Mû maboko na amolenge ti mo ti fa tënë nzoni
1 Kota kungba ti fango na amolenge so ade kete lege ti sala kusala ti fango tënë ayeke na ndo go ti ababâ na mama Chrétien. Alege ayeke dä mingi ti sala ni. Ambeni molenge ahinga même ti diko na li ti ala peko ti mbeni versê ti Bible kozoni si ala ga ti hinga ti diko mbeti. Ye so alingbi ti pika mingi bê ti azo so e yeke fa tënë na ala. Na ngoi so amolenge ni ayeke kono, ala lingbi ti sala ye mingi na yâ kusala ti fango tënë. Tongana nyen mo babâ wala mama mo lingbi ti mû maboko na amolenge ti mo ti fa tënë? Peut-être atapande ti fango tënë so ayeke na gbe ni ge ayeke mû ande maboko na mo.
2 Na peko ti balango zo ni, mo lingbi ti tënë:
◼ “Molenge ti mbi ti koli so [fa iri ti molenge ni] ayeke na mbeni pendere versê ti Bible so lo ye ti diko ni na mo.” Molenge ni alingbi ti tënë: “Mbeni versê so ayeke na mbeti ti Genèse afa na mbi iri ti Nzapa. [Molenge ni adiko peko ti versê ti Genèse 22:14 na li wala lo diko ni na yâ ti Bible.]” Na pekoni lo tene: “Ambeti so asala tënë na ndo ye so Jéhovah Nzapa ayeke sala ande teti e. Mo ye ti wara ni?” Babâ wala mama ni alingbi ti hunzi tënë ni na fango na zo ni lege so a yeke mû maboko na kusala ti e ti fango tënë na ndo sese mobimba.
3 Wala mo lingbi ti tene:
◼ “Bala ala. Mbi yeke fa na molenge ti mbi ti wali so [fa iri ti molenge ni] lege ti ndoye azo so ayeke ndulu na lo. Lo ye ti fa na mo mbeni ndulu tënë na ndo Tënë ti Nzapa.” Molenge-wali ni alingbi ti tënë: “Mbeni lege so mbi ye ti mû maboko na azo ayeke ti fa na ala beku so Bible amû teti gigi ti kekereke. [Molenge ni adiko peko ti versê ti Apocalypse 21:4 na li ti lo wala lo diko ni na yâ ti Bible.]” Na pekoni lo tënë: “Ambeti so afa aye so Royaume ti Nzapa ayeke sala ande ndali ti e. Mbi pensé so tongana mo diko ni a yeke nzere ande na mo mingi.”
4 Ti sala lakue kusala na akode ti fango tënë so ayeke ngangu pëpe ayeke mû lege na amolenge ti bâ so ala yeke na ngangu ti fa nzo tënë ti Royaume. Na ngoi ti tarango tele, gboto lê ti amolenge ni mingi na ndo salango tënë polele nga na mbeni go so atoto nzoni. Salango tongaso alingbi ti leke ala ti sala tënë nzoni atâa aye nde nde so alingbi ti si. Ti mû maboko na amolenge ti leke tele ti ala nzoni kozoni, nga ti gonda ala na nzobe, ayeke mû maboko na akete molenge ti fa tënë ti mabe ti ala na ambeni zo.
5 Ndali ti mara ti mungo maboko tongaso, amaseka mingi aga awafango tënë so ade ti wara batême pëpe. So tâ ngia ti bâ amolenge ti e so ade kete ayeke gue na li ni na yâ kusala ti fango tënë!—Ps. 148:12, 13.