Kasete vidéo so agboto lê na ndo kpengba kode ti kaïngo kobela so ato nda ti mû ndo
A-avocat nga na awanganga ayeke bi bê mingi na ndo atënë ti bê nga na adroit ti azo ti kobela. Ye so asara si a maï afini yorö nga na akode so aTémoin ti Jéhovah alingbi ti wara ye ti nzoni dä (Kus. 15:28, 29). A gboto lê na ndo aye so na yâ kasete vidéo Alternatives à la transfusion—le droit et les besoins des patients. E hunda mo ti bâ kasete ni, na pekoni kiri mo bâ aye so mo manda na yâ ni.—Kete tënë: Teti so na yâ kasete ni a fa ambeni kete mbage ti akode ti surungo zo, a lingbi ababâ na mama asara ye na ndara tongana ala yeke bâ kasete ni na akete molenge.
(1) Ngbanga ti nyen ambeni wanganga ayeke kiri ti bâ atënë na ndo mungo mênë na zo? (2) Fa atapande ota ti surungo zo so ahunda kpengba kode ti tene wanganga asara ni, me so a lingbi ti sara ni sân ti tene a mû mênë na zo. (3) Awanganga oke na ndo sese kue afa so ala yeke duti nduru ti kaï kobela na sarango kusala na mênë pëpe? Ngbanga ti nyen ala yeke nduru ti sara tongaso? (4) Ye wa afini mandango ye na yâ ada-nganga afa na ndo sarango kusala na mênë? (5) Akpale wa zo alingbi ti wara tongana a mû na lo mênë? (6) Ye wa mingi ti awakode ti kaïngo kobela atene na nda ni na ndo nzoni ti ayorö so a yeke sara na kusala na place ti mênë? (7) Aye wa ayeke sara si zo ayeke na mênë mingi pëpe? Mênë ti zo alingbi ti kiri na gbe ni juska na ndo wa na zo ni ayeke ngbâ na fini? Ye wa a lingbi ti sara na kusala na place ti mênë? (8) Ye wa a lingbi ti sara ti maï dungo a-globule rouge na yâ tere ti mbeni zo ti kobela? (9) Akode wa a yeke sara na kusala ti kanga lege si mênë ayuru mingi pëpe na ngoi ti surungo mbeni zo? (10) Ayorö so a yeke mû ni na place ti mênë alingbi ti sara kusala nzoni teti amolenge wala azo so ayeke nduru ti kui? (11) Mbeni oko ti akozo kpengba-ndia so andu atënë ti bê ti zo, na so ague oko na nzoni kode ti kaïngo kobela ayeke so wa? (12) Ngbanga ti nyen a yeke kota ye ti tene aChrétien asoro kozoni akode ti kaïngo na kobela ti ala kozo si tënë ti mênë alondo? Tongana nyen e lingbi ti sara ni?
Ti yeda na ambeni kode ti kaïngo kobela so a fa ni na yâ kasete vidéo so ayeke mbeni ye so andu desizion ti zo mveni, so ague oko na yingo-ti-hinga ti zo oko oko so Bible afa lege na ni. Mo mû desizion awe na ndo ayorö so a yeke sara na kusala na place ti mênë so mo yeke nduru ti yeda na ni teti mo mveni nga na amolenge ti mo? A lingbi mo fa nga adesizion ti mo nga na nda ti adesizion so nzoni na asewa ti mo so ayeke aTémoin pëpe.—Bâ “Atënë so azo ahunda”, so ayeke na yâ Tour ti Ba Ndo ti lango 15 ti juin, 2004 nga Tour ti Ba Ndo ti lango 1 ti novembre, 2000.