Ota mbage ni: Salango a-étude so ayeke gue na li ni
Sala kusala nzoni na aversê ti Bible
1. Ngbanga ti nyen a lingbi e gboto lê mingi na ndo ti aversê tongana e yeke sala a-étude?
1 Ye so e yeke gi na yâ salango a-étude ayeke ti ‘sala adisciple’ na mungo maboko na azo ti hinga na ti yeda na afango ye ti Tënë ti Nzapa nga ti sala ye alingbi na ni na yâ fini ti ala (Mat. 28:19, 20; 1 aThes. 2:13). Tongaso, a lingbi mandango ye ni aluti na ndo aversê ti Bible. Kozoni, a lingbi ti duti nzoni ti fa na awamandango ye ni tongana nyen ti wara ambilimbili versê tongaso na yâ Bible ti ala mveni. Ye oko, tongana nyen e lingbi ti sala kusala nzoni na aversê ti Mbeti ti Nzapa ti mû maboko na azo tongaso ti gue na li ni na lege ti yingo?
2. Tongana nyen e yeke soro aversê so e yeke diko na e yeke sala tënë na ndo ni?
2 Soro aversê so a yeke diko ni. Na lekengo tele ti mo, gi ti bâ tongana nyen aversê oko oko ti ye ti manda ni so a fa tënë ti yâ ni pëpe andu tënë ni so ala gue ti manda, na soro aso wa mo yeke diko nga mo yeke sala tënë na ndo ni na ngoi ti étude ni. Mingi ni, a yeke nzoni ti diko aversê so afa gunda ti aye so e mä na bê dä. Peut-être a yeke na bezoin ti diko pëpe aversê so andu ye ti manda ni mingi pëpe. Bi bê na ye so atia awamandango ye oko oko nga na dutingo ti ala.
3. Ngbanga ti nyen a yeke nzoni ti hunda atënë? Na tongana nyen e lingbi ti sala ni?
3 Hunda atënë. A hon ti fa gi nda ti aversê ti Bible na wamandango ye ni, hunda na lo ti fa nda ni na mo. Mo lingbi ti pusu lo ti sala ni na lege ti hundango atënë na kode. Tongana tënë ti salango ye alingbi na mbeni versê ayeke polele, mo lingbi gi ti hunda na zo ni tongana nyen versê ni ague oko na ye so paragraphe ni atene. Na ambeni ngoi nde, mbeni mbilimbili hundango tënë oko wala molongo ti ahundango tënë alingbi ti duti nzoni ti ga na wamandango ye ni ti gboto nzoni tënë ti nda ni so a ku na mbage ti lo ti tene. Tongana a hunda ti fa nda ti ambeni tënë na ndo ni, mo lingbi ti sala ni tongana zo ni ahunzi ti kiri tënë.
4. A hunda ti tene e fa gbâ ti atënë na ndo aversê so e diko?
4 Sala tënë mingi pëpe. Mbeni wapikango kokora so maboko ti lo ayapu nzoni ayeke mû mingi ni gi lê ti kokora ni oko ti pika ti ndu tâ gi ye ni. Legeoko nga, wafango ye ti kode ayeke na bezoin ti atënë mingi pëpe ti sigigi na mbeni tënë. Lo lingbi ti sala ni na mbeni lege so akpengba pëpe, so ayeke polele nga tâ na lege ni. Ngoi na ngoi, mo lingbi ti bâ so a yeke nzoni ti gi nda ti aye na yâ ti ambeti ti e ti gbu nda ti mbeni versê nga ti fa nda ni nzoni (2 Tim. 2:15). Ye oko, kpe ti fa atënë kue na ndo versê oko oko na yâ étude ni. Yôro na yâ étude ni gi ye so a hunda ti sigigi na nda ti tënë ni.
5, 6. Tongana nyen ti mû maboko na awamandango ye ti sala ye alingbi na Tënë ti Nzapa na yâ fini ti ala? Me a lingbi e kpe ti sala ye wa?
5 Fa tongana nyen ti sala kusala nzoni na versê ni. Tongana lege ayeke dä, mû maboko na wamandango ye ni ti bâ tongana nyen aversê ni andu lo mveni. Na tapande, tongana mo yeke bâ aHébreu 10:24, 25 na mbeni wamandango ye so ade ti ga na bungbi pëpe, mo lingbi ti sala tënë na ndo ti mbeni oko ti abungbi ni na ti tisa lo ti gue dä. Me pusu lo na ngangu ti sala ni pëpe. Zia lege na Tënë ti Nzapa ti pusu lo ti sala ye so a hunda ti nzere na Jéhovah.—aHéb. 4:12.
6 Tongana e yeke sala kusala ti e ti salango adisciple, zia si na lege ti salango kusala ti e nzoni na Mbeti ti Nzapa, e ga na azo ti ‘mä na bê si ala mä yanga’.—aRom. 16:26, Fini Mbuki, 2001.