Lege ti sara kusala na brochure Nzoni tënë so alondo na Nzapa!
A leke fini brochure so ti mû maboko na e ti sara avizite na ti to nda ti manda Bible na azo
1. Fini brochure wa la a sigigi na ni na ngoi ti Kota Bungbi ti District “Bata bê ti mo!” so ayeke mû maboko na e ti kiri ti sara avizite nga ti to nda ti manda Bible na azo?
1 Na ngoi ti Kota Bungbi ti District “Bata bê ti mo!”, e yeke lani na ngia ti wara mbeni fini brochure so ayeke mû maboko na e ti kiri ti sara avizite nga ti to nda ti manda Bible na azo. Brochure Nzoni tënë so alondo na Nzapa! ayeke legeoko tongana na brochure A hunda so lo mû place ni, ndali ti so aye ti manda ni ayeke nduru. Ye so ayeke mû ande maboko na e ti sara kusala na ni nzoni ti to nda ti manda Bible na azo teti ngoi mingi pëpe. Ye oko, brochure Ahunda asara ti lo lani tënë na ndo ti aye so ahunda na aChrétien, ambeni na popo ni akpengba mingi ndali ti afini wamandango Bible, me fini brochure so aluti ti lo na ndo ti nzoni tënë so awara ni na yâ ti Bible.—Kus. 15:35.
2. A sigigi lani na brochure Nzoni tënë ngbanga ti nyen?
2 A sigigi na ni ngbanga ti nyen? Aita na ndo ti sese kue ayeke hunda mbeni ye so ayeke ngangu pëpe so alingbi ti gboto azo na yâ ti tâ tënë nga ti gue na ala na yâ ti buku Bible afa, so ayeke kozo buku so e yeke manda na ye na azo. Azo so ayeke sara mbeto ti mbeni buku aye ka mingi ti manda Bible na lege ti mbeni brochure. Na ndo ni, a yeke ngangu pëpe ti kiri peko ti mbeni brochure na ayanga ti kodoro mingi.
3. Na lege wa brochure so ayeke nde na tanga ti ambeti so e yeke manda na Bible na azo?
3 Lege so a leke na ni: A sû mingi ti ambeti so e yeke manda na ye na azo na mbeni lege so zo alingbi ti diko ni nga ti gbu nda ti tâ tënë, même sân ti tene a mû maboko na lo. Brochure ti so ni so ayeke nde. A sara ni ti duti mbeni mbeti so mbeni wafango ye la amû ni ti fa na Bible na zo. Ni la, tongana mo mû mbeti so na mbeni zo, a yeke nzoni ti diko paragraphe oko wala use na ti sara lisoro na ndo ni. Aparagraphe ni ayo pëpe, mo lingbi même ti bâ ni na ngoi so ala luti gi na nduzu wala na ando ti dengo buze. Atâa so ayeke nzoni ti to nda ni na kozo ye ti manda ni, e lingbi nga ti to nda ni na mbeni ye ti manda nde so ayeke na yâ ti brochure ni.
4. Na lege wa brochure so ayeke mû maboko na e ti fa ye so alondo gi na yâ ti Bible?
4 Na yâ ti mingi ti ambeti ti e, alingbi ti wara akiringo tënë ti ahundango tënë ni na yâ ti aparagraphe. Ye oko, na yâ ti mbeti so, a yeke wara mingi ni akiringo tënë ni na yâ ti Bible. Azo mingi aye ti manda ye so alondo na Bible ahon ye so alondo na mbeti ti e. Ni la, a fa tënë ti yâ ti mingi ti aversê ni pëpe. A lingbi a diko aversê ni gi na yâ ti Bible. Ye so ayeke mû maboko na awamandango ye ni ti bâ so ye so ala yeke manda alondo na Nzapa.—És. 54:13.
5. Ngbanga ti nyen ayeke kota ye teti wafango ye ni ti leke tere ti lo nzoni kozoni teti kapa oko oko ti mandango ye ni?
5 Brochure ni afa nda ti aversê ni kue pëpe. Ngbanga ti nyen? A leke ni ti mû maboko na wamandango ye ni ti hunda atënë nga ti mû lege na wafango ye ni ti sara kusala na kode ti lo ti fango ye. Tongaso, a yeke kota ye ti leke tere nzoni kozoni teti kapa oko oko ti mandango ye ni. Sara hange: Diko gbâ ti tënë pëpe. E ye ti fa nda ti aversê. Me fani mingi e yeke wara ye ti nzoni mingi tongana e tisa wamandango ye ni ti fa bibe ti lo na ndo ti ye so versê ni aye ti tene. Tongana e hunda atënë na lege ti kode, a yeke mû maboko na lo ti fa nda ti aversê oko oko.—Kus. 17:2.
6. Na lege wa e lingbi ti sara kusala na brochure so: (a) na ndo so azo ayeke dë kite na ndo ti Nzapa nga na Bible? (b) na fango tënë da na da? (c) ti hunda droit na azo ti manda Bible na ala? (d) na ngoi so e yeke kiri ti sara avizite?
6 Legeoko na ambeni mbeti ti mandango na Bible na azo, a lingbi ti kangbi brochure so na ngoi kue, atâa mbeti wa ayeke kangbi ni na yâ ti nze ni. Mingi ti aita ayeke duti ande na ngia ti sara kusala na ni ti hunda droit na azo ti manda Bible na ala teti kete ngoi. Na ndo ni, tongana ti so a tene lani na kota bungbi ti district, ti sara kusala na ni na ngoi so e yeke kiri ti sara vizite na azo so asara nzara ti tënë ni “alingbi biani ti sara si kusala ti sarango avizite ni anzere!”—Bâ a-encadré ti lembeti 11-13.
7. Tongana nyen la mo lingbi ti sara kusala na brochure so ti manda Bible na azo?
7 Lege ti sara étude na ni: E lingbi ti to nda ti lisoro ni na dikongo hundango tënë so a zia numéro na devant ni nga so a sû ni vuko vuko. Na pekoni, diko paragraphe na aversê so a sû na tere ni diko. Hunda atënë na kode ti mû maboko na zo ni ti gbu nda ti aversê ni. Na pekoni, kozo ti hon na mbeni mbage so aga na pekoni, hunda zo ni ti kiri tënë na hundango tënë so a sû ni vuko vuko, ti bâ wala lo gbu nda ni. Na ngoi ti kozo vizite ni, peut-être ayeke nzoni ti sara gi hundango tënë oko. Tongana ngoi ayeke hon, e lingbi ti sara ye ti manda ni kue.
8. Tongana nyen la e lingbi ti fa aversê, na ngbanga ti nyen?
8 Aversê so aga na peko ti tënë “diko” la ayeke ala so akiri tënë droit na hundango tënë so a sû ni vuko vuko. Na ngoi so mo yeke fa mbeni versê, tene pëpe: “Bazengele Paul asû lani na mbeti” wala “Bâ ye so Jérémie atene giriri.” Zo ni alingbi ti pensé so e yeke diko gi tënë ti azo. Nde na so, a yeke nzoni ti tene: “Mbeti ti Nzapa atene” wala “Bâ ye so Bible atene giriri.”
9. A lingbi e diko aversê ni kue na ngoi ti étude ni?
9 A lingbi e diko aversê ni kue wala gi ala so a zia na tere ni “diko”? A yeke na zo oko oko so ayeke sara étude ni ti bâ. A yeke senge pëpe si azia aversê na yâ ti brochure ni; ndani ayeke dä. Na yâ ti aversê oko oko ayeke wara atënë so ayeke nzoni ti sara lisoro na ndo ni. Me tongana asi so, zo ni ayeke na ngoi mingi pëpe, tënë ni agbu bê ti lo nzoni pëpe, wala lo hinga ti diko mbeti nzoni pëpe, peut- être a yeke nzoni ti diko gi aversê so azia na tere ni “diko”.
10. Na ngoi wa la e lingbi ti gue na zo na yâ ti buku Bible afa?
10 Ngoi so e yeke gue na zo na yâ ti buku Bible afa: Na peko ti so e sara lisoro fani mingi nga tongana e yeke sara étude ni lakue lakue, e lingbi ti gue na zo ni na yâ ti buku Bible afa wala ti ngbâ ti manda brochure Nzoni tënë ni juska ahunzi. Awafango tënë alingbi ti sara ye na ndara ti bâ na ngoi wa la ala lingbi ti gue na zo ni na yâ ti buku Bible afa. Tongana e gue na zo ni na yâ ti buku Bible afa awe, a lingbi e to nda ni gi na kozo chapitre ni? Mbeni ndia ayeke na ndo ni pëpe. Zo oko oko ayeke nde nde. Ye oko, mingi ti awamandango Bible ayeke wara ande ye ti nzoni tongana e gue na ala na yâ ti buku Bible afa ti wara atënë mingi na ndo ti mbeni oko li ti tënë so e sara lisoro dä awe.
11. Ngbanga ti nyen a lingbi e sara kua nzoni na fini brochure so?
11 Na yâ ti mbeni sese so ayeke ngangu ti mä nzoni tënë, e yeke na kota pasa ti fa mbeni nzoni tënë so ahon atanga ni kue: So Royaume ti Nzapa ato nda ti komande nga so na yâ ti kete ngoi ayeke ga na mbeni fini sese so mbilimbili ayeke duti ande na yâ ni! (Mat. 24:14; 2 Pi. 3:13). E hinga na bê ti e kue so mingi ti azo so ayeke mä tënë ni ayeke yeda na atënë ti Bible so: “Gere ti zo so aga na tene-nzoni ayeke pendere mingi na ndo ahoto! lo so afa tënë ti siriri, na lo ga na tene-nzoni ti nzoye, lo so afa tënë ti salut, na lo tene na Sion, ‘Nzapa ti mo akomande!’” (És. 52:7). E lingbi ti sara kusala na fini brochure so ti fa nzoni tënë so alondo na Nzapa ti dë bê ti azo ti yâ ti territoire ti e!
[Encadré na lembeti 11]
Na ndo so azo ayeke dë kite na ndo ti Nzapa nga na Bible:
● Na yâ ti ambeni kodoro, awafango tënë abâ so tongana mo sara tënë ti “Nzapa” wala “Bible” ayeke kanga lege na lisoro. Tongana a yeke tongaso na ndo so mo yeke dä, na kozo tingbingo tere na mbeni zo, peut-être ayeke nzoni ti sara tënë na ndo ti aye so agbu bê ti azo ti kodoro ni, na tapande tënë ti mbeni nzoni ngorogbia, ndo wa la zo alingbi ti wara anzoni wango teti asewa, nga tënë na ndo ti gigi ti e ti kekereke. Kozoni ti gue na yâ ti brochure Nzoni tënë peut-être ayeke nzoni ti sara lisoro fani mingi ti fa na zo ni aye so afa so Nzapa ayeke dä nga ngbanga ti nyen ti zia bê ti e kue na ndo ti Bible.
[Encadré na lembeti 12]
Na fango tënë da na da:
● “Mbi ga ti sara lisoro na mo ti fa tongana nyen a yeke ngangu pëpe ti hinga ye so Nzapa aleke ti sara teti gigi ti kekereke ti azo. Mo hunda tere ti mo lâ oko awe so Nzapa ayeke zi ande apasi ti e? [Zia zo ni akiri tënë.] Brochure so ayeke fa na mo na yâ ti Bible ndo so mo lingbi ti wara kiringo tënë na hundango ndo so. [Mû na lo brochure ni, na diko kozo paragraphe ti kozo ye ti manda ni, nga diko Jérémie 29:11.] Na ndo ti tënë so, mo bâ ti mo so ayeke na lege ni so Nzapa aye si gigi ti e ti kekereke aga nzoni? [Zia zo ni akiri tënë.] Tongana mo ye, mo lingbi ti bata brochure ni. Ti peko, e lingbi ti bâ use paragraphe ni ti wara kiringo tënë ti Bible na ndo ti hundango ndo so: ‘Tongana nyen la Nzapa ayeke zi ande aye so asara si azo ayeke bâ pasi?’” Tongana mo bâ so zo ni ayeke na ngoi, mo lingbi ti diko paragraphe use ni na ti sara lisoro na ndo ni nga ti diko aversê ota so ayeke na yâ ni. Leke ti kiri ti sara lisoro na ndo ti use hundango tënë ti ye ti manda ni.
● “Mingi ti azo aye ti sambela, mbilimbili na ngoi so ala yeke na akpale. Mo yeke sambela ka? [Zia zo ni akiri tënë.] Mo pensé so Nzapa ayeke mä asambela kue, wala ambeni sambela ni anzere na lo ape?” [Zia zo ni akiri tënë.] Mbi yeke na mbeni brochure ge so afa tongana nyen ti wara akiringo tënë ti Bible na ndo ti ahundango ndo so. [Mû na lo brochure ni, na bâ legeoko na lo kozo paragraphe ti ye manda 12 na diko aversê so azia na tere ni “diko”.] A nzere pëpe ti mä so Nzapa ayeke mä sambela ti e, ni la ape? Me ti wara ye ti nzoni mingi na lege ti sambela, e yeke na bezoin ti hinga Nzapa nzoni. [Gue na ye ti manda 2 na gboto lê na ndo ti akete li ti tënë so a sû ni vuko vuko.] Tongana mo ye, mbi lingbi ti zia na mo brochure so, nga na mbeni ngoi, e lingbi ti diko akiringo tënë ti Bible na ndo ti ahundango tënë so agbu bê ti zo mingi.”
● “Mbi ga ge laso ngbanga ti so azo mingi ayeke gi bê ti ala na ndo ti ye so ayeke si ande na sese. Mo pensé ti mo so fade dutingo ti azo ayeke ga nzoni mbeni lâ? [Zia zo ni akiri tënë.] Bê ti mingi ti azo adö ti bâ so na yâ ti Bible ayeke wara anzoni tënë so alingbi ti mû na e beku. Bâ ambeni hundango ndo so Bible akiri tënë na ni.” Mû brochure ni na zo ni, na hunda na lo ti soro mbeni hundango tënë oko so agbu bê ti lo mingi so ayeke na peko ti brochure ni. Na pekoni, gue na ye ti manda so lo soro, na fa na lo tongana nyen ti manda ni. Mä tere na lo ti kiri ti bâ hundango tënë so aga na pekoni so ayeke na yâ ti ye ti manda ni.
[Encadré na lembeti 13]
Tara ti hunda droit na azo ti manda Bible na ala:
● “Mbi ga ti sara lisoro na mo kete ti fa tongana nyen ti manda Bible na lege ti brochure so. Brochure so ayeke na aye ti manda 15 so afa ndo wa la na yâ ti Bible ti mo, mo lingbi ti wara akiringo tënë na ndo ti akota hundango ndo. [Fa na lo ndo ti brochure ni nga na peko ni.] Mo tara lâ oko awe ti gbu nda ti atënë ti Bible? [Zia zo ni akiri tënë.] Zia mbi fa na mo tongana nyen aye ti manda so ayeke ngangu pëpe. [Bâ kozo paragraphe ti hundango tënë 3 ti ye ti manda 3 ni, na diko Apocalypse 21:4, 5. Tongana lege ayeke dä, bâ paragraphe so aga na pekoni nga aversê so azia na tere ni “diko”.] Tongana mo ye, mbi lingbi ti zia na mo brochure so. E ye si mo tara ti manda Bible tongaso kamême fani oko. Tongana mo ye ni, mo lingbi ti ngbâ ti manda ni. Ti peko, e lingbi ti bâ kozo ye ti manda ni. Bâ so kozo ye ti manda ni ayeke gi lembeti oko.”
[Encadré na lembeti 13]
Fa fini brochure ni na ngoi ti mbeni vizite:
● Na ngoi so e kiri ti sara vizite na mbeni zo so asara nzara ti tënë ni, e lingbi ti tene: “Mbi yeke na ngia ti kiri ti wara mo. Mbi ga na mo brochure so afa akiringo tënë ti Bible na ndo ti ahundango tënë so agbu bê ti azo mingi. [Mû na lo brochure ni, na hunda na lo ti bâ peko ni.] Hundango tënë wa agbu bê ti mo mingi? [zia zo ni akiri tënë. Na pekoni, gue na ye ti manda so lo soro ni.] Zia mbi fa na mo tongana nyen ti sara kua na brochure so ti wara akiringo tënë ti Bible.” Fa na lo tongana nyen ti manda ni na sarango lisoro na ndo ti paragraphe oko wala use nga ti diko aversê so a sû na tere ni “diko”. Mo to nda ti manda Bible na zo awe la! Zia brochure ni na zo ni, na mä tere ti kiri ti bâ lo. Tongana mo hunzi ye ti manda ni, mo lingbi ti sara lisoro na ndo ti mbeni ye ti manda nde so lo soro wala ti kiri ti to nda ni na kozo ye ti manda ti brochure ni.