando so a leke aDa ti Royaume so dä. Na ambeni ndo, bibe ti duti ndulu ti sala ye so aita afa, na yâ mungo tâ gi peko ti aye so a fa ti leke na ada ni, apika bê ti akota zo ti kodoro ni.
8 Tâ na lege ni, Esaïe asala tënë ti prophétie na ndo guengo na li ni ti tâ vorongo na ngoi ti e. Na lege ti prophète ni, Nzapa atene giriri: “Mbi, L’Eternel, fade Mbi sala si ye so aga fade fade tongana lâ ni alingbi.” (Es. 60:22). Biani, angu bale-oko so ahon afa so a yeke ngoi ti Jéhovah ti tene aye ague na li ni na Poto ti Tö. Zia Jéhovah angbâ ti tuku gbâ ti deba nzoni ti lo na ndo angangu so e sala ti pusu na loro lekengo aDa ti Royaume na yâ akodoro mingi, na ngoi so e yeke mû nginza teti aDa ti Royaume! Ye so ayeke sala ande si a kiri a leke ambeni Da ti Royaume na yâ akodoro so mosoro ayeke dä mingi pëpe. A yeke sala ande si tâ vorongo amaï na yâ ambage mingi ti sese ti Poto, nga a yeke sala ande tënë ti témoin mingi ahon ti kozo “na nda ti sese kue.”—Kus. 13:47.
[Afoto na lembeti 3]
Gbâ ti aDa ti Royaume na ndo oko Moscou, Russie
[Afoto na alembeti 4-6]
Afini Da ti Royaume na Poto ti Tö
Strumica, Macédoine
Daruvar, Croatie
Bitola, Macédoine
Sokal, district ti Lviv, Ukraine
Sofia, Bulgarie
Krasnooktyabrskiy, na Maykop, Russie
Bački Petrovac, Serbie nga Monténegro
Plovdiv, Bulgarie
District ti Tlumach, Ivano-Frankivsk, Ukraine
Rava-Ruska, district ti Lviv, Ukraine
Stara Pazova, Serbie nga Monténegro
Zenica, Bosnie na Herzégovine
Sokal, district ti Lviv, Ukraine
Zhydachiv, district ti Lviv, Ukraine