Kota bungbi ti circonscription: fini programme
Na “lâ ti ye ti ngangu” so e yeke dä, e yeke na bezoin ti ndara ti Jéhovah ti wara nzobe ti lo na ti bata ni (2 Tim. 3:1). Programme ti kota bungbi ti circonscription ti ngu ti kusala 2005 ayeke mû ande na e awango ti sala na kusala nga na atënë ti kpengbango zo, teti kota tënë ni ayeke “ Zia ‘ndara so alondo na nduzu’ afa lege na e.”—Jacq. 3:17.
Kozo diskur na ambage ota, “E fa na gigi ‘ndara so alondo na nduzu’ na yâ fini ti e,” ayeke mû maboko na e ti hinga aye so andu dutingo na sioni oko pëpe, na siriri, salango ye na lege ni nga dutingo ndulu ti mä yanga. Na pekoni, surveillant ti circonscription ayeke gboto lê na ndo ambeni mbage ota ti ndara ti Nzapa. Surveillant ti district ayeke hunzi ande na kozo lango ni na fango tongana nyen aChrétien so ayeke awafango tënë, atâa so a bâ ala tongana “azo so amanda mbeti pëpe, na ala yeke azo senge,” awara aye so alingbi ti sala tënë na ndo ndara ti Nzapa.—Kus. 4:13.
Na use lango ni, mbeni diskur na ambage ota so li ti tënë ni ayeke “E gi lege ti aye so ayeke kpengba zo” ayeke mû maboko na e ti hinga aye so alingbi ti woko e na lege ti yingo na ti kpe ni. A yeke fa na e nga lege so e lingbi ti kpengba ambeni zo na ngoi ti abungbi, na fango tënë nga na yâ sewa. Kota diskur “Lege so ndara ti Nzapa asala nzoni na e” ayeke kono ande mingi yekiango ndo ti e teti aye ti nzoni so e wara tongana e sala ye alingbi na akpengba-ndia ti Nzapa na yâ fini ti e. Tanga ti diskur ni, “Salango ye alingbi na ndara ti Nzapa abata e,” ayeke kpengba e na yâ desizion ti e ti gi ndara ti Jéhovah na lâ ti nda ni so.
Mbeni ye so agboto lê ka lakue na a-assemblée ayeke batême ti afini disciple. Ekole ti kusala ti aChrétien na mandango Tour ti Ba Ndo teti yenga ni ayeke duti ande nga na yâ ti programme ni. Jéhovah aye si e kue e wara nzoni na lege ti ndara so lo mû. Fade e yeke wara mosoro ti yingo mingi na lege ti awango nga na atënë ti kpengbango zo so ayeke ku e na kota bungbi ti circonscription ti e.—aProv. 3:13-18.