E ngbâ ti kpengba tele na popo ti e
1 Bazengele Paul ayeke sala lani ye kue so lo lingbi ti sala ti kpengba amba ti lo wamabe (Kus. 14:19-22). Legeoko na Paul, tongana e bâ so aita ti e ayeke na yâ ti aye ti ngangu, e ye ti mû maboko na ala. Bible afa so a yeke gi pëpe a-ancien, me e kue e lingbi ti bi bê na amba ti e (aRom. 15:1, 2). Zia e bâ alege use so e lingbi ti fa so e yeda na wango so a mû na ndoye, so atene: “I wa tele ti i si bê ti i aga nzoni, i sala na popo ti i si i kpengba.”—1 aThes. 5:11.
2 Gi ti bâ ye so atia aita: Tënë ti Nzapa afa na e so Dorcas “asi na nzo kusala, na lo mû matabisi na azo.” (Kus. 9:36, 39). Lo bâ ye so atia azo na lo yeke sala ye kue so lo lingbi ti sala ti mû maboko na ala. So pendere tapande la lo zia na e! Mo lingbi ti bâ so mbeni ita so aga mbakoro ayeke na bezoin ti tene a mû maboko na lo ti gue na bungbi. Peut-être mo bâ mbeni pionnier aye ti sigigi na fango tënë na peko ti midi, me lo wara zo ti sigigi na lo pëpe. Tongana mo bâ mara ti aye tongaso na mo sala mbeni ye ti mû maboko, a yeke duti ande mbeni ye so alingbi ti mû wâ na aita mingi!
3 Alisoro so akpengba zo: E lingbi nga ti kpengba azo na lege ti tënë ti yanga ti e (aEph. 4:29). Mbeni ancien so ayeke na akode mingi atene: “Tongana mo ye ti kpengba zo, sala lisoro na ndo ti aye ti yingo. Ti to nda ni na mara ti lisoro tongaso, mo lingbi ti hunda mbeni tënë so akpengba pëpe tongana, ‘Mo wara tâ tënë tongana nyen?’ ” Fa na amaseka ti kongregation so mo bi bê na ala. Fa na ala so bê ti ala anze nga na ala so asala kamene so mo bi bê na ala (aProv. 12:25). Zia lege pëpe si salango lisoro na ndo ti ngia ti sese so akanga lege na mo ti sala lisoro na ndo ti aye ti yingo na amba ti mo wamabe.—aRom. 1:11, 12.
4 Ye oko, ye wa mo lingbi ti tënë ti kpengba amba ti mo? Na yâ dikongo Bible nga na mandango ye mo mveni, mo wara ambeni kpengba ndia so asala si ndoye so mo yeke na ni na mbage ti Jéhovah akiri akono? Mo wara mbeni ye so andu bê ti mo na ngoi ti diskur wala ti Tour ti Ba Ndo? Wala mbeni ye so asi na mo so agbu bê ti mo na akpengba mabe ti mo? Na lege ti yingo, aye so kue ayeke tongana mbeni mosoro ti ngele ngangu. Tongana mo bata mosoro so nzoni, mo yeke wara lakue aye so mo lingbi ti kangbi ni na amba ti mo.—aProv. 2:1; Luc 6:45.
5 Ni la, zia e ngbâ lakue ti kpengba tele na popo ti e na lege so e yeke gi ti mû maboko na mba na nga ti sala kusala na ndara na menga ti e.—aProv. 12:8.