Mo hunzi use buku ni awe?

1. A sigigi na buku “Ngbâ na yâ ti ndoye ti Nzapa” ndali ti nyen?

¹ Na ngu 2008, na ngoi ti Kota Bungbi ti District “Yingo ti Nzapa afa lege na e”, bê ti aita na yâ ti dunia kue anzere lani mingi ti wara fini buku “Zia ala ngbâ na yâ ti ndoye ti Nzapa”. Tongana ti so a tene lani, a sara buku so ti mû maboko na e ti hinga nga ti ndoye afango ye ti Jéhovah na ndo ti tambela ti zo, me pëpe ti fa akozo gere ti aye so Bible afa. A sigigi na buku so ti kangbi ni da na da pëpe. Tongaso, a sigigi na buku so ndali ti nyen?

2. E yeke sara kusala na buku so tongana nyen, nga e yeke manda ni na azo wa?

² Buku “Ngbâ na yâ ti ndoye ti Nzapa” ayeke use buku so e yeke manda na azo tongana ala hunzi buku Bible afa nyen. Tongana mbeni wamandango ye awara batême kozo si lo hunzi abuku so use kue, a lingbi lo ngbâ ti sara étude ni juska ti hunzi buku “Ngbâ na yâ ti ndoye ti Nzapa”. Atâa so zo ni awara batême awe, ita so ayeke sara étude na lo alingbi ti mû l’heure, ti diko vizite nga na étude ni. Ita so lo na lo ague ti sara étude ni ayeke mû l’heure ni nga kue.

3. Ngbanga ti nyen a yeke kota ye ti tene afini zo amanda abuku use so kue?

³ Ambeni zo alingbi ti pensé so ala hinga tâ tënë awe na peko ti so ala hunzi ti manda buku Bible afa nyen, ka ngbanga ti nyen ngbâa be-ta-zo ahunda ti tene e manda use buku ni? Ndali ti so ayeke kota ye ti tene gere ti awamandango Bible ni alï sese ngangu na yâ ti tâ tënë kozo si e zia lo gi lo oko. Ala yeke na bezoin ti tene “gunda ti ala alï sese” na yâ ti Christ na ala “yengi pëpe na yâ ti mabe” tongaso si ala luti ngangu na gbele akpale so ala yeke wara ande (aCol. 2:6, 7; 2 Tim. 3:12; 1 Pi. 5:8, 9). Nga, ti tene ala fa ye nzoni na ambeni zo, a lingbi ala wara “tâ hingango ye na ndo ti tâ tënë.” (1 Tim. 2:4). Tongana e hunzi abuku so use kue na azo so e yeke sara étude na ala, e yeke mû maboko na ala ti tene gere ti ala agbu sese nzoni na ndo ti “lege so ague na fini”. (Mat. 7:14). Ndali ti araison so, a yeke nzoni aita kue so ayeke manda Bible na mbeni zo asara ye alingbi na wango so a hunda ti manda abuku use so kue na azo so ala yeke sara étude na ala so alingbi ti tene ala wara batême.

4. Nyen la a-ancien alingbi ti sara ti mû maboko na afini zo ti hunzi mandango use buku ni?

⁴ A lingbi a-ancien abâ si azo kue so awara batême fini fini amanda buku “Ngbâ na yâ ti ndoye ti Nzapa” juska ahunzi (aProv. 27:23). Na ambeni ngoi, komité ti kusala ti congrégation alingbi ti hunda na mbeni wafango tënë ti manda Bible na mbeni zo so azia ti fa tënë aninga, ita ni ayeke manda na lo ambeni mbilimbili chapitre ti buku “Ngbâ na yâ ti ndoye ti Nzapa”. Tongana mo la a hunda na mo ti sara étude ni, dabe ti mo so mara ti étude tongaso a hunda ti tene amû ngoi mingi ape, me a lingbi mo sara ngangu nga mo duti be-ta-zo na kua so a mû na mo.

5. Nyen la a lingbi afini zo so ade ti hunzi pëpe ti manda buku “Ngbâ na yâ ti ndoye ti Nzapa” asara?

⁵ Jéhovah nga na ngbâa be-ta-zo ahinga mbilimbili ye so zo oko oko ayeke na bezoin ni ti tene “gunda ti ala alï sese” nga ala “yengi pëpe” na yâ ti mabe. Tongaso, mo hunzi ti manda use buku ni awe? Tongana mo wara batême na yâ ti angu so ahon ade ti ninga ape, nga ade mo hunzi ti manda ni ape, sara hio ti manda ni ahunzi! So apendere tënë si e yeke na ni na yâ ti fini buku so a sara ni ti mû maboko na e ti ngbâ “na yâ ti ndoye ti Nzapa”!—Jude 21.