Atënë so i hunda

◼ Kungba ti ala so ayeke yamba azo na abungbi ayeke so wa?

A lingbi ala so ayeke yamba azo na abungbi abala na wâ azo kue so aga na bungbi. Kusala ti ala andu mungo place na azo so aga na peko, dikongo azo so aga, batango ndo na lege ni nga si aduti kpô, na ti bâ lege ti tokuango pupu na yâ Da ti Royaume. A lingbi ala sala ye tongana akamarade na mbage ti azo, ti duti aita so amû li ni na yongo kungba ti ala.​—or l. 63-64.

Ala so ayeke yamba azo, a lingbi lê ti ala azi na ndo bezoin ti afini zo, ti sala si ala duti nzoni na ti mû maboko na ala ti wara ndo ti duti. A lingbi zo kue na yâ kongregation aduti ndulu ti mû maboko na afini zo ti hinga aita nga ti tene tele ti ala ayapu. Tongana ala yeke fa ndo ti duti na ala so aga na peko, a lingbi ala so ayeke yamba azo asala kue ti buba pëpe nzoni duti ti azo so aduti kozoni awe. Ngoi na ngoi, ala yeke mû na afini zo périodique so a yeke manda ni.

Batango nzoni tambela ti bungbi ayeke kota ye mingi. Teti so e yeke wa ababâ na mama ti ga na amolenge ti ala na abungbi, a lingbi ti si so ala duti kpô pëpe. Me tongana amolenge aduti kpô pëpe, mbeni oko ti ala so ayeke yamba azo alingbi ti mû maboko, peut-être na hundango na babâ wala mama ti molenge ni ti sigigi na lo kete. Tongana ababâ na mama so ayeke na amolenge aduti na ndo so ala lingbi ti sigigi hio, ala lingbi ti bâ lege ti akete molenge ti ala sân ti tene a gboto lê ti azo mingi.

Na ando so kpale ti siriri ayeke dä, a lingbi a mû yanga na ala so ayeke yamba azo ti kanga lege na azo so aye gi ti buba aye wala azo so aye tënë ti e pëpe. Tongana mbeni zo na yâ Da ti Royaume atara ti buba nzoni tambela ti bungbi ni, a lingbi a hunda na lo ti hon. Tongana lo ke na lo ngbâ ti sala kirikiri, a lingbi a-ancien ahiri ndo na lapolice. Na ambeni ndo, alingbi ti duti nzoni ti mû ambeni ita ti bâ ndo na ndo ti ziango akutukutu ti Da ti Royaume na ngoi ti abungbi.

Na ngoi ti dikongo azo, akota zo kue nga na amolenge so amä tënë na awara nzoni dä, même gi kete, a lingbi a diko ala.