Lettre ti filiale

Aita wafango tënë ti Royaume:

E yeke na ngia ti bâ guengo na li ni ti kusala na ngu 2007 na yâ ti akodoro kue so ayeke na Kusala ti Royaume so! Aye mingi ague na li ni. Mû na tapande wungo ti apionnier permanent na sese ti Cameroun so asi 2 085; na sese ti Guinée Bissau 20; na sese ti Sénégal 83 nga na sese ti Togo 930. Mingi ti akodoro so kue awara afini wafango tënë mingi, na ye so amû ngia na bê. Na tapande, na nze ti mars 2007, na sese ti Burkina Faso ala si 1 239, na sese ti Gambie ala si 190. A tokua aBéthelite mingi nga ala so ayeke leke ada ti bungbi ti e tongana pionnier spécial nga pionnier permanent. Ambeni na popo ti ala awara kota mbeti na Ekole ti Formation Ministérielle ade ti ninga pëpe, na ala mû ngangu mingi na fango tënë.

A kangbi nduru na kutu ota Asango ti Royaume No. 37, “Bungbi ti nzapa ti wataka aga nduru ti hunzi!” na yâ ti akodoro ti e 13, na anzoni ye mingi aga na pekoni. Gi filiale ti Centrafrique oko atokua ambeti so 92 039. Mbeni wali na Porto Novo awara oko ti atract 470 214 so a kangbi ni na yâ ti territoire ti filiale ti Bénin. Na peko ti so lo diko ni, lo hinga so ayeke tâ tënë. Na ngoi so lo kiri na kodoro ti lo, lo gi aTémoin na lo wara mbeni da so lo bâ lo tene a yeke sara bungbi dä. Lo ku na ndo so ti bâ wala mbeni zo ayeke ga. Mbeni ita-koli so ayeke hon kâ abâ lo na ague na lo na Da ti Royaume. Ngbene ye na ngoi ni so, lo manke lâ oko bungbi pëpe. Koli ti lo so kozoni akanga lege na lo ayeke gue fadeso na bungbi. Wali so aga même na kota bungbi ti district ti ngu 2006.

Nda ti kota kapa ti kangbingo mbeti so ayeke ti mû maboko na azo ti nzoni bê ti manda ye so Bible afa biani (Mat. 28:19, 20). Na fango tënë, girisa pëpe ti mû note ti azo kue so amä mo, na ti kiri ti bâ ala na gingo lege ti manda Bible na ala. E yeke na ngia ti sara kota kusala so maboko na maboko na ala, na zia ala hinga so e ndoye ala mingi.

Aita ti ala,

Biröo ti filiale