Lettre ti filiale

Aita wafango tënë ti Royaume:

Biani, Jéhovah ahiri deba nzoni na ndo akusala ti e na yâ ngu ti kusala so ahon. A leke ambeni kapa use ti fango ye na asurveillant so ague na ndo nde nde. A sala oko na Togo na mbeni oko nga na Cameroun. Na ngoi ti akapa so, ala wara mbeni nzoni fango ye so alingbi ti mû maboko na ala na yâ kusala ti ala. A sala nga Ekole teti aPionnier na lege ti fini buku so a sigigi na ni teti ala. So ayeke kota ngia ngbanga ti apionnier so, so asala ekole ni a ninga awe, ti kiri mbeni ti mû mbage na ekole so ti lege use ni! Na kodoro ti République Centrafricaine, a leke mbeni kapa ti fango ye na ala so ayeke kiri peko ti ambeti. Na ala wara nga afini ordinateur ti sala na kusala ti ala. Aye kue so ala manda ayeke mû lege na ala ti sala kusala ti ala nzoni ahon ti kozo; nga na lege ni, akongregation ayeke wara ye ti nzoni da.​—Es. 54:13.

Na hunzingo ti nze ti janvier, kodoro ti Togo awara mbeni fini wungo ti awafango tënë 13 405. Ye oko, na nze ti février, mbeni wuluwulu alondo na ndo tënë ti poroso. Kete na pekoni, salango ngangu amû ndo na yâ ti kodoro ni kue. Ye ti pekoni ayeke so ambeni ita abâ so a yeke na lege ti ndara ti zia kodoro ni na ti gue na yâ ti akodoro so ayeke na tele ni. Me ti si na ngoi so, mingi ti ala akiri na Togo awe. Na ndembe so ala wara lettre so, peut-être amissionnaire kue so a sigigi na ala lani akiri awe. Atâa akpale so kue, wungo ti apionnier auxiliaire ti nze ti mars na avril kue ayeke 3 800.

Na yâ ti anze so ayeke ndulu na ngoi ti salango Mémorial, aita mingi akono yâ ti kusala ti ala. Na tapande na nze ti mars, na Gambie, awafango tënë asala ngangu mingi. Tongana a bungbi angbonga kue so ala sala, wafango tënë oko oko asala ngbonga 13,6. Legeoko nga na Sénégal, wafango tënë oko oko asala ngbonga 13,7 na nze ti avril. Na Guinée-Bissau, wungo ti awafango tënë na avril 2004 ayeke 94. Me na avril 2005 ala wara mbeni fini wungo ti awafango tënë 114. Na nze ti mai, Cameroun awara mbeni fini wungo ti awafango tënë 30 241. Ala kangbi apériodique 615 505. Ade ala kangbi mara ti wungo ti apériodique tongaso kozoni pëpe.

Kusala ti lekengo aDa ti Royaume ague na li ni mingi nga. A sala aDa ti Royaume 100 na Togo, na a mû ndangba ni na Nzapa na nze ti avril. A sala aDa ti Royaume 163 na Cameroun, na a hunzi ti leke ndangba ni na nze ti mai. Mbeni groupe ti awalekengo aDa ti Royaume afa akua nde nde ti lekengo da na aita-wali. Tongana azo ayeke hon na ala yeke bâ aita-wali so ayeke sala kua, ambeni atene: “Awali Témoin ti Jéhovah so ahinga kusala ti lekengo da ngangu mingi.”

E kiri singila mingi na Jéhovah teti adeba nzoni so lo hiri na ndo ti akusala ti e na yâ ngu ti kusala so ahon. E gonda ala mingi teti kusala so ala sala na wâ ti tene aye ti Royaume ague na li ni. Na ngoi so e yeke to nda ti mbeni fini ngu ti kusala, zia Jéhovah ahiri deba nzoni na ndo ngangu so e yeke sala ti “sepela gloire ti Lo”.​—aEph. 1:12.

Aita ti ala,

Biröo ti filiale