Bibe ti mungo tere na kusala aga na adeba nzoni
1. Tongana nyen Jéhovah adeba nzoni na ndo ti David na Néhémie ndali ti bibe ti mungo tere ti ala na kusala?
1 Lani so Goliath azonga aturugu ti Israël, mbeni zo ti mû ngangu ti lo ti tiri na lo ayeke pëpe. Me a yeke mbeni kete berger so ahinga kode ti tiri bira pëpe si ayeda ti ga ti tiri na lo (1 Sam. 17:32). Tongana aJuif alondo na ngbâa akiri na Jérusalem me ala leke agbagba ni pëpe, a yeke mbeni zo ti mû ye ti nyon na gbia ti Perse si ayeda ti zia kota ndo ti lo ti gue na Jérusalem ti tene lo leke gere ti kusala ni (Néh. 2:5). Jéhovah adeba nzoni na ndo ti David nga na Néhémie ngbanga ti bibe so ala yeke na ni.—1 Sam. 17:45, 50; Néh. 6:15, 16.
2. Ngbanga ti nyen a lingbi aChrétien afa na gigi bibe ti mungo tere na kusala?
2 Laso, azo ti sese so ayeke pëpe na bibe ti mû tere ti ala mveni na kusala. Na “lâ ti nda ni” so, azo ayeke na aye mingi ti sara, na mingi ti ala ‘andoye tere ti ala mveni’. (2 Tim. 3:1, 2). A yeke ngangu pëpe ti tene mbeni zo abi tere ti lo kue ti sara gi aye so lo ye na ti bâ pëpe alege so azi na lo ti mû maboko na ambeni zo tongana a hunda ti sara ni. Ye oko, e aChrétien, e ye ti mû tapande ti Jésus, so lo duti lani nduru ti mû maboko na azo (Jean 5:5-9; 13:12-15; 1 Pi. 2:21). Tongana nyen e lingbi ti fa bibe ti mungo tere na kusala? Aye ti nzoni wa e yeke wara na pekoni?
3. Tongana nyen bibe ti mungo tere na kusala ayeke sara si abungbi atambela nzoni?
3 Na mbage ti aita ti e: E lingbi ti mû “matabisi ti Yingo” na azo na yengo dä ti kiri tënë na ngoi ti abungbi tongana kapa ni ahunda ti sara tongaso (aRom. 1:11). Akiringo tënë ti e ayeke mû gonda na Jéhovah, ayeke sara si tâ tënë alï ngangu na yâ ti li ti e nga na bê ti e, na ayeke sara nga si abungbi ni anzere na e (Ps. 26:12). E lingbi nga ti mû tere ti e mveni ti sara mbeni devoir na ngoi ti Ekole ti Kusala ti aChrétien tongana ita so a mû lo ti sara ni ayeke dä pëpe. Sarango tongaso ayeke mû ande maboko na e ti maï akode ti e ti fango ye.
4. Na ambeni lege wa e lingbi ti fa so e yeke na bibe ti mungo tere ti e na kusala?
4 Aita-koli alingbi ti fa bibe ti mungo tere ti sara kusala tongana ala gi ti yô akungba na yâ ti kongregation (Es. 32:2; 1 Tim. 3:1). Azo kue alingbi ti mû maboko ti tene akota bungbi atambela nzoni na mungo tere ti ala mveni ti sara kusala na andokua nde nde. Tongana e mû tere ti e mveni ti fa tënë legeoko na surveillant wala ti tisa lo ti te kobe, ye so ayeke sara si “e kue e lingbi kpengba” mba (aRom. 1:12). Tongana e mû maboko biani na amolenge so babâ ti ala ayeke dä pëpe, awomua, azo so ayeke na kobela na awazin, amama so abata amolenge ti ala gi ala oko nga na ambeni ita ti kongregation, e yeke wara ngia, na Jéhovah ayeke yeda na e.—aProv. 19:17; Kus. 20:35.
5. Aye wa so andu aDa ti Royaume ahunda azo ti mû tere ti ala mveni ti sara ni?
5 Mbeni lege so e yeke na ni ti mû ngoi ti e nga na ngangu ti e ayeke ti bata si Da ti Royaume aduti na saleté pëpe. Na ndo ni, teti so azo mingi ayeke ga fadeso na yâ tâ tënë, e yeke na bezoin ti afini Da ti Royaume nga na azo so ayeda na bê ti ala ti leke ada so. Mbeni ita-koli na wali ti lo amû tere ti ala mveni ti mû maboko na Komite ti sarango ada ti bungbi ti kodoro ti ala atâa so ala hinga ye pëpe na ndo akode ti sarango da. Na nda ni, a fa na koli na wali so tongana nyen ti sara ni, na fadeso ala yeke mû maboko na montengo abrique. Wali ni atene: “Ti sara kua na tere ti aita asara si songo ti e akpengba mingi. Na nda ti alango oko oko, e woko na lege ti mitele, me na lege ti yingo e kiri e kpengba.”
6. Ngbanga ti nyen fango tënë ayeke kota kusala so e lingbi ti mû tere ti e mveni ti sara ni?
6 Na lege ti fango tënë: Kota kusala so e lingbi ti mû tere ti e mveni ti sara laso ayeke kusala ti fango tënë ti Royaume. Tongana e mû maboko na azo ti gbu nda ti Bible na ti sara ye alingbi na awango ti yâ ni, ala yeke hinga ngbanga ti nyen ala yeke na fini na ala yeke wara ngangu ti hon ndo ti asioni sarango ye. Ala yeke manda tënë na ndo pendere beku teti kekereke so ayeke na yâ ti Bible. Na fango tënë ti Nzapa na azo, e yeke sara mbeni pendere kusala so ayeke mû na ala aye ti nzoni teti lakue lakue (Jean 17:3; 1 Tim. 4:16). Dutingo ti e alingbi peut-être ti mû lege na e ti mû mbage mingi na yâ kusala so tongana pionnier auxiliaire, pionnier permanent, ti gue na mbeni ndo so bezoin ayeke dä wala ti manda mbeni yanga ti kodoro nde.
7. Ngbanga ti nyen a yeke kota ye laso ti tene e mveni e mû tere ti e ti sara kusala?
7 Gbia David atene na lege ti prophétie so na ngoi ti tongo nda ti komandema ti Messie, fade azo ti Nzapa ayeke ‘mû ala mveni na nzobe’. (Ps. 110:3). Teti so Jéhovah ayeke sara si kusala ti fango le-kobe na lege ti yingo ayeke gue na loro ti hunzi, kusala ayeke mingi ndali ti ala so ayeda ti mû tere ti ala mveni ti sara ni (Es. 60:22). Mo tene: “Mbi yeke, Mo to mbi”? (Es. 6:8). Biani, na fango na gigi bibe ti mungo tere ti e ti sara kusala, e yeke zia ngia na bê ti Jéhovah na e yeke wara aye ti nzoni mingi na pekoni.