Fango tënë ti Royaume: mbeni kota matabisi
1 Lâ oko oko, azo kutu mingi ayeke bâ nzoni na peko ti aye so Jéhovah aleke na nzobe ti bata e na fini (Mat. 5:45). Ye oko, a yeke gi mbeni kete wungo ti azo si ayeke kiri singila na Wasalango ala na lege ti fango nzo-tënë ti Royaume ti Nzapa (Mat. 24:14). Mo bâ matabisi so tongana mbeni kota ye?
2 Fango tënë ti Royaume amû gonda na Nzapa na aga na beku na siriri na azo so ayeke bâ pasi na yâ sioni sese ti laso (aHéb. 13:15). Ti azo so ayeda na tënë ni, a ye ti tene fini ti lakue lakue (Jean 17:3). Mbeni kusala ti nginza wa alingbi ti ga na mara ti aye ti nzoni tongaso? Lege so bazengele Paul asala na kusala ti lo ti fango tënë afa biani so lo bâ ni lani tongana mbeni kota ye. Lo bâ ni tongana mbeni mosoro.—Kus. 20:20, 21, 24; 2 aCor. 4:1, 7.
3 E ne matabisi ti e: Mbeni nzoni lege ti fa so e yekia matabisi ti e ti fango tënë ayeke ti bi lê na ndo kode so e yeke sala na ni. E yeke mû ngoi ti leke mbeni li ti tënë so alingbi ti ndu bê ti azo so ayeke mä e? E lingbi ti maï kode ti e ti salango kua na Bible nga na lege so e yeke sala lisoro na azo? E yeke sala kusala na yâ territoire ti e kue? E hinga lege ti to nda ti a-étude na ti ngba ti sala ni? Legeoko na aChrétien be-ta-zo ti ândö nga na ti laso, e yeke na ndoye nga na nzoni bango ndo na ndo kusala ti e.—Mat. 25:14-23.
4 Na ngoi so e yeke luti na gbele aye so lâ ti mbakoro ayeke ga ka na ni, kpale ti seni wala ti ambeni ye nde, a dë bê ti e ti hinga so ngangu kue so e yeke sala ti fa tënë ayeke tâ kota ye biani. Tënë ti Nzapa adë bê ti e so Jéhovah ayeke bâ na nene ni ngangu kue so e yeke sala na yâ kusala ti lo, même ambeni so azo alingbi ti bâ ni tongana akete kete ye.—Luc 21:1-4.
5 Fango tënë ti Royaume ayeke mbeni ye so amû tâ ngia na zo. Mbeni ita-wali so ayeke na ngu 92 atene: “Tongana mbi dabe mbi na kota matabisi so mbi yeke na ni ti sala na Jéhovah na yâ angu 80 so ahon awe, mbi wara vundu oko pëpe! Tongana a kiri mbi maseka, ka mbi yeke soro ti sala gi oko kusala ni, teti ‘nzobe ti Nzapa ayeke nzoni ahon fini’. ” (Ps. 63:4). Zia e nga kue e bâ na nene ni matabisi so alondo na Nzapa: kusala ti fango tënë ti Royaume.