Kapa so a zia ni nde ti kangbi na fini brochure
1 Li ti azo mingi aga kirikiri ndali ti aye so ayeke na yâ sese laso. Me gi azo kete si ahinga ngbanga ti nyen dutingo ti sese ni ayeke tongaso, ye so ayeke si kekereke na ye so ala lingbi ti sala ti bata fini ti ala na ngoi ti fango ngbanga so ayeke ga (Ezéch. 9:4). Ti mû maboko na ala ti hinga nda ti aye so ayeke si na ngoi ti e, a zia na sese mbeni kapa ti kangbingo na brochure ‘I lango pëpe!’, kapa so ayeke to nda ni na lundi 16 mai ti si na dimanche 12 juin.
2 A lingbi ti kangbi brochure ni na ngoi ti fango tënë da na da, ti salango avizite, ti fango tënë na alege kue so azi wala na ngoi ti fango tënë na yâ ti alege. Ye oko, a lingbi a kangbi brochure ni na azo kirikiri pëpe. Nde na so, fade a yeke zia brochure ni gi na maboko ti azo so afa na gigi tâ nzara ti ala teti aye so Bible atene na ndo nda ti aye so ayeke si na yâ sese laso. Ala so afa na gigi pëpe tâ nzara ti ala teti tokua ni, a lingbi a mû na ala mbeni tract ahon ti mû na ala brochure ni.
3 Mo lingbi ti gboto lê ti azo na ndo ti brochure ni na tenengo:
◼ “Tënë ti akota kpale nga na angangu ye so ayeke si na yâ sese laso na so amû ndo kue agbu bê ti azo mingi. [Fa tapande ti mbeni ye so azo ti ndo ni ahinga tënë ni.] Mo hinga pëpe so Bible asala giriri tënë ti aye so? [Zia zo ni akiri tënë. Na pekoni diko mbeni versê so ague oko na tapande ti ye so mo sala fade tënë ni, aversê tongana Matthieu 24:3, 7, 8; Luc 21:7, 10, 11 wala 2 Timothée 3:1-5.] Bible afa na e ngbanga ti nyen aye so ayeke si na ngoi ti e laso nga ye wa ayeke si ande kekereke. Mo ye ti hinga ye mingi na ndo ni? [Zia zo ni akiri tënë. Tongana lo fa na gigi tâ nzara ti lo teti tënë ni, mû brochure ni na lo.] Brochure ni la, a fa mbeni ngele na ndo ni pëpe. Tongana mo ye ti mû mbeni matabisi ndali ti kusala ti fango tënë na ndo sese mobimba, a yeke nzere na e mingi ti wara ni.”
4 Wala ti mo kode so si ayeke nzoni mingi:
◼ “Bê ti azo mingi anze ndali ti aye ti ngangu so ayeke si na yâ ti sese so wala ndali ti mbeni kota kpale so asi gi na ala mveni. Ambeni zo ayeke hunda tele ti ala ngbanga ti nyen Nzapa asala mbeni ye pëpe ti kanga lege na aye so. Bible amû na e beku so na yâ ngoi kete fade Nzapa ayeke sala mbeni ye ti lungula pasi so azo ayeke bâ. Bâ aye ti nzoni so Nzapa ayeke ga na ni ande na azo. [Diko Psaume 37:10, 11.] Mo ye ti hinga ye mingi na ndo ni?” Ko nda ti tënë ni tongana ti so a fa na hunzingo ti paragraphe so na nduzu ge.
5 Sala kue ti sû iri nga na adresse ti ala kue so ayeda ti mû brochure ni, na leke ti kiri ti bâ ala ti maï nzara ti ala. Fade Kusala ti Royaume ti juin 2005 ayeke fa ande lege ti salango ni. Tongana mbeni zo afa na gigi tâ nzara ti lo na kozo vizite ni, e lingbi ti to nda ti étude ti Bible na lê ni lê ni na yâ ti brochure ‘I lango pëpe!’ wala na yâ ti mbeni mbeti nde, na tapande brochure Ahunda.
6 Fade a yeke wara abrochure ni so na peko ti Bungbi ti Kusala so na ngoi ni a yeke sala lisoro na ndo article so. Kozoni, a wa awafango tënë nga na apionnier ti mû gi wungo ti abrochure so ala lingbi ti zia ni na maboko ti azo na yâ ti akozo lango ti kapa ti kangbingo na brochure ni. Zia Jéhovah ahiri deba nzoni na ndo kapa so a zia ni nde ti sepela na lo nga ti mû aye ti nzoni na azo ti bê ti mbilimbili so ayeke na ndo kue.—Ps. 90:17.