Fa na gigi anzoye ti Jéhovah
1. Ye nyen apusu e ti fa na gigi anzoye ti Jéhovah?
1 “O L’Eternel, kota ndo, na ngangu, na gloire, na kozo ndo, na yango-iri kue ayeke ti Mo. Ye kue so ayeke na ayayu na ye kue na sese ayeke ti Mo.” (1 Chron. 29:11). Tongana nyen ndoye nga na singila ti e teti Jéhovah asara ngangu na ndo ti e? A pusu e ti “fa nzoye ti Lo so airi [e] ti sigigi na yâ bingo si [e] ga na yâ lumière ti Lo so ayeke ye ti kpene.” (1 Pi. 2:9). E lingbi pëpe ti kaï ti sara tënë na azo na ndo kota Nzapa ti e! E yeke wara ande apendere lege ti fa anzoye ti Jéhovah na nze ti mars, avril na mai.
2. A leke kota kapa wa ti tisa azo na Mémorial? Zo wa alingbi ti mû mbage dä?
2 Kota kapa ti tisango azo na Mémorial: Na lundi lango 2 ti avril, fade e yeke luti mingi na ndo anzoye ti Jéhovah na sarango Matanga ti Kobe ti Seigneur. A yeke kangbi mbeni mbeti ti tisango zo na kota matanga so na ndo lê sese kue ti londo na lango 17 ti mars ti si na lango 2 ti avril. A wa azo kue ti mû mbage dä mingi. So ayeke duti ande mbeni nzoni ngoi ti tene afini zo ato nda ti fa nzo tënë tongana a bâ so ala lingbi. Tongana azo so mo yeke manda Bible na ala wala amolenge ti mo alingbi ti fa tënë, gue mo sara tënë ni na a-ancien.
3. E lingbi ti tene nyen na azo ti tisa ala na Mémorial?
3 Kapa so ayeke tambela ande tongana ti so a sara teti Kota Bungbi ti District “A ga nduru ti zi e awe!” A yeke tokua na akongregation ambeti ti tisango zo so mingi tongaso wafango tënë oko oko alingbi ti wara ni 50, na pionnier oko oko alingbi ti wara ni 150. Sara gi nduru tënë, peut-être mo tene: “E tisa mo na lege ti mbeti so ti ga na mbeni kota matanga so e yeke sara ngu oko oko. E yeke duti ande na ngia ti bâ mo. Mbeti ni afa atënë kue na ndo ni.” Biani, tongana zo ni ayeke na ambeni hundango tënë, mû ngoi ti kiri tënë na lo dä. Atënë so ato nda ni na lembeti 206 ti buku Bible afa alingbi ti mû maboko na e ti sara ni. Na anda-yenga, e yeke fa apériodique ti nze ni legeoko na mbeti ti tisango zo so. Mû note ti azo kue so asara nzara ti tënë ni, na leke ti kiri ti bâ ala.
4. A yeke kangbi ande ambeti ti tisango zo na Mémorial tongana nyen?
4 Tongana lege ayeke dä, a yeke nzoni ti mû mbeti ni na zo so e wara lo na da ti lo. Tongaso, sû note ti azo so mo wara ala na kodoro pëpe, na gi lege ti kiri ti bâ ala mbeni lâ. Akongregation so ayeke na mbeti ti tisango zo mingi alingbi ti zia ni na yanga-da ti azo so ayeke dä pëpe na tanga ti yenga so aga kozo ti Memorial ni, me kozoni na so pëpe. Girisa pëpe ti zia mbeti ni na avizite ti mo, a-étude ti mo, afami, amba ti mo ti place ti kua, avoizin nga na ambeni zo so mo hinga ala.
5. Ngbanga ti nyen ti leke tere fadeso ti mû kusala ti pionnier auxiliaire?
5 Kusala ti pionnier auxiliaire: Mo lingbi ti fa anzoye ti Jéhovah mingi ahon ti kozo na mungo kusala ti pionnier auxiliaire na nze ti mars, avril na mai? Peut-être sarango tongaso ayeke hunda na mo ti gbian ambeni ye na yâ kapa ti mo ti lâ oko oko (aEph. 5:15-17). Zia mo hinga so tongana mo sara ngangu ti sara mingi na yâ kusala ti Jéhovah, a yeke ga na mo ngia nga na deba nzoni ti lo (aProv. 10:22). Teti ngoi ti Mémorial ayeke pusu nduru, a yeke fadeso ngoi ti leke tere ndali ni.—aProv. 21:5.
6. E manda nyen na ndo tapande ti ita-wali ti ngu 90 so amû kusala ti pionnier auxiliaire na ngu so ahon?
6 Mbeni ita-wali ti ngu 90 amû kusala ti pionnier auxiliaire na ngu so ahon. Lo tene: “Atâa so mbi ye kua ti yaka mingi na mbi ye ti komanse ti lu ye, mbi bâ so a yeke nzoni mbi zia anzoni ye na kozo ndo. Teti mbi ye ti zia Royaume na kozo ndo, mbi mû kusala ti pionnier auxiliaire na nze ti mars.” Lo wara futa ti peko ti kusala ti lo? Lo tene: “Mbi bâ so mbi yeke nduru mingi na kongregation, na ye so apusu mbi nduru mingi na Jéhovah.” E lingbi ti bâ akusala ti e na ti gbian aye so ahunda ti sara ye legeoko tongana ita-wali so?
7. A yeke ngangu ti mû kusala ti pionnier auxiliaire?
7 Ti sara angbonga 50 ti pionnier auxiliaire a yeke peut-être ngangu pëpe tongana ti so mo pensé. Sara tënë ti akusala ti mo ti lâ oko oko na yâ sambela, leke mbeni kapa, na sû ni na yâ programme ti kusala ti mo ti Chrétien. Mo oko mo hinga dutingo ti mo nzoni. Tongana mo yeke na nzoni seni pëpe, nga mo yeke na ngangu mingi pëpe, peut-être mo lingbi ti fa tënë ngbonga use lâ oko oko. Tongana mo yeke sara kua ti nginza ngoi kue wala mo yeke gue na da-mbeti, mo lingbi ti sara kusala ti pionnier auxiliaire na fango tënë na alakui wala na anda-yenga.
8. Ye wa amû lege na mbeni koli na wali ti lo ti mû kusala ti pionnier auxiliaire?
8 Azo mingi awara lege ti sara kusala ti pionnier auxiliaire na sewa. Na yâ ti angu so ahon, mbeni koli na wali ti lo asara mbeto ti mû kusala ni ngbanga ti so ala bâ so dutingo ti ala amû lege na ala pëpe ti sara ni. Ye nyen ala sara? Ala tene: “E sambela Jéhovah ti mû maboko na e ti sara ye so e ye ti sara legeoko a ninga awe.” Na lekengo nzoni kapa, ala wara lege ti mû kusala ni. Ala kiri atene: “Kusala ni anzere na e mingi. E wara adeba nzoni mingi. Wango ti e ayeke so: ala tara abâ. Tongana e wara lege ti sara ni, a fa so ala kue alingbi peut-être ti sara legeoko.”
9. Ye nyen mo lingbi ti sara na ngoi ti mandango ye ti peko na sewa ti mo ti leke tere teti anze ti kusala so ayeke ga?
9 Na ngoi ti mandango ye ti peko na sewa ti mo, mo lingbi ti mû mbeni ngoi ti gbu li na ndo lege ti tene ala kue akono kusala ti ala na yâ ti anze so ayeke ga. Même tongana sewa ti mo kue alingbi pëpe ti sara kusala ti pionnier, peut-être zo oko na popo ti ala alingbi ti sara ni, na tanga ti azo kue amû maboko na lo. Tongana ala lingbi pëpe, peut-être sewa ti mo alingbi ti zia na gbele ala ti fa tënë mingi ahon ti kozo na yâ ti anze ti kusala so ayeke nde.
10. Ngbanga ti nyen ti fa na amba ti e nzara ti e ti sara kusala mingi na ngoi ti Mémorial so?
10 Mungo maboko na mba: Tongana mo yeke na wâ, zo so ayeke nduru na mo ayeke nga na wâ. Fa na amba ti mo nzara ti mo ti mû kusala ti pionnier auxiliaire. Ye so alingbi ti pusu ala ti mû nga kusala ni. Na ndo ni, ala so asara kusala ni kozo alingbi ti mû na mo awango so fade ayeke mû maboko na mo ti leke yâ ti akusala ti mo nga na kapa ti mo si mo sara kusala ni (aProv. 15:22). Tongana mo lingbi ti mû kusala ti pionnier auxiliaire, ngbanga ti nyen ti iri pëpe na tere ti mo mbeni mba ti mo wafango tënë, peut-être lo so dutingo ti lo alingbi na ti mo, ti sara pendere kusala so na mo?
11. Tongana nyen a-ancien alingbi ti mû wâ na aita teti kusala ti pionnier auxiliaire na yâ ti anze so ayeke ga?
11 A-ancien mingi ayeke leke tere ti ala ti mû mbage na kusala so (aHéb. 13:7). So biani ye ti mungo wâ na kongregation! A-ancien amû nga wâ na aita na lege ti alisoro ti ala. Gi mbeni nduru tënë ti mungo ngangu na zo wala mbeni nzoni wango alingbi ti pusu mbeni zo ti mû kusala ti pionnier. Peut-être fade surveillant ti kusala ayeke leke ambeni bungbi ti fango tënë si zo kue alingbi ti fa tënë na groupe, même na peko ti kua wala ekole. Fade a yeke fa ni lakue lakue na kongregation. Fade lo yeke bâ nga si aterritoire na ambeti alingbi azo kue.
12. Ye wa mo lingbi peut-être ti sara tongana mo lingbi ti mû kusala ti pionnier auxiliaire pëpe?
12 Même tongana dutingo ti mo akanga lege na mo ti mû kusala ni, mo lingbi ti wa ambeni ti sara ni, nga mo lingbi ti sambela ndali ti ala (aProv. 25:11; aCol. 4:12). Peut-être mo lingbi ti zia mbeni lango na ndo alango ti fango tënë ti mo ti fa tënë legeoko na ala wala ti mû ngoi mingi na fango tënë ahon ti so mo yeke sara lakue.
13. A ku ti wara wungo ti apionnier auxiliaire oke na kodoro ti mo? Kongregation ti mo alingbi ti sara nyen ti tene ala si na wungo so?
13 Apionnier auxiliaire so e ye ti wara na avril: Kota wungo ti apionnier auxiliaire so e wara awe na yâ akodoro kue so ayeke sara kusala na oko Kusala ti Royaume so ahon 8 000. Tongaso, e lingbi ti ku ti wara wungo ti apionnier auxiliaire 10 000 na nze ti avril. A fa wungo ti apionnier auxiliaire so kodoro oko oko alingbi ti wara na encadré ti lembeti 4. E lingbi ti wara ni tongana bungbi ti a-ancien oko oko afa wungo so kongregation ti ala alingbi ti wara ti pusu aita ti mû kusala ni. Na tapande, ala lingbi ti hunda ti tene zo 1 na popo ti awafango tënë 6 ti kongregation amû kusala ni. Biani, ambeni kongregation ayeke wara ande awafango tënë mingi ahon so, so dutingo ti ala amû lege na ala ti sara kusala ti pionnier auxiliaire. Ti tâ tënë ni a yeke duti ande ngangu pëpe na mingi ti akongregation ti si na wungo so a fa. Bâ ngia so ayeke duti ande na yâ kongregation ti mo nga na nzoni ye so a yeke sara na ndo fango tënë na yâ territoire ti mo!
14. Ngbanga ti nyen avril ayeke nzoni nze ti mû kusala ti pionnier auxiliaire?
14 Ngbanga ti nyen avril ayeke nzoni nze ti mû kusala ti pionnier auxiliaire? Mémorial ayeke duti ande na tongo nda ti nze ni, na so amû na e lege ti kiri ti bâ azo so aga. Fade e yeke kangbi apériodique, na gingo ti zia na azo buku Bible afa na ngoi so e kiri ti bâ ala ti tene e to nda ti a-étude. Tongaso, mungo kusala ti pionnier auxiliaire na avril ayeke zi ande lege mingi na e ti to nda ti a-étude. Na ndo ni, nze ti avril ayeke na adimanche oku na awakua ayeke wu tere lango oko wala use. Ye so asara si a yeke ngangu pëpe na awakua nga na awamandango mbeti ti mû kusala ni.
15. Ngbanga ti nyen ti duti na bibe ti sarango ye hio na ngoi ti Mémorial so ayeke pusu nduru nduru?
15 Ngoi ti Mémorial oko oko so ayeke hon ayeke pusu e nduru nduru na hunzingo ti aye ti sese so. Ngoi angbâ mingi pëpe ti tene e fa na azo ye na ndo kota Nzapa ti e (1 aCor. 7:29). Tongana Mémorial ahunzi ande awe, apendere lege so azi na e ti sepela Babâ ti e ti yayu ayeke hon biani biani. Zia e leke tere ti e fadeso ti sara ye kue so e lingbi ti sara na nze ti mars, avril na mai ti fa na gigi anzoye ti Jéhovah!
[Encadré na lembeti 4]
E lingbi ti wara apionnier auxiliaire oke na avril?
[Foto na lembeti 4]
◼ Bénin: 1 400
◼ Burkina Faso: 300
◼ Cameroun: 4 000
◼ Centrafrique: 300
◼ Gabon: 400
◼ Guinée Équatoriale: 200
◼ Mali: 35
◼ Niger: 50
◼ Sénégal: 220
◼ Tchad: 75
◼ Togo: 3 500