Mbeti-kapa ti sewa: Fango tënë legeoko na sewa
1 Jéhovah ayeke na kota ngia ti bâ so amolenge ayeke sepela iri ti lo (Ps. 148:12, 13). Même na ngoi ti Jésus, ‘amolenge nga na ala so ade ti nyon me’ asepela Nzapa (Mat. 21:15, 16). Oko ye so ayeke si nga laso. Babâ na mama, tongana nyen i lingbi ti mû maboko na amolenge ti i ti maï ti ga azo so ayeke sepela Jéhovah na wâ na yâ fango tënë? Ti fani use ni tongana ti so e gboto lê fade na ndo ni na yâ ti article so ayeke na nduzu ge na ndo tënë ti abungbi ti kongregation, kpengba ye ni ayeke tapande ti babâ na mama. Mbeni babâ afa peko ti ye so ababâ na mama kue ahinga ni, tongana lo tene: “Amolenge ayeke sala ye pëpe tongana ti so mo yeke tene ni; me ala yeke sala ye tongana ti so mo yeke sala!”
2 Mbeni ita-wali so babâ na mama ti lo ayeke aChrétien atene: “Tongana e zingo na samedi na ndapelele, e yeke gi bê ti e lâ oko pëpe wala e yeke gue na fango tënë laso. E hinga e yeke gue.” Legeoko nga, mo lingbi ti zia na yâ ti amolenge ti mo nene ti fango tënë na ziango na sese mbeni kapa ti mungo mbage na kusala ti fango tënë legeoko na sewa yenga oko oko. A yeke mû gi pëpe lege na amolenge ni ti manda ye na lege ti ye so ala yeke bâ mo na salango ni, me a yeke mû nga lege na mo ti hinga bango ndo ti ala, salango ye ti ala nga na akode so ala yeke maï ni.
3 Mungo maboko na amolenge: Ti tene fango tënë anzere na amolenge, a hunda ti leke ala nzoni si ala mû mbage na kusala ni. Ita-wali so e sala tënë ti lo kozoni awe atene nga: “E yeke pëpe azo so amû gi peko ti ababâ na mama ti e gi tongaso na yâ kusala ti ala ti fango tënë ni. E hinga so a lingbi e mû mbage ti e dä même wala a yeke gi ti pete sonnette ti yanga-da ti azo wala ti zia mbeni tract. Na lege ti mbeni lekengo tele nzoni kozoni na kusala ti fango tënë ti anda-yenga oko oko, e hinga lani ye so e yeke gue ti tene.” Mo lingbi ti fa mara lege so na amolenge ti mo na mungo mbeni penze-ngbonga kete yenga oko oko ti leke ala teti fango tënë na ngoi ti étude ti sewa wala na mbeni ngoi nde.
4 Ti fa tënë legeoko na sewa ayeke mû na mo ambeni lege ti yôro tâ tënë na yâ ti amolenge ti mo. Mbeni babâ so ayeke Chrétien ayeke mû molenge ti lo ti wali na tele ti lo na ngoi so lo yeke tambela kilomètre 20 guengo ni na kiringo ni ti kangbi atract na yâ ti ambeni kete kodoro so ayeke na popo ti ahoto. Na bê ti kiri singila lo tene: “A yeke na ngoi ti atambela so si babâ ti mbi ayôro yeke yeke tâ tënë na yâ bê ti mbi.” (Deut. 6:7). Na salango si kusala ti fango tënë aduti na yâ mbeti-kapa ti sewa ti mo na a ga mbeni ye so ala yeke sala ni yenga na yenga, mo lingbi nga ti wara deba nzoni tongaso.