Lege ti sara étude na buku “Ndoye ti Nzapa”
1. A sigigi na buku “Ndoye ti Nzapa” ngbanga ti nyen?
1 Bê ti e anzere lani ti wara buku “Zi ala ngbâ na yâ ti ndoye ti Nzapa” na Kota Bungbi ti District “Yingo ti Nzapa afa lege na e.” Tongana ti so a tene lani awe, a sara buku so ti mû maboko na e ti hinga na ti ndoye akpengba-ndia ti Jéhovah na ndo ti tambela ti zo, me pëpe ti fa akozo gere ti aye so Bible afa. E yeke kangbi buku so da na da pëpe.
2. Fade e sara kusala na buku so tongana nyen? na a lingbi e manda ni na zo wa?
2 Buku so ayeke use buku so e yeke manda na azo tongana ala hunzi buku Bible afa. Girisa pëpe so maïngo ti azo na lege ti yingo ayeke nde nde. Mandango ye ni ayeke tambela alingbi na ngangu ti wamandango ye ni. Sara kue ti tene zo ni amä yâ ti ye so mo fa na lo nzoni. Mingi ni, a hunda pëpe ti manda buku so na azo so amanda ândö abuku mingi awe, me so lâ oko aga na bungbi pëpe na ala bi bê ti ala pëpe ti tambela na lege ti tâ tënë so a fa na ala.
3. Tongana e yeke manda na ndembe so buku Voro Nzapa na mbeni zo, a lingbi e sara nyen?
3 Tongana mo yeke manda na ndembe so Bible na mbeni zo na yâ ti buku Voro Nzapa na ala ga nduru ti hunzi ni, mo lingbi ti hunzi ni senge na mo wa wamandango ye ni ti diko lo mveni buku “Ndoye ti Nzapa”. Tongana a yeke tongaso pëpe, a yeke nzoni ti kiri na yâ ti fini buku so na ti komanse na li ni. Tongana ti so a yeke na yâ ti buku Bible afa, ti sara lisoro na ndo ti mbage so atene “Ambeni tënë”, ndia ayeke dä pëpe.
4. A lingbi e sara nyen tongana wamandango ye ni akamata batême awe kozo si lo hunzi buku Bible afa nga Ndoye ti Nzapa?
4 Tongana wamandango ye ni akamata batême awe kozo si lo hunzi abuku use so, a lingbi lo manda buku “Ndoye ti Nzapa” juska ahunzi. Atâa wamandango ye ni akamata batême awe, mo lingbi ti diko l’heure, vizite nga na étude ni. Wafango tënë so ague na wafango ye ni si amû mbage na étude ni alingbi ti diko nga l’heure ni.
5. Tongana nyen e lingbi ti sara kusala na buku “Ndoye ti Nzapa” ti mû maboko na awafango tënë so azia ti fa tënë aninga?
5 Tongana mbeni membre ti komité ti kusala ti congrégation ti mo ahunda na mo ti manda Bible na mbeni zo so azia ti fa tënë aninga, a lingbi ti hunda na mo ti manda na zo ni gi ambeni mbilimbili chapitre ti buku “Ndoye ti Nzapa”. A lingbi a sara a-étude tongaso anze mingi mingi pëpe. So apendere tënë si e yeke na ni na yâ ti fini buku so a sara ni ti mû maboko na e ti ngbâ “na yâ ti ndoye ti Nzapa”!—Jude 21.