Sara kue ti to nda ti étude na azo so e yeke zia lakue apériodique na ala
1. Ngbanga ti nyen bungbi ti Jéhovah awa awafango tënë ti zia apériodique lakue na azo so aye ka ti diko ambeti ti e?
1 Azo mingi aye pëpe ti tene e manda Bible na ala, me a yeke nzere na ala mingi ti diko apériodique ti e. Ni la, a sara angu mingi awe la bungbi ti Jéhovah awa awafango tënë ti ngbâ ti zia apériodique lakue na azo so e yeke zia ka ni na ala. Tongana azo ayeke diko ambeti ti e lakue, mingi ni yengo so ala yeke ye na Bible ayeke kono (1 Pi. 2:2). Mbeni lâ, mbeni ye so ala diko ni alingbi ti ndu bê ti ala, nga a yeke pusu ala ti manda Bible.
2. Tongana nyen la e lingbi ti maï nzara ti tâ tënë na bê ti azo so e yeke mû ka apériodique na ala?
2 ‘Tuku ngu’ na ndo ti angongoa ti tâ tënë: Ahon ti zia apériodique na zo ni na ti hon hio, tara ti sara lisoro na lo nga gi ti sara kamarade na lo. Ye so a yeke mû maboko na mo ti hinga dutingo ti lo, aye so agbu bê ti lo, nga na aye so lo mä na bê na ni, tongaso a yeke mû ande lege na mo ti sara tënë na lege ti ndara (aProv. 16:23). Leke tere ti mo teti avizite ni oko oko kue. Tongana lege ayeke dä, sara nduru tënë na ndo ti mbeni kota tënë ti yâ ti apériodique ni oko nga diko mbeni versê oko, ti tuku ngu na ndo ti angongoa ti tâ tënë so ayeke na yâ ti bê ti lo (1 aCor. 3:6). Sû na mbeti lango ti avizite oko oko so mo sara, mbeti so mo zia na lo, atënë nga na aversê so ala sara lisoro na ndo ni.
3. A lingbi e kiri fani oke ti bâ azo so e yeke zia ka lakue apériodique na ala?
3 A lingbi e kiri fani oke? A lingbi e kiri fani oko na yâ ti nze oko ti mû na azo ni afini périodique. Ye oko, e lingbi ti soro ti kiri fani mingi tongana dutingo ti e amû lege na e ti sara ni nga tongana zo ni ayeke na nzara ti mä e. Na tapande, yenga oko wala use na peko ti so e zia apériodique ni, e lingbi ti kiri ti tene: “Mbi ga ti fa na mo mbeni ye na yâ ti apériodique so mbi zia lani na mo so.” Sarango tongaso ayeke pusu zo ni ti diko mbeni article ti yâ ti ambeti ni. Me tongana lo diko ni kozo awe, e lingbi ti hunda lo na ye so lo pensé na ndo ti article ni nga e sara nduru lisoro na ndo ni. Tongana a yeke nzere ka na lo mingi ti diko ambeti ti e, e lingbi ti kiri ti mû na lo tract, brochure, wala buku so e yeke sara na kusala na yâ ti nze ni.
4. Ngoi na ngoi, nyen la e lingbi ti sara ti bâ wala azo so e yeke zia ka na ala apériodique ayeke na nzara ti manda Bible?
4 Ku pëpe ti tene zo ni la ahunda na mo ti manda Bible na lo. Mû li ni kozo. Même tongana lo ke ti manda Bible ândö, mo lingbi ti sara kusala ngoi na ngoi na article “Kiringo tënë na ahunda ti azo” so ayeke na yâ ti Tour ti Ba Ndo na ti bâ wala lo yeke na nzara ti sara lisoro na mo na ndo ni. Peut-être mo lingbi ti to nda ti mbeni étude na lutingo ni na nduzu. Me, tongana mo wara lege pëpe ti to nda ti mbeni étude, a lingbi mo ngbâ lakue ti ga na lo apériodique ti maï nzara ti tâ tënë na bê ti lo.