Hundango ndo

◼ Nyen la mbilimbili e lingbi ti sara ti mû maboko na apionnier?

Na ndo ti dunia kue na ngu ti kusala 2009, aita kue so wungo ti ala ayeke nduru na 800 000 asara kua tongana pionnier permanent nga na pionnier spécial. Apionnier so amû kozo lengo ti ngoi ti ala, ti ngangu ti ala nga na ti aye ti mitele so ala yeke na ni ti maï na kusala ti fango nzoni tënë ti Royaume (aProv. 3:9). So ngia si Jéhovah ayeke na ni teti angangu so ala sara! Na lege wa e lingbi ti duti na bango ndo ti Jéhovah na e sara si ala duti na ngia nga ala gbu ngangu na yâ ti kusala so?

Kite ayeke pëpe so anzoni tënë so ayeke sigigi na yanga ti e alingbi ti kpengba ala ti ngbâ ti sara na Jéhovah tongana pionnier (aProv. 25:11). E lingbi ti leke yâ ti kapa ti fango tënë ti e ti yenga oko oko ti fa tënë legeoko na ala? E yeke fa nga so e yeke mû maboko na ala na lege ti ndoye na yambango ala nga ngoi na ngoi na tisango ala na ndo ti e ti te kobe.​—1 Pi. 4:8, 9.

Bible atene na e so fade Jéhovah ayeke mû na azo so azia Royaume ti lo na kozo ndo aye so ala yeke na bezoin ni (Ps. 37:25; Mat. 6:33). Mbeni lege so lo yeke mû na ye ayeke na lege ti aita ti e so aye e mingi (1 Jean 3:16-18). Biani, apionnier aku pëpe ti tene aita la amû nginza na ala. A lingbi ala duti nduru pëpe ti tene na aita so ala yeke na bezoin ti nginza. Ye oko, tongana e zi lê ti e nzoni, e lingbi ti sara ambeni ye ti mû maboko na apionnier so ayeke be-ta-zo ti ‘kanga lê ti ye so atia ala’.​—2 aCor. 8:14, 15.

Na ngoi ti akozo Chrétien, tongana Phœbé so ayeke mbeni ita ti congrégation ti Cenchrées so ayeke fa tënë mingi ayeke gue na Rome, Paul awa aita ti Rome lo tene: “Ala yamba lo na yâ ti Seigneur na mbeni lege so alingbi na ala so ayeke nzoni-kue . . . ala mû maboko na lo na yâ ti aye kue so lo yeke duti na bezoin ti ala dä.” (aRom. 16:1, 2). Lege azi nga na e ti mû maboko na lege ti ndoye na aita ti congrégation so azia pëpe ti fa nzoni tënë tongana pionnier permanent nga na pionnier spécial.​—Kus. 5:42.