Mû tapande ti Kota Wafango ye na ngoi so mo yeke sara kusala na buku Bible afa
1. Jésus afa ye lani tongana nyen?
1 Jésus, Kota Wafango ye, afa ye lakue na mbeni lege so akpengba pëpe nga polele. Ti pusu awamango lo ti gbu li ti ala, na ambeni ngoi lo hunda bango ndo ti ala kozoni (Mat. 17:24-27). Lo gboto lê na ndo Tënë ti Nzapa (Mat. 26:31; Marc 7:6). Lo sara kue ti fa atënë na adisciple ti lo ahon ndo ni pëpe, teti lo hinga so ala ngbâ ti manda ye (Jean 16:12). Jésus abi bê ti lo nga ti hinga wala adisciple ti lo amä na bê na aye so lo fa na ala nga ala gbu nda ni (Mat. 13:51). A leke buku Bible afa ti mû maboko na e ti fa ye legeoko tongaso.
2. Tongana nyen e lingbi ti sara kusala na ahundango tënë so ayeke na tongo nda ti chapitre oko oko?
2 Ahundango tënë ti tongo nda ni: Tongana mo to nda ti mbeni chapitre, a yeke nzoni ti gboto lê na ndo ahundango tënë so ayeke na gbe ti kota li ti tënë ni. Diko ahundango tënë ni ti zingo nzara ti tënë ni na bê ti wamandango ye ni. Wala mo lingbi ti hunda lo ti kiri tënë nduru na ahundango tënë ni. Mo yeke na bezoin pëpe ti fa tënë mingi wala ti leke atënë ti lo oko oko kue so ague kirikiri. Mo lingbi gi ti kiri singila na lo teti bibe ti lo na to nda ti manda ye ni. Tënë ti lo na ndo ahundango tënë so ayeke mû lege na mo ti hinga wala mo yeke na bezoin ti luti mingi na ndo mbeni tënë ti yâ ti ye so ala yeke manda.
3. Tongana nyen ti sara si mandango ye ni ayapu?
3 Aversê: A lingbi mandango ye ni aluti gi na ndo Mbeti ti Nzapa (aHéb. 4:12). Ye oko, a hunda pëpe ti diko aversê kue so a fa tënë ti yâ ni pëpe. Luti gi na ndo ala so ayeke na gunda ti aye so e mä na bê dä. A yeke kota ye pëpe ti diko aversê so afa gi ambeni tënë na ndo ni. Buku Bible afa afa tâ tënë na mbeni lege so akpengba pëpe. Sara lakue si mandango ye ni ayapu. Luti gi na ndo akota tënë ni, na kpe ti sara tënë mingi na ndo anzene nzene tënë wala ti mû mbeni tënë nde ti yôro na yâ lisoro ni senge senge.
4. Nyen ye afa so a yeke nzoni ti mû mbeni ngoi na ngoi ti mandango ye ni ti bâ atënë so ayeke na yâ “Ambeni tënë ti bâ na ndo ni”?
4 Ambeni tënë ti bâ na ndo ni: A wara na yâ mbage so atënë 14 so afa ambeni tënë na ndo akota li ti tënë ni. A yeke na wafango ye ni ti bâ wala a hunda ti sara lisoro dä na ngoi ti mandango ye ni. Ti ambeni tënë ni, mo lingbi ti tene na wamandango ye ni ti diko ni lo mveni, mbilimbili tongana lo gbu nda ti kota li ti tënë ni nga lo yeda na ni. Na tapande, tongana wamandango ye ni amä na bê na Jésus tongana Messie awe, a yeke peut-être kota ye pëpe ti bâ na lo tënë “Jésus Christ: Messie so a fa tënë ti gango ti lo”, na ngoi so ala yeke manda chapitre 4 so atene “Jésus Christ ayeke zo wa?” Na mbeni ngoi nde, a lingbi ti duti nzoni ti mû mbeni ngoi na yâ ngoi ti mandango ye ni ti sara lisoro na ndo “Ambeni tënë ti bâ na ndo ni” wala gi mbage ni.
5. Tongana e soro ti bâ mbeni tënë na yâ “Ambeni tënë ti bâ na ndo ni”, e lingbi ti sara ni tongana nyen?
5 Tongana mo soro ti bâ mbeni tënë na yâ “Ambeni tënë ti bâ na ndo ni”, mo lingbi ti leke ahundango tënë ni kozo na ti diko na lo aparagraphe ni tongana ti so mo sara na chapitre ni. Wala, a lingbi na bezoin ti wamandango ye ni, mo lingbi ti mû kete penze-ngbonga na ngoi ti mandango ye ni ti kiri ti bâ atënë ni na lo. Fade ye so amû lege na mo ti bâ wala lo gbu nda ti tënë so lo mveni lo diko.
6. Tongana nyen e lingbi ti sara kusala na encadré “Ye so Bible afa” na hunzingo ti mandango ye oko oko?
6 Encadré “Ye so Bible afa”: Encadré so ayeke na nda ti chapitre oko oko afa ambeni tënë so mingi ni akiri tënë na ahundango tënë so ayeke na tongo nda ti chapitre ni. Mo lingbi ti sara kusala na atënë so ti kiri ti bâ akota tënë ti chapitre ni. Ambeni wafango tënë abâ so a yeke nzoni ti diko tënë ni oko oko nga peut-être ti diko aversê so a zia na tere ni legeoko na wamandango ye ni. Na pekoni, ala yeke hunda wamandango ye ni ti fa na nduru tënë tongana nyen aversê so afa so tënë ni ayeke tâ tënë. Ye so ayeke mû lege na wafango ye ni ti hinga wala wamandango ye ni agbu nda ti akota tënë ti ye ti manda ni polele, tongana nyen Bible ayeda na atënë ni nga ti hinga wala wamandango ye ni ayeda na atënë ni. A yeke leke nga wamandango ye ni ti sara kusala na Bible ti fa nda ti tâ tënë na ambeni zo.
7. Tongana nyen e lingbi ti sara kusala na buku Bible afa ti sara na kusala ti e?
7 Nzoni lege ti sara kusala ti e ti fango ye na azo na ti sara adisciple ayeke ti mû tapande ti akode ti fango ye ti Jésus (Mat. 28:19, 20). Buku Bible afa alingbi ti mû maboko na e ti sara ni. Sara kusala na ni nzoni ti fa na azo tâ tënë na mbeni lege so ayeke polele, akpengba pëpe na so agbu bê ti ala.