Fa tënë na lege ti brochure Nzoni tënë
1. A sigigi lani na brochure Nzoni tënë ngbanga ti nyen?
1 Tongana ti so e sara lisoro na ndo ni na yâ ti Kusala ti Royaume ti juillet so ahon so, mbeni oko ti gbakuru so e yeke fa na ye na azo ayeke brochure Nzoni tënë so alondo na Nzapa! Aversê ti Bible so a fa tënë ti yâ ni ape alingbi ti mû maboko na azo ni ti tene ala manda ye so ayeke na yâ ti Bible. Atâa so a sû mingi ti ambeti ti e so e yeke manda na ye na azo na mbeni lege so zo alingbi ti manda na ye lo wani, a sigigi na brochure so ti tene mbeni zo si amû ni ti manda na ye na zo. Ni la, tongana e mû ni na mbeni zo, a lingbi e fa na lo tongana nyen la e yeke manda Bible na ni tongaso si zo ni alingbi ti hinga anzoni tënë so ayeke na yâ ti Bible.—Mat. 13:44.
2. Tongana nyen la e lingbi ti sara kua na brochure Nzoni tënë gi na kozo gango ti e?
2 Na kozo gango ti mo: Mo lingbi ti tene: “Mbi ga ti sara lisoro na mo ndali ti so azo ayeke gi bê ti ala na ndo ti gigi ti kekereke ti azo. Mo pensé so dutingo ti azo alingbi ti ga ande nzoni mbeni lâ? [Zia zo ni akiri tënë.] Na yâ ti Bible e yeke wara nzoni tënë so alingbi ti mû beku na e. Bâ ambeni hundango ndo so Bible akiri tënë na ni la.” Mû brochure ni na zo ni, na hunda na lo ti soro mbeni hundango tënë oko so agbu bê ti lo so ayeke na peko ti brochure ni. Na pekoni, fa tongana nyen la a yeke sara étude ni na sara kua na kozo paragraphe ti ye ti manda ni. Mbeni lege ni ayeke ti hunda na zo ni ambeni hundango tënë so aluti na ndo ti ye ti manda so mo soro, na pekoni fa na lo tongana nyen la brochure ni alingbi ti mû maboko na lo ti wara akiringo tënë so Bible afa. Tongana ye ti manda ni ague oko na mbeni vidéo so ayeke na ndo ti jw.org, ambeni wafango tënë ayeke zia vidéo ni na ngoi ni so.
3. Fa tongana nyen la e lingbi ti sara étude na zo na lege ti brochure Nzoni tënë.
3 Lege ti sara étude na ni: (1) Diko hundango tënë so a zia numero na devant ni nga so a sû ni vuko vuko so ti mû maboko na zo ni ti bata kota tënë ni. (2) Diko paragraphe so aga na pekoni. (3) Diko aversê so a zia na tere ni diko, na sara kua na ambeni hundango tënë na kode ti mû maboko na zo ni ti bâ tongana nyen la Bible akiri tënë na hundango tënë so a zia numero na devant ni. (4) Tongana mbeni paragraphe ayeke na gbe ti oko hundango tënë ni, kiri mo sara ye so a fa na point 2 na 3 so ayeke na nduzu ge. Tongana mbeni vidéo ni ague oko na hundango tënë ni si ade mo zia ni na zo ni ape, na yâ ti lisoro ni zia vidéo ni lo bâ. (5) Ti hunzi na ni, hunda na zo ni ti kiri tënë na hundango tënë so a zia numero na devant ni ti bâ wala lo gbu nda ni.
4. Nyen la a yeke mû maboko na e ti sara kua na pendere gbakuru so na kode?
4 Gi ti hinga atënë ti yâ ti brochure so nzoni. Sara kua na ni lakue tongana lege ayeke dä. Kozo ti sara étude oko oko, gbu li na ndo ti zo so mo yeke gue ti sara étude ti lo, bâ tongana nyen la mo lingbi ti ga na lo ti yeda na atënë ni nga sara kua na aversê so ayeke na yâ ti ye ti manda ni (aProv. 15:28; Kus. 17:2, 3). Tongana mo sara kua na brochure so mingi mo yeke wara kode, na mo yeke bâ ni tongana mbeni gbakuru so mo ye mingi ti fa na tâ tënë na azo.