Fa tënë na sala tënë ti témoin kue
1 Jésus, tongana mbeni “Zo ti fa lege, na Zo ti komande azo”, aleke nzoni adisciple ti lo teti kota kusala ti fango tënë so ayeke ku ala (Es. 55:4; Luc 10:1-12; Kus. 1:8). Bazengele Pierre afa peko ti kungba so Jésus amû lani na ala na lege ti atënë so: ‘Lo komande e ti fa tënë na azo, na ti sala tënë ti témoin kue, so Lo yeke Zo so Nzapa ahiri Lo na gigi ti ga Juge ti azo so ayeke na fini na ti awakinda.’ (Kus. 10:42). Tongana nyen e yeke sala tënë ti témoin kue?
2 E lingbi ti manda aye mingi na bingo bê na ndo lege so bazengele Paul afa na tënë. Tongana lo tingbi na ambakoro-koli ti kongregation ti Éphèse, lo dabe ala na tënë so: ‘Mbi ke pëpe ti fa na i ye kue so ayeke nzoni teti i, mbi fa nda ti tënë na i na gbele azo, na mbi fa tënë ni da na da nga. Mbi sala tënë ti témoin kue na aJuif na aGrec ti changé bê ti ala ti ga na Nzapa, na ti mä na bê na Seigneur ti e Jésus Christ.’ Atâa so lo mveni lo wara atara, Paul agi lani ti fa nzo tënë na azo mingi. Lo ye lani pëpe gi ti fa na awamango lo akozo gere ti tâ tënë, me, lo gi nga ti fa “wango-tene kue ti Nzapa.” Ti sala ni tongaso, lo yeke ndulu ti sala ngangu na ti dö ambeni ye na yâ fini ti lo ti zia. Lo tene nga: ‘Mbi bâ so fini ti mbi ayeke senge ye na lê ti mbi. Ye so mbi ye ayeke ti hunzi kua ti mbi, ti sala ye so kue Seigneur Jésus ahunda na mbi ti sala, so ti tene, ti sala tënë ti témoin kue ti nzo tënë ti nzoni bê ti Nzapa na azo.’—Kus. 20:20, 21, 24, 27.
3 Tongana nyen e lingbi ti mû tapande ti Paul laso? (1 aCor. 11:1). Na gingo azo so alingbi, même tongana akpale asi na e mveni, na salango kue ti fa nzo tënë na azo ti akete mara kue nga na ti ayanga ti kodoro kue, nga na mungo maboko na azo so asala nzara ti tâ tënë so e wara (Mat. 10:12, 13). Ye so ahunda ngoi, ngangu na ndoye teti azo ni.
4 Mo lingbi ti duti pionnier auxiliaire? Nze ti mars na avril alingbi ande ti duti mbeni pendere lege so azi ti sala tënë ti témoin kue na dutingo pionnier auxiliaire. So tâ ye ti mungo wâ na zo ti bâ so, na ngu so ahon, aita mingi asala ngangu so ayeke nde ti mû kua ti pionnier auxiliaire!
5 Wango so bungbi ti Jéhovah amû apusu mbeni mbakoro-wali, so ayeke na ngu 80 nga na akpale ti kobela mingi ti sala ye. Lo tene: “Wango ni akono wâ so angbâ na bê ti mbi aninga, na asala si mbi bâ so a lingbi mbi kiri mbi mû kua ti pionnier auxiliaire kamême fani oko.” Lo mû lani desizion ti komanse na nze ti mars. Lo tene: “Kozo ye so mbi sala lani ayeke ti duti na ti gbu li. Mbi sala tënë ni na molenge ti mbi ti wali teti so mbi yeke na bezoin ti tene lo mû maboko na mbi. Lo nga kue lo sû iri ti lo na ndo mbeti ti ga pionnier auxiliaire, ye so mbi ku ni fade pëpe.” Na yâ ti nze ni, ita-wali so aga mbakoro awe afa tënë angbonga 52. Lo tene: “Fani mingi mbi hunda na Jéhovah ti kiri ti mû na mbi ngangu tongana mbi bâ so ngangu ti mbi ague ti hunzi. Na nda ti nze ni, mbi yeke lani tâ na kota ngia mingi, na bê ti mbi anzere. Mbi kiri singila fani mingi na Jéhovah so lo mû maboko na mbi. Mbi yeke na nzara ti kiri ti mû kua ti pionnier.” Mango mara ti atënë ti mû ngia na bê so lo wara alingbi ti pusu ambeni ita so aye biani ti mû kua ti pionnier auxiliaire, atâa ngangu kpale ti kobela akanga lege na ala.
6 Mbeni ita-koli so a zi lani lo na kua, na ngoi so lo ku ni pëpe, agbu ngoi ni so ti mû kua ti pionnier auxiliaire. Tongana nze ni ayeke hon, wâ ti lo teti fango tënë akiri aga kota. Ti si na nda ti nze ni, lo komanse awe mbeni fini étude. Na bingo bê na ndo ye so asi na lo, lo tene: “So tâ nze!” So ngia si lo yeke na ni ti wara fango lege nga na mungo maboko ti Jéhovah! Biani, Jéhovah atuku lani deba nzoni na ndo ita-koli so teti ngangu kue so lo sala na yâ kusala ti fango tënë, nga fade Lo yeke sala mara ni na mo.—Mal. 3:10.
7 Ti ambeni wafango tënë mingi, mungo kusala ti pionnier ayeke kete ye pëpe. Ye oko, atâa akua ti nginza, akungba ti sewa nga na akpale so asi na ala mveni, mingi ti aita-koli na aita-wali alingbi ti sala ni. Fani mingi, ti sala tënë ti témoin kue, ahunda ti tene e mû kete ngoi nga na ngangu ti e. Ye oko, mbeni ye ti haka na adeba nzoni ni ayeke pëpe.—aProv. 10:22.
8 Nze ti mars na ti avril ayeke apendere ngoi ti mû kua ti pionnier auxiliaire. A yeke wara anda-yenga oku na nze ti mars. Ti fa tënë na hunzingo ti ayenga so, nga na lakui alingbi ti mû lege na aita mingi so asala kua ti nginza ti ngoi kue ti mû kusala ti pionnier auxiliaire. Na ndo ni, mo lingbi ti fa tënë na angoi ti hungo tele ti nze ti avril. Ambeni ita so asala kua ti nginza wala so ague na ekole ayeke peut-être na ngoi ti hungo tele. Ala lingbi ti sala kusala na angoi so ti wara angbonga 50 so ahunda na ala. Ti leke tele nzoni ti fa tënë angbonga 50 na nze ti mars wala na nze ti avril, mo lingbi ti sala kusala na oko ti aprogramme ti pionnier auxiliaire so a fa ni ge na yâ ti article so? Sala lisoro na ndo programme ti mo na ambeni zo; peut-être ambeni na popo ti ala alingbi ti duti na wâ ti fa tënë legeoko na mo. Tongana mo lingbi pëpe ti duti pionnier auxiliaire, zia na gbele mo mbeni mbilimbili ye ti sala na yâ ti anze so, na mû maboko na ala so alingbi ti mû kua ti pionnier. Leke aprogramme ti mo fadeso ti fa tënë mingi na nze ti mars na avril.
9 Fa bê ti kiri singila na ngoi ti Mémorial: Ngu oko oko, na ngoi ti Mémorial, bê ti kiri singila teti kota ngele apusu aita saki mingi ti ‘vo ngoi’ ti duti apionnier auxiliaire (aEph. 5:15, 16). Na ngu so ahon, a wara na akodoro ti Bê na ti Do ti Afrika so ayeke sala kua na Kusala ti Royaume so, apionnier auxiliaire 8 970 na mars nga 3 332 na avril. Ye so asala si a wara mbeni wungo ti azo ndulu na 6 151 teti oko oko ti anze use so. Haka wungo so na wungo ti azo 1 266 so amû kua ti pionnier auxiliaire na yâ ti akozo nze oko oko ti ngu ti kusala. Mémorial ti ngu so ayeke mbeni pendere lege ti fa tâ bê ti kiri singila ti e teti sandaga ti kota ngele ti Christ, na mungo mbage ti e mingi na kusala ti fango tënë.
10 Na ngoi so lango 16 ti nze ti avril ayeke ga ndulu, gi ti bâ ye so Matanga ti Dango bê aye ti tene teti mo. Gbu li na ndo aye so asi oko na oko juska na kuâ ti Christ, nga na ndo anene tënë so ayeke na li nga na bê ti lo. Gbu li nga na ndo ngia so a zia na gbele Jésus, na tongana nyen amû lani maboko na lo ti hon ndo ti sioye so a sala na lo. Bi bê na ndo dutingo ti lo ti fadeso tongana Mokonzi ti kongregation, so ayeke bâ lege ti kusala ti fango tënë na ti salango adisciple (1 aCor. 11:3; aHéb. 12:2; Apoc. 14:14-16). Na pekoni, fa na gigi bê ti kiri singila ti mo teti aye kue so Christ asala na mungo mbage mingi na yâ kusala ti fango tënë tongana lege azi na mo.
11 Wa ambeni ti sala tënë ti témoin kue: Na mungo mbage ti ala na kusala ti pionnier auxiliaire, a-ancien na aserviteur ti mungo maboko alingbi ti wa ambeni membre ti kongregation. Tongana ala yeke fa tënë na tele ti awafango tënë, na tongana ala yeke sala avizite ti a-ancien, ala mveni ayeke na anzoni lege so azi ti mû maboko na ambeni ita ti mû mbage ti ala mingi na yâ kusala so ayeke nde. Zia e kue e zia na yâ sambela ti e ti fa tënë na ngoi ti mars na avril, ye so ayeke kpengba angangu so e kue e mû ti sala tënë ti témoin kue.
12 Atâa so a-ancien na aserviteur ti mungo maboko ayeke sala ande kusala maboko na maboko na aye so a leke na yâ kongregation ti kono yâ ti kusala ti fango tënë na nze ti mars na ti avril, a yeke nzoni surveillant ti kusala, lo mveni, abi bê ti lo na ndo aye so alingbi ti leke teti fango tënë ni. A yeke nzoni lo leke ando ti warango tele ti sigigi na fango tënë, alango, na angbonga so alingbi na mingi ti awafango tënë, nga a yeke nzoni ti fa ni na kongregation lakue. A yeke nga nzoni a leke angoi nde nde na yâ lango ni, ti mû lege na azo kue na yâ kongregation ti mû mbage ti ala na ambage nde nde ti fango tënë. A lingbi ti duti fango tënë na ando ti kango ye, fango tënë na lege, da na da, salango afini vizite, fango tënë na téléphone. Na ndo ni, a yeke nzoni lo leke ti tene a wara gbâ ti ambeti, apériodique, na aterritoire na yâ ti anze ni.
13 A yeke fa ande na nze ti mars buku Hingango Ye na bibe ti komanse a-étude. A yeke wara na yâ supplément ti Kusala ti Royaume ti janvier ngu 2002, apendere wango na ndo fango buku Hingango Ye. Na nze ti avril, a yeke sala kua na Tour ti Ba Ndo nga na Réveillez-vous! Tara ti sala kusala na awango so a fa ni, so ayeke wara ni na yâ “Ye ti tene na ndo apériodique.” A yeke nzoni zo kue amû ngoi ti leke tele ti lo nzoni, na tongaso, ti sala tënë ti témoin kue.
14 So tâ ye ti ngia ti sala kusala na gbe ti fango lege ti Mokonzi ti kongregation, Christ Jésus, na ti duti na matabisi ti fa nzo tënë na ambeni zo! Teti so nze ti mars na avril ayeke ga ndulu, zia e kiri e sala kue ti tene ala ga anze so ayeke nde na ngoi so e yeke mä yanga ti Christ ti fa tënë na ti sala tënë ti témoin kue.
[Kete tënë na lembeti 4]
Alege nde nde ti sala kusala ti pionnier auxiliaire na mars nga na avril 2003
Lango Angbonga
Lundi 1 2 — — 2 —
Mardi 1 — 3 — — —
Mercredi 1 2 — 5 — —
Jeudi 1 — 3 — — —
Vendredi 1 2 — — — —
Samedi 5 4 3 5 6 7
Dimanche 2 2 3 2 2 3
Mars 56 56 54 55 50 50
Avril 50 50 51 53 — —
Oko ti aprogramme so alingbi na mo?