Hundango ndo

◼ Tongana mbeni koli na wali aye ti sara matanga ti mariage ti ala na Da ti Royaume, atënë wa a lingbi ala bâ na a-ancien kozoni?

Amatanga ti mariage so atambela alingbi na akpengba-ndia ti Bible amû gonda na Jéhovah. Tënë so ayeke tâ tënë mbilimbili tongana a sara mariage ni na Da ti Royaume, teti akapa so atambela kâ afa na gigi vorongo Nzapa ti e na lê ti azo. Ti tene a “sara ye kue mbilimbili na lege ni”, a yeke nzoni a-ancien abâ tënë ni tongana a hunda Da ti Royaume ni ti sara na matanga ti mariage.​—1 aCor. 14:40.

A lingbi koli na wali so aye ti sara matanga ti ala na Da ti Royaume asû hunda ti ala na komite ti kusala ti kongregation so ayeke sara bungbi na yâ ti da ni so. A lingbi ala zia mbeti ti ala ni ngoi mingi kozoni, na a lingbi ala fa lango nga na ngbonga so ala ye ti sara na matanga ni. A lingbi ala girisa pëpe so a-ancien ayeke gbian pëpe akapa ti bungbi ti lingbi na matanga ti ala ni. Na ndo ni, a lingbi koli na wali ni aduti na nzoni tambela, na sarango ye ti ala alingbi na akpengba-ndia ti Bible nga na andia ti mbilimbili so Jéhovah alu.

Ti tene si matanga ni afa na gigi biani kota ti Nzapa ti e, a yeke nzoni koli na wali ni apika patara kozoni na komite ti kusala na ndo ti lege so ala leke ti sara na matanga ni. Atâa so a-ancien ayeke gi pëpe ti fa ye so bê ti ala mveni aye ti tene a sara, tongana koli na wali ni aleke ti sara mbeni ye so ala bâ gere ni aluti mbilimbili pëpe, a lingbi ala leke yâ ni nzoni kozoni. A lingbi ti pika gi amozoko ti Mélodies du Royaume wala ati so ayeke na yâ ti mbeti ti bia ti e. Ye ti pendere kue so ala ye ti zia na yâ ti Da ti Royaume wala ti kiri ti leke ando ti duti, a lingbi nga a-ancien ayeda na ni si. Tongana a ye ti sara foto wala ti mû limon, zia si ye so abuba nengo ti matanga ni pëpe. A-ancien alingbi ti yeda ti tene atara gere ti ambeni kusala na Da ti Royaume ni, me a lingbi ngoi kue so a mû ti sara na ni abuba kapa ti akusala ti kongregation pëpe. A lingbi a zia mbeti ti tisango ndo ti mariage ni na tableau pëpe. Ye oko, na ngoi ti bungbi ti kusala, a-ancien alingbi ti sara mbeni nduru tokua ti fa na kongregation tënë ti matanga ti mariage so a yeke sara na Da ti Royaume.

Atâa so a hunda pëpe ti tene azo so ayeke na tere ti azo so amû tere aduti gi ala so akamata batême, a yeke na lege ni pëpe ti yôro na popo ni azo so sarango ye ti ala ague nde na akpengba-ndia ti Bible wala ala so tambela ti ala alingbi ti ga na gingo bê na azo so aga. Tongana lege ayeke dä, a yeke nzoni mbeni ancien si amû li ni. A-ancien ayeke awafango Tënë ti Nzapa, tongaso ala lingbi biani ti fa akpengba-ndia ti Mbeti ti Nzapa so abâ kota ngoi so.​—1 Tim. 3:2.

Teti so matanga ti mariage ni alingbi nga ti buba wala ti ga na tënë nzoni na ndo ti ancien so ayeke na ndo ti matanga ni, a yeke nzoni lo kue lo hinga tënë ti ye kue so a leke teti matanga ni. Fade lo sara lisoro na koli na wali ni ti gi ti hinga ye na ndo ti tambela ti ala ngbene ye so ala mä tere ti fâ seleka; fade ala tene na lo tâ tënë. Tongana koli ni wala wali ni asara mariage kozo, a lingbi lo fa ye so afa biani so Mbeti ti Nzapa na ndia ti kodoro akanga lege na lo pëpe ti sara mariage (Mat. 19:9). Ye so ahunda nga ti fa na ancien ni mbeti ti divorce so lo sara.

Tongana koli na wali ni asara tënë polele na ala mä tere nzoni na a-ancien, fade matanga ti mariage ni aduti mbeni ngoi so amû ngia na azo kue.​—aProv. 15:22; aHéb. 13:17.