Mo lingbi ti mû ‘kota lege so a lungula na mo ti sara kusala’?
1. “Kota lege” wa azi na e “ti sara kusala”?
1 Tongana “kota lege” azi lani na bazengele Paul “ti sara kusala,” lo londo fade fade ti gbu ngoi so ti fa tënë ti Royaume na azo atâa so azo mingi ake lo (1 aCor. 16:9). Laso, awafango tënë 642 000 tongaso na ndo lê sese kue amû kota lege so azi na ala ti sara kusala ti pionnier permanent.
2. Ngbanga ti nyen a yeke nzoni ti tene e bâ dutingo ti e ngoi na ngoi?
2 Dutingo ti e alingbi ti gbian: Atâa so dutingo ti e laso alingbi ti kanga lege na e ti sara ye mingi, aye alingbi ti gbian. Ni la, a yeke nzoni e bâ ngoi na ngoi dutingo ti e na ti ku pëpe ti tene aye aga nzoni si (Zo-ti. 11:4). Mo ga nduru ti hunzi mandango-mbeti ti mo na lycée awe? Ngu ti amolenge ti mo alingbi awe ti gue na ekole? Mo ga nduru ti mû retraite awe? Agbiango ye so alingbi ti mû na mo ngoi, na tongaso mo lingbi ti mû kusala ti pionnier permanent. Mbeni ita-wali ti ngu 89 so awara kozo angangu kpale ti seni ayeda ti ga pionnier permanent. Ngbanga ti nyen? Teti a sara ngu oko lo gue na da-nganga pëpe, lo bâ so seni ti lo amû lege na lo ti mû kusala ni.
3. Aye wa ambeni ita agbian na yâ fini ti ala ti ga pionnier permanent?
3 Ti Paul, lo ye kozoni ti gue ti bâ aita na Corinthe. Ye oko, lo gbian yâ ti kapa ti lo ndali ti nzo tënë. Mingi ti aita so ayeke apionnier permanent laso agbian aye mingi ndali ni. Ambeni azia ti sara ambeni ye so ala yeke sara kozo ti sara mbeni kua so ahunda ngoi mingi pëpe ti wara na aye so ala yeke na bezoin ni. Bê ti ala anzere na kusala ti ala ti pionnier ni (1 Tim. 6:6-8). Ti ambeni so asara mariage awe, ala gbian aye na yâ dutingo ti ala ti tene gi koli ni si asara kua ti nginza, na tongaso wali ni alingbi ti ga pionnier.
4. E lingbi ti sara nyen tongana e bâ so e lingbi peut-être pëpe ti wara ngbonga so a hunda na apionnier permanent?
4 Tene hio pëpe so mo lingbi pëpe ti mû kusala ti pionnier ngbanga ti so mo sara mbeto ti wara angbonga ni pëpe. Gi ngbonga use lango oko oko alingbi. Tongana mo bâ so mo lingbi ti sara ni pëpe, tara ti mû kusala ti pionnier auxiliaire nze oko wala use na bibe ti wara ngbonga 70. Ye so ayeke mû lege na mo ti hinga nzerengo ti kusala ti pionnier (Ps. 34:9). Sara lisoro na ala so ayeke apionnier na ndembe so. Peut-être ala wara lege lani ti hon ndo ti mara ti akpale so mo yeke na ni (aProv. 15:22). Hunda Jéhovah ti iri tënë nzoni na ndo ngangu so mo sara ti kono yâ ti kusala ti mo.—1 Jean 5:14.
5. Kusala ti pionnier permanent aga na aye ti nzoni wa?
5 Kusala so aga na aye ti nzoni: Ti mû kusala ti pionnier permanent aga na aye ti nzoni mingi. A yeke mû lege na mo ti bâ kota ngia so zo ayeke wara tongana lo mû ye mingi (Kus. 20:35). Kusala ti pionnier ayeke maï ande kode ti mo ti fango tâ tënë so ayeke na yâ ti Bible nzoni (2 Tim. 2:15). Lege ayeke zi ande na mo mingi ti bâ maboko ti Jéhovah na ndo kusala ti mo (Kus. 11:21; aPhil. 4:11-13). Kusala ti pionnier ayeke mû nga ande maboko na mo ti duti na asarango ye so a hunda na Chrétien ti duti na ni, tongana gbungo ngangu. A yeke sara nga si mo ga nduru na Jéhovah mingi ahon ti kozo (Jacq. 4:8). Mo lingbi ti mû kota lege so azi na mo ti sara kusala na ti ga pionnier permanent?