Mbeni nzoni ye ti zia na gbele e teti fini ngu ti kusala so
1. Ye wa e lingbi ti bi bê na ndo ni ti sara na fini ngu ti kusala so?
1 A lingbi e zia na gbele e aye ti sara tongana e ye ti gue na li ni na lege ti yingo. Aye wa e zia na gbele e ti sara na fini ngu ti kusala so? Mbeni nzoni ye ni ayeke ti mû kusala ti pionnier auxiliaire teti nze oko wala mingi. Teti pendere kusala so ahunda mingi ni ti leke ambeni ye kozoni, a yeke fadeso ngoi ti komanse ti leke tere. Ngbanga ti nyen ti bâ kusala ti pionnier auxiliaire tongana mbeni ye ti zia na gbele e ti sara?
2. Ngbanga ti nyen ti gi ti mû kusala ti pionnier auxiliaire?
2 Nda ti mungo kusala ti pionnier auxiliaire: Ti sara kusala ti pionnier auxiliaire ayeke mû lege na e ti zia ngia na bê ti Babâ ti e ti yayu “nzoni ahon” ti kozo na mungo ngoi mingi na fango tënë (1 aThes. 4:1). Tongana e bâ aye kue so Jéhovah asara ndali ti e, bê ti e ayeke pusu e ti sara tënë ti lo na azo (Ps. 34:2, 3). Jéhovah abâ nga lo mû na nene ni aye kue so e yeke sara ti tene e fa tënë mingi (aHéb. 6:10). Ti hinga so bê ti Jéhovah anzere ndali ti ngangu kusala ti e aga na e kota ngia.—1 Chron. 29:9.
3, 4. Tongana nyen kusala ti pionnier auxiliaire asara nzoni na e?
3 Lakue tongana zo asara mbeni kusala fani mingi, kusala ni ayeke yapu lakue na lo nga a yeke nzere ti sara ni. Mungo ngoi mingi na fango tënë ayeke sara si mo yapu ti fa tënë da na da. Mo yeke wara kode mingi ti to nda ti lisoro na azo nga ti sara kusala na Bible. Tongana mo fa tënë ti mabe ti mo na Nzapa mingi na azo, fade mabe ti mo akpengba mingi. Azo mingi so ândö ahinga ti sara étude na azo pëpe awara lege fadeso ti sara ni na ngoi so ala mû kusala ti pionnier auxiliaire.
4 Kusala ti pionnier auxiliaire alingbi nga ti duti mbeni ye ti mû ngangu na zo ti zingo na lege ti yingo. Mbeni ngbene pionnier permanent abâ so lo mû ngoi mingi na kusala ti lo ti mitele, na tongaso lo yeda ti mû kusala ti pionnier auxiliaire teti nze oko. Lo tene: “Bê ti mbi apika mingi ti bâ so nze oko ti kusala so amû ngangu na mbi na lege ti yingo! Mbi leke ti mû kusala ti pionnier auxiliaire lakue lakue, ye so amû lege na mbi ti kiri fadeso na yâ kusala ti pionnier permanent.”
5. Na lege wa e lingbi ti wara ngangu ti hon ndo ti mbeto?
5 Hongo ndo ti akpale: Ambeni alingbi ti sara mbeto ti mû kusala ti pionnier auxiliaire ngbanga ti so ala bâ atene kode ti fa tënë nzoni atia ala. Tongana a yeke tënë ni la, hinga so Jéhovah alingbi ti mû maboko na mo tongana ti so lo sara na Jérémie giriri (Jér. 1:6-10). Atâa so Moïse alingbi “sara tënë fade pëpe,” na “menga ti [lo] ane”, Jéhovah amû lo ti sara kusala ti Lo (Ex. 4:10-12). Tongana mo bâ so mo lingbi pëpe, sambela Jéhovah ti mû ngangu na mo.
6. Tongana nyen ti wara lege ti mû kusala ti pionnier auxiliaire atâa kpale ti seni wala ti kusala?
6 Mo yeke gi bê ti mo na ndo mungo kusala ti pionnier auxiliaire ndali ti tënë ti songo tere wala kusala so mo yeke na ni mingi? Tongana mo yeke wazin, sarango ye alingbi na ngangu ti mo alingbi ti mû lege na mo ti ga pionnier auxiliaire. Tongana kua ahon ndo ti mo si ngoi ayeke na mo pëpe, mo lingbi ti bâ so mo lingbi ti zia ambeni kusala so ane mingi pëpe na mbeni nze nde. Ti ambeni so ayeke sara kua ngoi kue awara ngoi ti sara kusala ti pionnier auxiliaire na lege so ala zia ti sara kua ti mitele teti lango oko wala use.—aCol. 4:5.
7. Ngbanga ti nyen a yeke nzoni ti sara tënë ti gango pionnier auxiliaire na yâ sambela?
7 Lege ti sara ni: Fa tënë ti ye so mo ye ti sara na Jéhovah na yâ sambela. Hunda lo ti iri tënë nzoni na ndo ngangu so mo sara ti kono yâ ti kusala ti mo (aRom. 12:11, 12). Lo lingbi ti mû maboko na mo ti wara ndara ti mû nzoni desizion na ndo lege ti leke yâ ti kapa ti mo (Jacq. 1:5). Tongana mo yeke na nzara ti kusala ni pëpe, hunda lo ti sara si mo wara ngia na yâ kusala ti fango tënë.—Luc 10:1, 17.
8. Tongana nyen tongana mo sara ye alingbi na aProverbe 15:22 mo yeke wara lege ti mû kusala ti pionnier auxiliaire?
8 Zia mo na azo ti da ti mo abâ tongana nyen ti ga pionnier auxiliaire (aProv. 15:22). Peut-être mbeni oko ti sewa ti mo alingbi ti mû kusala ni grâce na mungo maboko ti tanga ti azo ti da ni. Sara tënë ti nzara ti mo ti mû kusala ni na ambeni zo ti kongregation ti mo, mbilimbili ala so dutingo ti mo na ala ayeke oko. Ye so alingbi dü na yâ ti mo nzara ti mû kusala ti pionnier auxiliaire.
9. Anze wa mo lingbi ti soro ti mû kusala ti pionnier auxiliaire?
9 Tongana mo kiri mo bâ kapa ti fango tënë ti mo ti fini ngu ti kusala so, lawa si mo lingbi ti mû kusala ti pionnier auxiliaire? Tongana mo yeke sara kua ngoi kue wala mo ngbâ ti sara ekole, mo lingbi ti bâ anze so lango ti wungo tere ayeke dä wala so ayeke na samedi oku wala dimanche oku. Na tapande, nze ti septembre, décembre, mars na août ayeke na samedi na dimanche oku oku. Nze ti mai ayeke na samedi oku, na nze ti juin ayeke na dimanche oku. Tongana mo yeke na kpale ti seni, bâ anze so ndowâ wala dê ayeke mingi pëpe. Mo lingbi nga ti mû kusala ti pionnier auxiliaire na nze so surveillant ti circonscription ayeke sara kusala na kongregation ti mo. Na ngoi ti kusala ti lo, mo lingbi ti wara lege ti duti na kozo mbage ti bungbi so lo yeke sara na apionnier permanent. Teti so Dango bê na kui ti Seigneur ayeke tï na lango 22 ti mars, nze ti mars, avril na mai ayeke mbeni nzoni ngoi ti mû kusala ti pionnier auxiliaire. Na peko ti so mo soro awe nze oko wala anze so mo ye ti sara na kusala ti pionnier, sû ni na mbeti-kapa si amû maboko na mo ti wara ngbonga so a hunda.
10. Ye wa mo lingbi ti sara tongana mo lingbi pëpe ti mû kusala ti pionnier auxiliaire?
10 Tongana mo bâ so mo lingbi pëpe ti mû kusala ti pionnier auxiliaire na ngu ti kusala so ayeke ga, mo lingbi ti ngbâ lakue ti fa tënë na ngangu ti mo kue. Ngbâ ti sara ye so mo lingbi ti sara na fango tënë, na hingango so bê ti Jéhovah ayeke nzere na nzo kusala so mo sara na lo na âme ti mo kue (aGal. 6:4). Duti nduru ti mû maboko na ti wa ala so ayeke sara kusala ti pionnier auxiliaire. Peut-être mo lingbi ti gbian yâ ti kapa ti mo si mo wara mbeni lango na yâ ti yenga ti fa tënë na ala so ayeke apionnier.
11. Ngbanga ti nyen a lingbi e duti na bibe ti sara ye hio?
11 Awakua ti Jéhovah ayeke na bibe ti sara ye hio. Mbeni kusala ti hunzi ni ayeke dä: a yeke fango nzo tënë. A yeke tënë ti fini ti azo, na ngoi ayeke mingi pëpe (1 aCor. 7:29-31). Fade ndoye ti e na mbage ti Nzapa nga na mbage ti azo ayeke pusu e ti sara ye kue so e lingbi ti sara na fango tënë. Tongana e sara ngangu nga e leke nzoni kapa, e lingbi ti wara lege ti mû kusala ti pionnier auxiliaire kamême nze oko na fini ngu ti kusala so, mbeni nzoni ye ti sara biani!