Hundango ndo

◼ Zo wa la alingbi ti tokua acoupon na filiale wala ti hunda étude na lege ti Internet?

Na yâ ti ambeti ti e a yeke wara ka acoupon so mbeni zo alingbi ti sû ye dä ti tokua na filiale ti hunda mbeti wala ti tene mbeni Témoin ti Jéhovah aga abâ lo. Nga, mbeni zo alingbi ti sara kua na site ti e www.watchtower.org ti hunda na mbeni étude. Aye ni so amû maboko na azo mingi ti hinga tâ tënë. Ye oko, akpale asi teti so ambeni wafango tënë asara kua na agbakuru ni so ti tene a tokua mbeti na afami ti ala wala na akamarade ti ala wala ti tene mbeni ita aga abâ ala.

Ambeni zo so filiale atokua mbeti na ala sân ti tene ala la ahunda ni adema, ala tene so bungbi ti e ayeke son li ti ala nga so lo yeke na mbeni mbeti so iri ti ala ayeke na ndo ni so amû lege na lo ti tokua lakue ambeti na ala. Awafango tënë so a tokua ala ti gue ti bâ azo ni sân ti tene azo ni wani la ahunda ala, li ti ala aga kirikiri na ngoi so azo ni asara ngonzo na tere ala. Tongaso, a yeke na zo ni wani ti tokua acoupon na filiale wala ti hunda étude na lege ti Internet, me a yeke pëpe na mbeni wafango tënë ti sara ni na place ti lo. Tongana mbeni ita asara tongaso si filiale ahinga ni, mingi ni filiale ayeke kiri tënë na ni pëpe.

Tongaso, e lingbi ti sara tongana nyen ti mû maboko na lege ti yingo na mbeni fami wala mbeni kamarade? Tongana mo ye si lo wara mbeni mbeti, mo lingbi ti tokua ni na lo mo wani tongana mbeni cadeau ape? Tongana a nzere na lo na lo ye si mbeni ita aga abâ lo me mo hinga pëpe lege ti tingbi na a-ancien ti congrégation ti ndo so lo yeke dä, sû mbeti Veuillez suivre l’intérêt (S-43) na mû ni na secrétaire ti congrégation ti mo ti tene lo bâ ni nga lo tokua ni na filiale. Me, tongana zo ni ayeke na da ti kanga, na geôle wala na hôpital ti azo ti kobela ti li, bâ filiale pëpe ti tene a tokua na lo mbeti wala mbeni zo. Nde na so, wa gi lo ti bâ aita so ayeke gue ka na mara ti ando ni so wala lo wani lo sû mbeti na filiale.