Nzoni ti ahundango tënë ti lembeti 31 ti Réveillez-vous!
1. Kpale wa mingi ti e ayeke wara ni?
1 Mo ye Mbeti ti Nzapa mingi? Na a yeke ngangu na mo ti dabe na anzene nzene tënë ti yâ ni wala ndo so ambeni mbilimbili tënë ni ayeke dä? Mo ye si amolenge ti mo ahinga nzoni akozo gere ti tënë ti Mbeti ti Nzapa? Article so ayeke lakue nze oko oko na lembeti 31 ti Réveillez-vous! alingbi ti mû maboko na amaseka nga na ambakoro ti hinga ye mingi na ndo ti Mbeti ti Nzapa.—Kus. 17:11.
2. Tongana nyen ti sara kusala na ambage so ayeke na lembeti 31 ti Réveillez-vous! ?
2 Tongana nyen mo lingbi ti sara kusala nzoni na article so? Réveillez-vous! ti janvier 2006 atene: “Mû ngoi ti bâ lembeti 31. . . Ambeni tënë ti yâ ni ayeke nzere ande na amolenge; ambeni tënë ni ayeke tara ande hingango ye ti ala so amanda Bible aninga awe. Mbage so asara tënë na ndo ti ngoi ayeke mû ande maboko na mo ti hinga ngoi so azo so Bible asara tënë ti ala aduti na fini nga lawa si akota ye asi. Mbeni mbage ni nga ayeke hunda tënë na ndo ti aye so mo lingbi ti wara akiringo tënë ni na yâ ti Réveillez-vous! ni kue; me a fa mingi ti akiringo tënë na tanga ti ahundango tënë ni na mbeni lembeti ti Réveillez-vous! ni, na a turne ni na gbe ni. Ngbanga ti nyen mo mveni mo gi kiringo tënë na ahundango tënë ni kozo pëpe ti tene na pekoni mo fa ni na ambeni zo? Mo lingbi ti sara kusala na lembeti 31 so ti sara lisoro na ndo Mbeti ti Nzapa na sewa wala na ambeni zo nde.”
3. Nzoni ye wa ambeni sewa awara na lege ti lembeti 31 ti Réveillez-vous! ? Mbage wa si anzere na mo mingi?
3 A nzere na asewa mingi ti mû ambage ti lembeti 31 so ti manda na Mbeti ti Nzapa. Mbeni mama atene: “Mbi na koli ti mbi e bâ so a yeke nzoni ti yôro mbage so a leke ndali ti amolenge na yâ ti mandango Bible ti e na sewa tongaso si a nzere na kete molenge ti e ti wali ti ngu ota. So ngia ti bâ nzerengo tere ti lo na ngoi so lo yeke mû Réveillez-vous! ti lo na ti gi afoto na alembeti ni oko oko kue.” Mbeni babâ na sese ti Brésil atene: “Mbi na Moïse, molenge ti mbi ti koli ti ngu mbasambala, e ye mbage ti Réveillez-vous! so mingi. A mû maboko na lo ti duti kpô, ti gi aversê ni, ti hinga nda ti afoto ni na ti hinga angoi ni.” Ashley, so ayeke na ngu miombe, asû tënë so: “Merci mingi ndali ti mbage so ti Réveillez-vous! A mû lege na mbi ti manda ye mingi na ndo ti Bible.”
4. Tongana nyen asewa alingbi ti sara kusala na lembeti 31 ti Réveillez-vous! ti manda na Bible?
4 Mo lingbi ti mû lembeti 31 ti Réveillez-vous! ti manda na Bible ngoi na ngoi na sewa ti mo? Mo lingbi ti sara kusala na Index wala Watchtower Library na ndo ti CD ti gi akiringo tënë na ambeni tënë so akpengba. Na sarango tongaso, mo yeke fa na amolenge ti mo tongana nyen ti gi nda ti aye. Tongana mo yeke na akota molenge, mo lingbi ti hunda ala ti tene kozo ti to nda ti manda ye na sewa, ala gi akiringo tënë na mbage so a hunda ti gi ti hinga zo so a sara tënë ti lo wala na mbage so a hunda ti gi ti hinga ngoi wa ambeni ye asi. Ala lingbi ti fa na ngoi ti mandango ye ni ye so ala wara. Ti sara kusala nzoni na lembeti so ayeke mbeni lege ti tene ababâ na mama ayôro Tënë ti Nzapa na yâ bê ti amolenge ti ala, ti mû maboko na ala ti hinga “Mbeti ti nzoni-kue ti Nzapa” na ngoi so ala ngbâ kete.—2 Tim. 3:15; Deut. 6:7.