E zia pëpe ti fa tënë
1 Ngoi na ngoi, e lingbi ti bâ so e fa tënë fani mingi na yâ ti territoire ti e, na azo mingi amä tënë ti e pëpe. Ye oko, zia e hinga ngbanga ti nyen a lingbi e zia pëpe ti fa tënë.—Mat. 28:19, 20.
2 Teti tënë ti témoin: Jésus atene na lege ti prophétie so fango tënë ti Royaume ayeke duti kota mbage ti aye so ayeke na yâ ti fä “ti nda ti ngoi so,” na a yeke sara ni “teti tënë ti témoin na amara kue.” (Mat. 24:3, 14). Tongana azo ayeke bâ e na fango nzo tënë ti Royaume, so ayeke ngangu tënë ti témoin la a fa awe so. Tongana e fa tënë na mbeni vaka si na pekoni e hon, ambeni zo alingbi ti sara tënë ti e teti l’heure mingi wala lango mingi na pekoni atâa so ala dengi mê fade na tënë ni pëpe. Ti hinga ndani so e yeke fa tënë ayeke mû maboko na e ti zia pëpe. E yeke zia ngia na bê ti Jéhovah na mungo mbage ti e na yâ ti gango tâ tënë ti aprophétie ti Bible na fango tënë ti témoin nga na gbotongo lê ti azo na ndo ti tënë ni.—2 aThes. 1:6-9.
3 E nze pëpe: Teti so angia ti sarango ni ayeke mingi na amû ngoi ti azo mingi, a hunda na e ti zia pëpe na ngoi so e yeke sara ngangu ti maï nzara ti tënë ni na yâ ti azo so aye ni. Mbeni wali so aTémoin ti Jéhovah ayeke si na lo yenga na yenga ayeda na peko ti ngu oko ti tene ala ga aduti ti sara lisoro na ndo ti Bible. Tënë so lo mä anzere na lo mingi na lo yeda ti manda Bible; lo to nda ti gue na abungbi nga, kete na pekoni, lo tene ni ye ti mû batême.
4 Aye ti sese so ayeke gbian hio hio mingi, na bibe ti azo nga ayeke gbian. Azo mingi so ake ti mä e lani alingbi fadeso ti mä tënë ti beku so amû ngangu na zo so e yeke fa. Atâa gi zo oko si ayeda na tokua ti Royaume, a fa so gbungo ngangu ti e aga na ye ti nzoni.
5 Na ndo ti sese kue, azo mingi ayeke bima, na ala yeke toto teti ye kue ti sioni mingi so azo asara (Ezéch. 9:4). Alengo ti Royaume afa so ala so bê ti ala ayeke nzoni ayeke yeda na tokua ti Royaume (Es. 2:2, 3). Tongaso, e ngbâ lakue ti fa tënë; zia si ndoye apusu e ti zia pëpe ti “ga na tene-nzoni ti nzoye”.—Es. 52:7; Kus. 5:42.