‘I kono yâ ni’
1. Kungba wa e oko oko kue e yeke na ni?
1 Na yâ songo ti aita Chrétien, e oko oko kue e yeke na kungba ti sala si kongregation aduti na wâ (1 Pi. 1:22; 2:17). Mara ti wâ tongaso ayeke ga tongana e “kono . . . yâ” ti ndoye so e yeke na ni na popo ti e (2 aCor. 6:12, 13, NW ). Ngbanga ti nyen a yeke kota ye ti gi ti hinga nzoni aita ti e ti koli na ti wali?
2. Ngbanga ti nyen a yeke kota ye ti kpengba songo ti kamarade na amba ti e wamabe?
2 Songo ti kamarade akiri akpengba: Na ngoi so e yeke ga ti hinga aita ti e nzoni ahon ti kozo, e yeke ga ti bâ na nene ni mabe ti ala, gbungo ngangu ti ala nga na ambeni pendere lengo ti ala nzoni mingi. Awokongo ti ala ayeke ga kete na lê ti e, na songo ti e ti kamarade akiri akpengba. Teti e hinga tele nzoni, e yeke na aye kue so alingbi ti kpengba na ti dë bê ti mba (1 aThes. 5:11). E lingbi ti ga “azo so alungula vundu na bê” ti mba ti ke asioni ngangu ti sese ti Satan (aCol. 4:11). Na gbele lâ ti nda ni so asi singo na kpale, so singila si e yeke na ni ti wara anzoni kamarade na popo ti azo ti Jéhovah!—aProv. 18:24.
3. Tongana nyen e lingbi ti duti mbeni ye so amû ngangu na aita ti e?
3 Akota kamarade alingbi ti duti mbeni kpengba lingu ti ngangu na ti dengo bê tongana e yeke na gbele angangu tara (aProv. 17:17). Mbeni Chrétien, so ayeke tiri na bibe so apusu lo ti bâ tele ti lo so lo yeke ye oko pëpe, atene: “Ambeni kamarade ayeke dä lani so ayeke sala tënë ti aye ti nzoni so mbi sala ti mû maboko na mbi ti hon ndo ti sioni bibe so.” Mara ti akamarade tongaso ayeke mbeni deba nzoni so alondo na Jéhovah.—aProv. 27:9.
4. Tongana nyen e lingbi ti gi ti hinga aita ti e nzoni na yâ ti kongregation?
4 Bi bê na ambeni zo nde: Tongana nyen e lingbi ti kono yâ ti ndoye ti e teti amba ti e wamabe? Nde na balango azo na abungbi ti Chrétien, sala kue ti sala kpengba lisoro na ala. Na gingo pëpe ti yôro yanga na yâ atënë so abâ gi ala, fa so mo bi bê na ala (aPhil. 2:4; 1 Pi. 4:15). Mbeni lege nde ti bi bê na ambeni zo ayeke ti tisa ala ti te kobe na e (Luc 14:12-14). Wala mo lingbi ti leke ti fa tënë legeoko na ala (Luc 10:1). Na ngoi so e yeke mû li ni ti gi ti hinga aita ti e nzoni, e yeke maï dutingo beoko na yâ kongregation.—aCol. 3:14.
5. Mbeni lege ti kono wungo ti akamarade ti e ayeke so wa?
5 E yeke soro ka atâ kamarade ti e gi na popo ti ala so ngu ti e na ti ala ayeke oko, wala so aye so anzere na ala anzere nga na e? A lingbi e sala pëpe si aye tongaso azia katikati na asongo ti kamarade so e yeke na ni na yâ ti kongregation. David na Jonathan, nga Ruth na Naomi, amaï akpengba songo ti kamarade atâa so ngu ti ala na ndo so ala londo dä ayeke nde nde (Ruth 4:15; 1 Sam. 18:1). Mo lingbi ti kono wungo ti azo so mo na ala ayeke akamarade? Salango tongaso alingbi ti ga na adeba nzoni so mo ku tele ti mo na ni pëpe.
6. Ambeni ye ti nzoni wa ayeke ga tongana e kono yâ ti ndoye ti e teti aita ti e?
6 Na ngoi so e yeke kono yâ ti ndoye ti e na mbage ti ambeni zo, e yeke kpengba mba na e yeke maï siriri na yâ ti kongregation. Na mbage, Jéhovah mveni ayeke tuku deba nzoni na ndo e teti ndoye so e yeke na ni na mbage ti aita ti e (Ps. 41:2, 3; aHéb. 6:10). Ngbanga ti nyen ti zia pëpe na gbele mo ti sala kue ti hinga nzoni mingi gbâ ti aita?