Fini kapa ti kota bungbi ti lango oko

Lê ayeke mbeni ye ti dongo bê (Ps.139:14). Ye oko, lê ayeke sala kusala nzoni gi tongana lo luti gi na ndo ti ye oko. Ye so ayeke tâ tënë biani atâa na lege so zo ayeke bâ ka ye na ni, wala na lege ti fä. Ti tene lê ti e ti yingo abâ ndo polele na aluti gi na ndo ti ye oko, a lingbi bibe ti e kue aluti gi na ndo salango ye so bê ti Nzapa aye. Tongana e yeke bâ lege so sese ti Satan ayeke sala ti maï na aye ti ngia, a yeke tâ na lege ni so kota li ti tënë ti kota bungbi ti e ti lango oko ti ngu ti kusala 2006 ayeke duti ande “Zia lê ti mo angbâ nzoni”!​—Mat. 6:22.

Ye wa a lingbi e sala ti wara adeba-nzoni ti Jéhovah? (aProv. 10:22). Fade e yeke wara akiringo tënë na hundango tënë so na yâ mbage so atene “Ti zia lê ti mo angbâ nzoni aga na aye ti nzoni.” Na lege ti hundango tënë na azo, e yeke bâ ande tongana nyen batango akpengba-ndia ti Bible alingbi ti ga na ye ti nzoni. Kozo diskur ti zo so aga gango ayeke na kota li ti tënë so: “Zia lê ti e angbâ nzoni na yâ mbeni sese ti sioni.” Diskur so ayeke gboto mê ti e ande na ndo ambeni ye so alingbi ti sala si gigi akpengba na e na ague na e yeke yeke ti buba nzoni dutingo ti e na lege ti yingo. E yeke manda nga ande tongana nyen ti soro “ye ti nzoni”.​—Luc 10:42.

Tongana nyen si ababâ na mama wala ambeni zo nde alingbi ti mû maboko na amaseka ti zia na gbele ala aye ti yingo? Mbage so ayeke “Ababâ na mama so apika kondoro ti ala na lege ni” nga na “Apendere so agi ti wara aye ti yingo so ala zia na gbele ala” ayeke fa ande bibe ti amaseka nga na ti ababâ na mama na ndo tënë ni (Ps. 127:4). Ndangba diskur ni so zo so aga gango ayeke mû ayeke fa ande tongana nyen kongregation ti e, sewa ti e wala e mveni e lingbi ti ngbâ ti gue na li ni legeoko na bungbi ti Jéhovah.

Atâa e yeke na yâ ti tâ tënë a ninga mingi pëpe, wala e sala na Jéhovah a sala angu mingi fadeso awe, a yeke kota ye ti tene e kue e bata “lê so ayeke nzoni.” A yeke ye so kota bungbi ti e ti lango oko ayeke mû maboko ande na e ti sala ni.