Fade ala mä tongana nyen?
1. Ngbanga ti nyen fango tënë alingbi ti kpengba? na ngbanga ti nyen ti zia pëpe ti sara ni?
1 So lâ ti Jéhovah ayeke ga nduru nduru, a lingbi e sara ye hio ti mû maboko na azo mingi ti hinga Nzapa nzoni nga na ye so lo leke ti sara teti azo ti sese kue (Jean 17:3; 2 Pi. 3:9, 10). Ngoi na ngoi, kusala ni alingbi ti kpengba teti so azo mingi asara nzara ti tënë ni pëpe wala ala lingbi ti he e na ngia ndali ti fango tënë so e yeke fa (2 Pi. 3:3, 4). Ye oko, e yeke na anda ti tënë kue ti hinga so ambeni zo angbâ na yâ ti territoire ti e so ayeke yeda na nzo tënë na ngoi so ala mä ni. Tongana zo ti fa tënë ayeke pëpe, fade ala lingbi ti mä ni tongana nyen?—aRom. 10:14, 15.
2. Na lege wa tapande ti Paul amû ngangu na e?
2 Na gbele kangango lege: Ndali ti nzoni ti azo so ayeke nduru ti mä tokua ti Royaume, a lingbi e zia si bê ti e anze pëpe. Na sese ti Poto, Philippe ayeke kozo gbata so amä nzo tënë so Paul afa. Na ngoi so a bi tënë ti mvene na li ti lo na Silas, a pika ala na keke na a bi ala na da ti kanga (Kus. 16:16-24). Ye oko, ye ti vundu so asi so akanga lege na Paul pëpe ti fa tënë ndali ti mbeto. Tongana na yâ ti tambela ti lo ti missionnaire ni lo londo kâ lo si na Thessalonique na pekoni, lo “yeke na mbeto pëpe na yâ Nzapa” ti lo (1 aThes. 2:2). Ye so asi na Paul afa na e so “a lingbi bê ti e anze pëpe”.—aGal. 6:9.
3. Nyen la alingbi ti pusu ambeni zo so ake ti mä e kozo ti changé bibe ti ala fadeso?
3 Azo mingi so kozo ake ti mä e teti angu mingi achangé bibe ti ala fadeso. Kpale ti konomi so asi na yâ ti kodoro, kobela, kui ti mbeni sewa nga na asioni sango so e yeke mä na yâ ti dunia alingbi ti duti na gunda ti changengo bibe ti azo so (1 aCor. 7:31). Azo so ababâ na amama ti ala akanga lege na ala ândö akono fadeso awe na ala yeke nduru ti mä e. Tongana e ngbâ ti fa tënë, e mû lege na azo tongaso ti ‘di iri ti [Jéhovah]’ kozoni si nda ni aga.—aRom. 10:13.
4. Nyen la ayeke pusu e ti “zia pëpe” ti fa tënë?
4 “Zia pëpe”: Ndoye ti e na mbage ti Nzapa nga na mbage ti amba ti e ayeke pusu e ti “zia pëpe” ti fa tënë na ti sara si azo aga adisciple tongana ti so abazengele asara na ngoi ti ala (Kus. 5:42). Laso, azo mingi ‘abima na atoto teti ye kue ti sioni mingi’ so azo ayeke sara na ndembe so (Ezéch. 9:4). So beku na dengo bê si azo tongaso ayeke na ni tongana ala mä nzo tënë! Même tongana mingi ti azo ake ti mä e, Mbeti ti Nzapa adë bê ti e so Jéhovah ayeke na ngia teti angangu kue so e sara.—aHéb. 13:15, 16.