Kota bungbi ti circonscription so ayeke sara si e bata dutingo ti e na lege ti yingo
1. Mbeni ye so Jéhovah amû ti leke e si e sara kusala ti e ti fango nzoni tënë ayeke so wa?
1 Jéhovah asara aye mingi ti fa ye na e, ti leke e na ti kpengba e si e sara kusala ti fango nzoni tënë so lo mû na e (Mat. 24:14; 2 Tim. 4:17). Kota bungbi ti circonscription so e yeke sara ngu oko oko ayeke mbeni oko ti aye ni so. Ti ngu 2010, mama-tene ni ayeke “Bata dutingo ti mo na lege ti yingo.” A luti na ndo ti aRomain 8:5 nga na Jude 17-19. Kapa ni ayeke to nda ni ande na yenga ti 31 août 2009.
2. (a) Kota bungbi ni ayeke mû ande maboko na e na yâ ti aye wa? (b) Akota bungbi ti circonscription so ahon awe amû maboko na mo na yâ ti fango tënë tongana nyen?
2 Anzoni ye so e yeke wara dä: Kapa ni ayeke zi ande lê ti e na ndo ti ambeni ye so alingbi ti sara sioni na e. Na tapande, aye tongana bango télé, mango bia na ambeni ye nde alingbi ti buba ngoi ti e na ti gboto lê ti e na ndo ti ye so ayeke tâ kota ye biani. E yeke manda ande tongana nyen ti ke bibe so ayeke pusu azo ti kanga lê na ndo ti aye kue, na e yeke bâ nga ye so a yeke hinga na zo so ayeke zo ti yingo. Diskur ti dimanche so ayeke na ambage nde nde ayeke fa ande tongana nyen zo oko oko nga na sewa oko oko alingbi ti kpengba dutingo ti lo na lege ti yingo na yâ ti akota kpale nga na aye so atara mabe ti lo ngangu. Kapa ni ayeke mû ande maboko na e ti bata bê ti e, ti bata nzoni songo na Jéhovah na ti girisa lâ oko pëpe gbâ ti anzoni ye so ayeke ku azo so abata dutingo ti ala na lege ti yingo.
3. E yeke sara ande kota bungbi ti circonscription ti e lawa? A lingbi mo leke na bê ti mo ti sara nyen?
3 Gi na ngoi so mo hinga lawa nga na ndo wa ala yeke sara ande kota bungbi ti ala ti circonscription, leke tere ti mo ti gue dä na ti dengi mê na akapa ti lango use ni kue. Hinga so, Jéhovah ayeke sara tufa na ndo ti zo so ayeke leke ye ti lo nzoni.—aProv. 21:5.
4. E yeke na kite pëpe ti wara nyen na kota bungbi ti circonscription so ayeke ga?
4 Biani, Jéhovah ayeke lo so amû nzoni matabisi so. Kapa so ngbâa be-ta-zo aleke ni ayeke duti ande biani tâ gi ye so mo yeke na bezoin ni ti ngbâ ti sara kusala ti mo ti Chrétien. E kiri singila mingi na Jéhovah ndali ti anzoni ye kue so lo mû ti sara si “e gbu ngangu tënë ti beku ti e so e yeke sara tënë ni na lê ti azo dandara na [ti] yengi pëpe”.—aHéb. 10:23-25; Jacq. 1:17.