Mbi lingbi biani na kusala ti fango tënë?
1. Ngbanga ti nyen a lingbi e tene pëpe so e kpa pëpe ti fa tënë nzoni?
1 Tongana a si na mo awe ti hunda tere ti mo na mara ti tënë tongaso, gi bê ti mo pëpe! A yeke ekole wala mbeni nzoni kode so a dü e dungo na ni la asara si e lingbi biani na kusala so pëpe. Lani, na popo ti adisciple ti Jésus, ambeni ayeke dä so azo abâ ala tongana “azo so amanda mbeti pëpe” nga tongana “asenge zo”. Me atâa so kue, ala hinga lani ti fa nzoni tënë ngbanga ti so, na yâ ti bê ti ala, ala ye ti sara ye tongana ti Jésus.—Kus. 4:13; 1 Pi. 2:21.
2. Jésus ayeke fa lani ye tongana nyen?
2 Lege so Jésus ayeke fa lani na ye: Fango ye ti Jésus lani akpengba pëpe, ague oko na ye so azo ahinga ni nzoni, nga azo amä yâ ni hio. Atënë so lo hunda, atapande so lo mû nga na akozo tënë, so akpengba pëpe, so lo tene na ngoi so lo zi yanga ti fa tënë na azo asara si azo adengi mê ti ala na lo (Mat. 6:26). Lo bi bê ti lo biani na azo (Mat. 14:14). Lo sara tënë na mbeto pëpe nga tongana zo so awara komandema ni. Lo hinga lo tene Jéhovah la atokua lo nga amû na lo ngangu ti sara na kusala ti lo ni.—Luc 4:18.
3. Na lege ti aye wa Jéhovah ayeke mû maboko na e ti fa tënë nzoni?
3 Jéhovah amû maboko na e: Na lege ti Mbeti ti lo nga na bungbi ti lo, Kota wafango ye na e ayeke fa na e aye so e yeke na bezoin ni ti fa na nzoni tënë tâ nzoni mingi (És. 54:13). Teti so Jéhovah asara si a sû na mbeti kode so Jésus afa na tënë, ye so amû maboko na e ti gbu li na ndo ni nga ti sara ye alingbi na ni. Jéhovah amû na e yingo vulu ti lo nga lo fa ye na e na lege ti abungbi ti congrégation (Jean 14:26). Na ndo ni, lo sara si e yeke na aita so ahinga ti fa tënë nzoni, so alingbi ti mû maboko na e ti ga anzoni wafango tënë.
4. Ngbanga ti nyen e lingbi ti tene so e lingbi biani na kusala ti fango tënë?
4 Na bango aye so, a yeke senge pëpe si e tene so e lingbi biani na kusala ti fango tënë, teti so “Nzapa la asara si e lingbi biani”. (2 aCor. 3:5). Tongana e zia lakue bê ti e na Jéhovah nga e sara kusala nzoni na aye so lo mû na e, e yeke ‘lingbi na yâ ti ye kue,’ nga e yeke wara ‘aye kue so e yeke na bezoin ni ti tene e sara nzoni kusala kue.’—2 Tim. 3:17.