Hundango ndo
◼ Tongana nyen zo oko oko alingbi ti sara ti tene abungbi ti congrégation aduti angoi ti mandango ye? (Deut. 31:12).
Ti fa so e ne Jéhovah mingi nga na abungbi so lo leke teti e, a yeke nzoni e kue e si hio na abungbi ti e na e duti nduru ti tene lo fa ye na e. A yeke nga nzoni ti duti na devant, e zia place ti peko na azo so ayeke na akete molenge wala na ala so peut-être aga na peko. Kozoni si bungbi ato nda ni, a yeke nzoni e sara si aye tongana téléphone na ambeni ye tongaso agboto lê ti aita pëpe. Tongana azo kue so aga na bungbi ni ane tere ti ala na angoi ti bungbi, fade ala yeke sara ye pëpe ti tene a gboto lê ti azo senge senge na ndo ti ala.—Zo-ti. 4:17; aPhil. 2:4.
Tongana ambeni fini zo aga na bungbi, ita so ahinga ala alingbi ti gi ti duti na tere ti ala. Ye so ayeke mû maboko mingi na azo ni mbilimbili tongana ala yeke na akete molenge na tere ti ala, teti so peut-être a yeke kozoni ti tene ala ga na bungbi la. Tongana a yeke ni la, ala ye ande peut-être ti duti na peko si, tongana a hunda ti tene ala bâ lege ti mbeni molenge, ala lingbi ti sigigi na Da ti Royaume na ti gboto lê ti azo na tere ti ala pëpe (aProv. 22:6, 15). A yeke nzoni ababâ na amama so ayeke na akete molenge aduti nde nde pëpe, teti so amolenge ni alingbi ti sara bruit. Tongana mbeni babâ wala mbeni mama aye ti suku na li ti molenge wala ti bâ lege ti lo, a yeke ka nzoni ti sigigi na molenge ni. Nga tongana lo hunzi awe, lo lingbi ti kiri na yâ ti da ni senge.
Aita ti accueil ayeke sara ka kue ti tene ngoi ti abungbi aduti tâ ngoi so e yeke mû ti voro na Jéhovah. Ala yeke mû maboko na asewa nga na azo so peut-être asi na peko si ala lingbi ti wara place ti duti. Ala yeke sara ye na ndara na ndembe so ala yeke gi place ti duti na azo si ala gboto lê ti aita senge senge pëpe. Tongana mbeni ye asi, so alingbi ti buba nzoni tambela ti bungbi, ala yeke sara nga ye na ndara na ndo so. Tongana a si so mbeni molenge asara ye so agboto lê ti azo, aita ti accueil alingbi ti mû maboko na yâ ti ye so na nzobe.
Azo kue so aga na bungbi ti voro Jéhovah alingbi ti sara si abungbi ti congrégation aduti angoi so zo alingbi ti manda ye dä na ndo ti Jéhovah nga na ndo ti aye so lo leke ti ga na mbeni fini dunia so siriri na mbilimbili ayeke na yâ ni.—aHéb. 10:24, 25.