A gboto lê mingi na ndo Bible ahon ti kozo!
1. Na tongo nda ni a sigigi na Tour ti Ba Ndo kozoni ndali ti azo wa? Na L’Âge d’Or ayeke ti lo teti azo wa?
1 Na 1 octobre 1919, a sigigi na kozo numéro ti périodique so a hiri ni L’Âge d’Or. A yeke lani mbeni kpengba gbakuru teti kusala ti fango tënë. Ngbanga ti nyen? Ngbanga ti so a sigigi lani na L’Âge d’Or ndali ti azo kue. Ye oko, ti Tour ti Ba Ndo a yeke lani tongaso pëpe ndali ti so teti angu mingi a bâ ni tongana mbeni mbeti so a sigigi na ni gi ngbanga ti “kete kundu”. (Luc 12:32). Awafango tënë ti Royaume awara lani fini mbeti so na ngia na bê, na teti angu mingi wungo ti L’Âge d’Or so a kangbi ni ayeke mingi ahon ti Tour ti Ba Ndo.
2. Iri ti L’Âge d’Or ayeke nyen laso? Na a sigigi na ni ndali ti nyen?
2 A sigigi na L’Âge d’Or ti fa na azo so tâ yorö ti akpale ti ala ayeke Komandema ti Ngu Saki Oko ti Christ, so ayeke ga ande biani na azo mbeni pendere ngoi. Na angu so aga na pekoni, a gbian ambeni ye na yâ ti L’Âge d’Or ti tene a lingbi na dutingo ti azo na ngoi ni so. Na ngu 1937 iri ti L’Âge d’Or agbian aga Consolation. A si na ngu 1946 lo ga Réveillez-vous!, iri so e hinga na ni laso.
3. Réveillez-vous! ayeke mbeni kpengba gbakuru ti kusala na yâ gango tâ tënë ti prophétie wa?
3 Na tongo nda ni, périodique so amû maboko mingi na yâ kota kusala ti fango tënë so a to nda ti sala ni ngbele ye na ngu 1919 (Mat. 24:14). Ye oko, teti so ngoi ti e ayeke mbeni ngoi so a hunda ti sala ye hio, a bâ so a yeke na lege ti ndara ti tene a kiri a gbian ambeni ye na yâ ti Réveillez-vous!
4. (a) Ye wa a hunda na mbeni zo ti sala, ti tene a honde lo na “lâ ti ngonzo” ti Jéhovah? (b) Na lege ti Apocalypse 14:6, 7 ye wa “ange [so] ayeke hulu na nduzu” ahunda na azo kue ti sala?
4 Azo kutu mingi aye ti diko Réveillez-vous! ndali ti so a yeke sala tënë na ndo ti aye nde nde so ayeke na yâ ti Bible pëpe na mbeni lege so anzere mingi na azo. Biani mingi ti azo so ayeke ga na Mémorial na yâ ngu oko oko ayeke azo so ayeke diko ka Réveillez-vous! Ye oko, tongana mbeni zo aye ti wara beku ti tene a honde lo na “lâ ti ngonzo” ti Jéhovah, lo yeke na bezoin ti tene a mû maboko mingi na lo ahon gi ti duti mbeni zo so ayeke diko gi ambeti ti e lakue.—Soph. 2:3; Apoc. 14:6, 7.
5. (a) A to nda ni na janvier 2006, ye wa Réveillez-vous! ayeke gboto lê ande na ndo ni mingi? (b) Ye wa azo mingi alingbi ti sala ni ande, na ye so ayeke gue legeoko na gango tâ tënë ti prophétie wa?
5 Tongaso, a to nda ni na janvier 2006, Réveillez-vous! ayeke gboto ande lê mingi na ndo Royaume ti Nzapa. Fade a yeke fa na azo polele so Bible ayeke ndo ti wara yorö ti akpale ti ala, nga a yeke gboto lê ti azo mingi na ndo lege so Bible ayeke fa nda ti aye so asi na ngoi ti e. Na salango tongaso, awadikongo ni ayeke gbu ande nzoni mingi nda ti aye so ayeke si na ngoi ti e, na peut-être ye so ala diko ayeke pusu ande ala ti manda ye mingi na ndo Jéhovah.—Zach. 8:23.
6, 7. (a) A yeke leke ande Réveillez-vous! tongana nyen ti tene a mû maboko na azo mingi ti sala ye alingbi na 1 aThessalonicien 2:13? (b) Fade Réveillez-vous! ayeke sigigi ande fani oke na yâ ti nze oko, na fade gbiango ye so ayeke ndu ayanga ti kodoro oke?
6 Réveillez-vous! ayeke ngbâ lakue ti fa ye ande na ndo atënë so agbu bê ti azo mingi. Ye oko, a yeke gboto ande lê mingi na ndo ti Bible (1 aThes. 2:13). Teti so a yeke wara na yâ Tour ti Ba Ndo atënë so gunda ni aluti mingi na ndo ti Bible, na so a yeke sala ande tongaso na Réveillez-vous! nga, a bâ so a yeke kota ye mingi pëpe ti ngbâ ti sigigi na Réveillez-vous! fani use na yâ ti nze oko. Tongaso, a to nda ni na janvier 2006, numéro ti Réveillez-vous! ayeke sigigi gi fani oko na yâ nze oko. Fade ye so ayeke yapu kusala ti lekengo ni, ti kiringo pekoni na mbeni yanga ti kodoro nde nga na ti tokuango ni.
7 Tongana a mû ayanga ti kodoro 100 so Réveillez-vous! ayeke sigigi dä, gbiango ye so ayeke ndu ayanga ti kodoro 40 na popo ni. Na ambeni yanga ti kodoro mingi Réveillez-vous! ayeke sigigi fadeso fani oko na yâ nze oko wala fani oko na yâ nze ota. Gbiango ye so ayeke ndu ande Tour ti Ba Ndo pëpe.
8. Tongana nyen awafango tënë alingbi ti sala kusala na Réveillez-vous! legeoko na Tour ti Ba Ndo?
8 Awafango tënë alingbi ande ti fa Réveillez-vous! legeoko na anuméro ti Tour ti Ba Ndo so angbâ ti lo ti sigigi fani use na yâ nze oko. Azo so ayeke kangbi Réveillez-vous! ayeke wara ande lege ti sala kusala gi na numéro oko na yâ nze ni kue sân ti gbian yâ ti atënë ti ala tongana ti so e yeke sala fadeso.
9. Kusala wa Réveillez-vous! ayeke ngbâ lakue ti sala ni ande?
9 Ngbele ye so lo sigigi na ngu 1919, périodique so a hiri ni L’Âge d’Or, na pekoni Consolation nga fadeso Réveillez-vous! asala kota kusala mingi na yâ fango tënë. E yeke sambela Jéhovah ti tene lo ngbâ ti hiri deba nzoni na ndo kangbingo Réveillez-vous! so a yeke gbian kode so a leke na ni. Na e hinga so a yeke ngbâ ti mû ande maboko na azo mingi na popo ti “amara kue, ti akete mara kue, ti azo nde nde kue, na ti yanga nde nde kue” ti bi lê ti ala na mbage ti Royaume ti Jéhovah teti a yeke gi oko beku ti ala.—Apoc. 7:9.