Lettre ti Filiale
Aita wafango tënë ti Royaume,
“I yä lê ti i, i bâ le-kobe ti yaka abe alingbi na fango ni.” (Jean 4:35). Na ngia, Jésus asara tënë so na adisciple ti lo na ndo ti fango le-kobe ti yingo, bungbingo azo so ayeke tongana angasangbaga teti fini ti lakue lakue. Bâ tongana nyen a yeke nzoni ti bâ awakua ti Jéhovah na ndo nde nde kue abi tere ti ala kue na gingo azo so bê ti ala ayeke nzoni ti gue na ala hio ti “lï na da” ti bungbi ti Nzapa ti bata tere ti ala.—Esaïe 26:20.
Na tapande na Cameroun, ngu oko oko, a zia anze ti juin ti si na novembre teti awafango tënë ti gue na yâ ti aterritoire so a yeke fa ka tënë dä hio hio pëpe. Na ngu so ahon, na yâ ti anze omene so, awafango tënë 757 so ayeke na yâ ti agroupe 124 akangbi abuku 81 652, abrochure 106 008 na ngoi so ala yeke tambela na yâ ti aterritoire 87 so a mû na ala. Ti nze ti juin ti ngu so, a diko awafango tënë 1 267 so ayeke fa ande tënë na yâ ti aterritoire 95 so ade ti mû na zo pëpe. Filiale atokua abrochure 300 000 na abuku 46 000 na awafango tënë so, so a kangbi ala na yâ ti agroupe 141. Azo ti yâ ti sewa kue nga na akumbamba so ngu ti ala ayeke nde nde amû mbage na kota tambela ti fango le-kobe so.
Na Togo, awafango tënë 600 afa tënë na yâ ti aterritoire tongaso. Na yâ ti nze ota, ala kangbi abuku 5 830, abrochure 27 220 na apériodique 18 799. Na yâ ti akete kodoro nde nde ala mû adiskur, na wungo ti azo kue so aga ayeke 2 830. Bê ti awafango tënë apika mingi na ngoi ti kiringo ti ala tongana ala mä azo ti kodoro ni atene na ala: “Pardon ala girisa e pëpe. E yeke ku ala ti peko!”
Na Burkina Faso so mara ti lekengo ye tongaso ayeke nga dä, aita-koli use ague na mbeni territoire so ayo teti nze ota. Ala zia abuku 249, abrochure 597 na apériodique 1 432. Na ota nze ni, ala sara a-étude 37, tongaso ala zi lege na awafango tënë ti ngoi kue ti ngbâ ti bungbi aye ti nzoni mingi ti Jéhovah (Aggée 2:7). Biani, “le-kobe ti yaka abe” awe. Na tapande na Mali, tongana a mû awafango tënë 100, azo 43 na popo ni awara batême; na oko ngoi ni so, na Guinée Bissau, wungo ti azo so awara batême asi 50 na popo ti awafango tënë 100 na ngu ti kusala so ahon.
Na bango aye so kue, mo leke kapa ti mo awe ti mû mbage mingi na “fango le-kobe” ti ngu so? Ti tâ tënë ni, “le-kobe ti yaka ayeke mingi biani, me azo ti kusala ayeke mingi pëpe.” (Matthieu 9:36). Na bê ti e kue e gonda ala, aita-koli na aita-wali, teti nzoni kusala so ala sara! E ye si Jéhovah airi tënë nzoni na ndo ti e kue na ngu ti kusala so tongana e yeke mû ngoi na ngangu ti e mingi na yâ ti fango le-kobe so; teti biani, “le-kobe ti yaka abe alingbi na fango ni.”
Aita ti ala,
Biröo ti filiale