Vorongo Jéhovah na sewa
1 Giriri, azo ti sewa oko kue ayeke sara kusala oko. Ala yeke sara akusala ti yâ ti da, me kozo ni kue ala bungbi na sewa ti voro Jéhovah (Lév. 10:12-14; Deut. 31:12). Laso, na ando mingi, asewa ayeke mû ngoi mingi pëpe ti duti ti sara kusala oko. Ye oko, aChrétien ahinga nene ti sara kusala oko na sewa, mbilimbili tongana andu tënë ti vorongo Nzapa. Bâ tongana nyen tënë ni anzere na Lingu ti sewa ti bâ asewa abungbi oko ti voro lo!
2 Fango tënë legeoko: Ti fa nzo tënë legeoko na sewa ayeke kpengba kamba ti songo so ayeke na yâ ti sewa ni. Na ndo fango tënë na ambeni zo na yâ ti kongregation, a yeke nzoni ancien afa nga tënë na wali ti lo nga na amolenge ti lo (1 Tim. 3:4, 5). Atâa so ala yeke na aye mingi ti sara, asurveillant so ague na ndo nde nde ayeke soro nga ngoi ti fa tënë legeoko na awali ti ala.
3 Ababâ na amama so ayeke fa tënë na amolenge ti ala alingbi ti mû maboko na ala ti ga anzoni wafango nzo tënë. Amolenge ni ayeke bâ pëpe gi ngia so ababâ na amama ti ala ayeke na ni, me nga ala yeke bâ so ababâ na amama ti ala ayeke fa ndoye ti ala na mbage ti Jéhovah nga na ti azo (Deut. 6:5-7). Nene ti sarango kusala so ayeke kiri na gbe ni pëpe tongana amolenge ni aga kota. Mbeni koli na wali so ayeke na amolenge-koli ota, so ngu ti ala alondo na 15 ti si na 21, angbâ ti gue na ala lakue na fango tënë. Babâ ni atene: “E yeke fa na ala mbeni ye lakue. E sara kue ti tene ngoi ni anzere na akpengba ala.”
4 Lekengo tere legeoko: Asewa mingi abâ so a yeke nzoni ti leke tere ti fa tënë legeoko. Mingi ni amolenge aye ti tara peko ti aye so alingbi ti si na fango tënë: ti tene mbeni asara ye tongana wafango tënë, mbeni aduti tongana zo so amä tënë ni, na ala yeke changé tere. Ambeni sewa ayeke mû kete penze-ngbonga na peko ti mandango ye ti ala ti sara ni.
5 Ngia ti e ayeke kono tongana e na azo so e ndoye ala e bi tere ti e na yâ kota kusala so, so amû ngia mingi. A nzere mingi tongana mbeni sewa kue afa tënë legeoko da na da, a sara avizite na a-étude! Tongaso, tongana mo yeke voro Jéhovah na sewa ti mo, mo lingbi ti tene na ngia: “Me mbi na azo ti da ti mbi, fade e sara na L’Eternel [“Jéhovah,” MN ].”—Jos. 24:15.