“Fa nda ti tënë ni kue”
1. Pendere tapande wa Bazengele Paul azia na yâ ti kusala ti fango tënë?
1 “Sara kusala ti mo ni kue.” (2 Tim. 4:5). Bazengele Paul ayeke na nzoni yingo-ti-hinga ni la lo mû gbotongo mê so na Timothée. Tongaso, na popo ti ngu 47 na 56, Paul asara voyage ti missionnaire lege ota. Buku ti Kusala akiri asara tënë ti Paul so fa “nda ti tënë ni kue” (Kus. 23:11; 28:23). E lingbi ti sara ni tongana nyen na ngoi ti e laso?
2. Na lege wa e lingbi ti fa nda ti tënë ni kue na ngoi so e yeke fa tënë da na da?
2 Na da na da: Ti sara ngangu ti wara azo so ade ti mä nzoni tënë lâ oko pëpe, e yeke na bezoin ti fa tënë na angoi nde nde na yâ ti lango ni. Mbeni babâ ti sewa alingbi ti duti na yanga-da na alakui wala na anda-yenga. Tongana e kiri lakue si zo ni ayeke ka na yanga-da pëpe, a lingbi e sara ngangu ti sara tënë na mbeni zo so e wara lo na yanga-da ni. Atâa angangu kue so mo sara ti wara mbeni zo atï na ngu, mo lingbi ti sara nyen? Peut-être ti fa tënë na lege ti lettre wala téléphone alingbi ti ga na aye ti nzoni.
3. Na lege wa mo gbu angoi kue so azi na mo ti fa tënë?
3 Na ando so azo ayeke dä nga na alege kue so azi: Laso awakua ti Jéhovah ayeke fa “tâ ndara” na azo kue so aye ti mä ni. Na ambeni ngoi e yeke wara azo “na ndo ti lege” wala ‘na ando so azo ayeke dä.’ (aProv. 1:20, 21, FD). Na yâ ti kusala ti e ti lâ oko oko, e leke na bê ti e ti fa tënë? E lingbi ti tene so e yeke “mû ngoi ti e kue na tënë ni”? (Kus. 18:5). Tongana a yeke tongaso, e yeke sara aye so a hunda na e ti “fa nda ti tënë ni kue”.—Kus. 10:42; 17:17; 20:20, 21, 24.
4. Tongana nyen sambela na gbungo li alingbi ti mû maboko na e ti fa tënë?
4 Ngoi na ngoi, e lingbi ti sara mbeto ti fa tënë ndali ti wokongo ti e wala ndali ti kamene. Ye oko, Jéhovah ahinga akatikati ti e (Ps. 103:14). Ni la, na mara ti angoi tongaso, a lingbi e sambela lo ti wara ngangu ti sara tënë (Kus. 4:29, 31). Nga, na ngoi so e yeke manda ye e wani nga e yeke gbu li na ndo ti ye so e diko na yâ ti Bible, a yeke nzoni e gi ti hinga nene ti nzoni tënë so mingi ahon ti kozo (aPhil. 3:8). A yeke pusu e ti fa tënë na bê ti e kue!
5. Tongana nyen e lingbi ti fa so prophétie ti Joël aga tâ tënë?
5 Prophétie ti Joël afa kozoni so kota lâ ti Jéhovah so amû mbeto mingi ayeke ga, kozo ti tene lâ ni so asi a lingbi awakua ti Nzapa angbâ lakue ti gue na li ni nga ti zia pëpe si mbeni ye akanga lege na ala ti fa tënë (Joël 2:2, 7-9). E lingbi ti sara ye kue so e lingbi ti sara ti mû mbage ti e na kusala ti fango tënë teti so a yeke kiri ti sara ni mbeni pëpe.