Tënë ti Nzapa ayeke tâ tënë
1. Anene tënë wa ayeke na yâ ti Bible?
1 Wasungo psaume atene: “Tënë ti Mo kue ayeke tene-biani”. (Ps. 119:160). Na lege ti Tënë ti lo so a sû na gbe ti yingo, Jéhovah ayeke mû akiringo tënë so alingbi biani na atënë so ayeke kota ahon atanga ni kue, so azo ayeke hunda na yâ fini ti ala. Lo mû dengo bê nga na beku teti azo so ayeke na kpale. Na lo fa na e tongana nyen e lingbi ti ga ndulu na lo. Mbeni wali so bê ti lo asi na singila atene: “Mandango tâ tënë ti Bible ayeke tongana ziango mbeni sioni ndo so avuko mingi ti lï na mbeni ndo so wâ aza dä nga ayeke pendere.” Tongana lege azi, mo yeke sala ngangu ti fa tâ tënë ti Bible na azo?
2. Bible aleke fini ti azo nzoni ahon ti kozo tongana nyen?
2 Ngangu ti Bible ti gbian ye na ti gboto azo kue: Tâ tënë ti Bible ayeke na ngangu ti ndu bê ti azo na ti gbian fini ti ala (aHéb. 4:12). Giriri, mbeni maseka-wali so iri ti lo ayeke Rosa ayeke kä tele ti lo na akoli, nga lo hinga ti nyon mbangi na sämba. Lo tene: “Mbeni lâ, na ngoi so vundu ti mbi ahon ndo ni, mbeni koli Témoin na wali ti lo afa na mbi tongana nyen Bible alingbi ti mû maboko na e ti leke akpale ti e. Mbi to nda ti manda Tënë ti Nzapa, na a pika bê ti mbi mingi. Gi na yâ ti nze oko, mbi wara ngangu ti leke fini ti mbi si ye ti sioni aduti dä pëpe. Teti so fadeso mbi yeke na mbeni nzoni ye na gbele mbi na yâ fini, sämba na mbangi ayeke ye ti mû maboko na mbi mbeni pëpe. Nga, teti so ye so agbu bê ti mbi lani mingi ayeke ti duti kamarade ti Jéhovah, desizion ti mbi ayeke ti bata andia ti lo. Tongana fade nzoni ndara ti Tënë ti Nzapa ayeke dä pëpe, ka biani laso mbi fâ tele ti mbi awe.”—Ps. 119:92.
3. Ngbanga ti nyen a lingbi e gbanzi tele ti e pëpe ti fa tokua ti Bible na azo?
3 Nde na mingi ti abuku ti laso, Bible agboto azo ti ‘amara, ti akete mara, na ti ayanga nde nde kue’. (Apoc. 7:9). Ye so bê ti Nzapa aye ayeke ti tene “azo kue awara salut, na ahinga tene-biani mbilimbili.” (1 Tim. 2:4). Tongaso, zia e tene lâ oko pëpe so, gi ndali ti ndo so zo ni alondo dä, lo yeke yeda ande na nzo tënë pëpe. Nde na so, fa tënë ti Royaume na azo kue. Tongana lege ayeke dä, diko na zo ni tënë ni na yâ ti Bible.
4. Tongana e yeke fa tënë, e lingbi ti sala kusala na Bible tongana nyen?
4 Gboto lê na ndo aversê: Alege mingi ayeke dä ti sala kusala na Bible na yâ fango tënë. Tongana mo yeke kangbi apériodique, tara ti sala kusala na versê so a fa. Na ngoi so ala yeke kangbi mbeti ti nze ni, ambeni ita abâ so a yeke nzoni ti diko na tongo nda ti tënë ti ala mbeni versê so ala soro mbilimbili. Na ngoi kue so mo kiri ti bâ zo ni, diko versê oko wala ahon ni, ti mû maboko na lo ti wara yeke yeke tâ hingango ye. Na ngoi so mo yeke manda Bible na mbeni zo, zia lisoro ni angoro na tele ti akota versê ni. Tongana mo yeke fa tënë na alege kue so azi, zia si Bible aduti ndulu na tele ti mo ti fa na tënë ni.—2 Tim. 2:15.
5. Ngbanga ti nyen a lingbi e sala kue ti diko Bible na yâ fango tënë ti e?
5 Zia e mû maboko na azo ti wara nzoni na lege ti ngangu ti tâ tënë ti Bible so apusu zo ti sala ye. E yeke sala ni na dikongo Bible na yâ alege oko oko kue so azi na e ti fa tënë.—1 aThes. 2:13.