Kota bungbi ti lango oko: fini programme

Tongana e bâ mbeni fä wala e mä mbeni tënë ti gbotongo mê, me e sala ye hio pëpe, ye so asi na pekoni alingbi ti duti sioni teti e. A yeke même kota ye mingi ti mû peko ti fango lege ti yingo so Jéhovah ayeke mû. Tënë so ayeke sigigi ande polele na yâ kapa ti kota bungbi ti lango oko ti ngu ti kusala so ayeke ga. Kota li ti tënë ni ayeke ‘I sala hange na lege so i yeke mä na tënë’.​—Luc 8:18, Fini Mbuki, 2001.

Na yâ kozo diskur ti lo, wamungo diskur so aga gango ayeke fa ande tongana nyen wango ti Paul na yâ akozo chapitre ti mbeti ti aHébreu so lo sû na gbe ti yingo andu e laso. Na yâ ndangba diskur “E dengi mê ti e lakue na awango ti Nzapa,” lo yeke mû maboko na azo kue ti bâ wala ala yeke mä biani Jéhovah, Molenge ti lo, nga na “ngbâa be-ta-zo na ti ndara”.​—Mat. 24:45, NW.

Ambage mingi na yâ programme ni ayeke duti ande nzoni mingi teti asewa. “Asewa so azia lê ti ala gi na ndo mango tënë ti Nzapa” ayeke mû maboko na e ti sala hange na aye ti sese ti tene e tï pëpe na lege ti yingo. A ndu nga hundango atënë na ala so agbian aye si ala zia na kozo ndo aye ti yingo. “Lege so dengingo mê nzoni na Tënë ti Nzapa ayeke kpengba amaseka ti e” andu nga hundango atënë na amaseka so amû mbage ti tâ tënë na ekole, na gbele amba ti ala wala na fango tënë. “Amolenge so amä Nzapa na amanda ye” ayeke mû ande maboko na e ti bâ senge senge pëpe ngangu so amolenge ayeke na ni ti manda na ye. Hundango atënë na amolenge nga na ababâ na mama ti ala ayeke mû maboko na e ti bâ ye ti nzoni so aga na lege ti fango ye na amolenge na yâ alege ti Jéhovah na ngoi so ala ngbâ kete.

Na ngoi so Satan ayeke ‘handa azo ti sese so kue’, Jéhovah ayeke fa na awakua be-ta-zo ti lo lege so a lingbi ala tambela dä (Apoc. 12:9; Es. 30:21). Ti dengi mê nzoni na wango ti lo na ti mä ni na salango ye alingbi na ni na yâ fini ti e asala si e ga azo ti ndara, amû na e tâ ngia, na ague na e na fini ti lakue lakue.​—aProv. 8:32-35.