Nda ni so e yeke kiri fani mingi
1. Hundango tënë wa abâ kusala ti e ti fango tënë?
1 Na ando mingi, e fa tënë na yâ ti territoire ti e fani mingi. E yeke kiri lege mingi na a-oko da atâa so zo ni atene na e so tënë ni anzere na ni pëpe. Ngbanga ti nyen e ngbâ ti gue ti bâ azo so kozoni asara nzara ti tënë ni pëpe?
2. Kozo nda ti tënë so e yeke na ni ti zia pëpe ti fa tënë ayeke so wa?
2 Ndoye na mbage ti Jéhovah nga na ti azo: Kozo nda ni so e ngbâ ti fa tënë ayeke ndoye ti e na mbage ti Jéhovah. Bê ti e apusu e ti ngbâ ti sara tënë ti kota Nzapa ti e na amba ti e (Luc 6:45). Ndoye ti e na mbage ti Jéhovah apusu e ti mä akomandema ti lo na ti mû maboko na azo ti sara legeoko nga tongaso (aProv. 27:11; 1 Jean 5:3). Ngbango be-ta-zo ti e na yâ kusala so aluti pëpe na ndo sarango ye ti azo na mbage ti tënë so e fa na ala. Même tongana a sara lani ngangu na akozo Chrétien, ala ngbâ ti fa tënë, “ala zia pëpe” (Kus. 5:42). Tongana azo ake ti mä e, ahon ti zia si ye so awoko e, e gbu ngangu na e fa so e ndoye Jéhovah mingi na so e mû tere ti e kue na lo.
3. Tongana nyen ndoye ti e na mbage ti azo ayeke pusu e ti ngbâ ti fa tënë?
3 E ngbâ nga ti fa tënë ngbanga ti so e ndoye amba ti e (Luc 10:27). Jéhovah aye si a futi mbeni zo pëpe (2 Pi. 3:9). Même na yâ ti territoire so e sara kua dä mingi, e ngbâ lakue ti wara azo so aye ti sara na Jéhovah. Na tapande, na Guadeloupe, so na ndo ti azo 56 zo 1 ayeke Témoin ti Jéhovah, azo 214 awara batême na ngu so ahon. Azo nduru na 20 000 aga na Dango bê na kui ti Seigneur, so ti tene zo 1 na ndo ti azo 22 na Guadeloupe.
4. Tongana nyen aye ayeke gbian na yâ ti aterritoire?
4 Aye so ayeke gbian na yâ ti territoire: Lakue e yeke bâ azo nde nde na yâ ti territoire ti e. Ti peko so e yeke gue na ndo so kozoni azo ni amä e pëpe, e lingbi ti tingbi na mbeni zo nde ti sewa ni so ayeke yamba e na ayeke mä e, peut-être mbeni zo so lâ oko amä tënë ti e pëpe. Mbeni, e lingbi ti wara afini zo na yâ ti da ni so asara nzara ti tënë ni. Amolenge so ababâ na amama ni akanga lege na ala akono fadeso awe, na ala londo na gbe ti ala awe. Azo tongaso alingbi ti duti nduru ti mä tokua ti Royaume.
5. Ye wa alingbi ti sara si azo adengi mê na tënë ti e ahon ti kozo?
5 Azo nga ayeke changé. Bazengele Paul ayeke “wazonga giriri, na zo ti sara ngangu na zo, na zo ti sio yanga.” (1 Tim. 1:13). Legeoko nga, azo mingi so ayeke sara na Jéhovah laso aye ândö tâ tënë pëpe. Ambeni akanga même lani lege na nzo tënë. Teti aye ayeke gbian na ndo sese, azo so akanga lege na e wala so asara nzara ti tënë ni pëpe alingbi ti dengi mê ti mä e. Ambeni alingbi ti dengi mê na e na peko ti so mbeni ye ti ngangu asi na ala, tongana kui ti mbeni sewa ti ala, kua ti ala so ala yeke na ni mbeni pëpe, kpale ti nginza wala ti seni.
6. Ngbanga ti nyen e ngbâ ti fa tënë na ngia?
6 Sese so ayeke gue ti hunzi hunzingo, me kusala ti e ti fango tënë na ti fango ye ayeke tambela na loro (Es. 60:22). Ni la, e ngbâ ti fa tënë na ngia na e sara kue ti duti na mbeni nzoni bango ndo. Zo ti peko so e yeke gue ti fa tënë na lo alingbi ti mä e. A lingbi e ngbâ ti fa tënë! ‘Teti na yâ kusala so, fade e sö e mveni na ala so amä e.’—1 Tim. 4:16.