“Zia ala ngbâ na yâ ti ndoye ti Nzapa”
1. A sara buku “Zia ala ngbâ na yâ ti ndoye ti Nzapa” ngbanga ti nyen?
1 E yeke ku kungo na nzara ni ti kiri ti manda buku “Zia ala ngbâ na yâ ti ndoye ti Nzapa” na bungbi ti Mandango Bible ti Congrégation so ayeke to nda ni na yenga ti 5 novembre 2012! Mbeti so Bebungbi atokua na zo oko oko kue so andoye Jéhovah ahunzi na tënë so: “E ye si buku so amû maboko na mo ti ngbâ ti sara ye alingbi na tâ tënë na yâ ti gigi ti mo kue ti tene mo ‘ngbâ na yâ ti ndoye ti Nzapa . . . si mo wara fini ti lakue lakue.’—Jude 21.”
2. Buku so ayeke mû ande maboko na e na ndo ti atënë wa so andu fini ti e?
2 Aye so e yeke ku ti manda: Tënë ti sarango kamarade, angia, nengo zo so ayeke na komandema, asarango ye ti e ti lâ oko oko, mariage, tënë ti yanga ti e nga na angobo: afango ye ti Bible andu aye so tongana nyen? Fade mandango ye ni ayeke leke yingo-ti-hinga ti zo oko oko ti lingbi na afango ye ti Nzapa so ayeke mbilimbili, so ayeke na yâ ti Bible (Ps. 19:8, 9). Na ngoi so e yeke kono hingango ndo ti e na ndo ti bibe ti Jéhovah, e yeke duti nduru ti mä yanga ti lo na yâ ti ambage kue ti fini ti e ngbanga ti so e ye ti mû ngia na lo.—aProv. 27:11; 1 Jean 5:3.
3. Ngbanga ti nyen a lingbi e sara kue ti mû mbage na mandango ye ni yenga na yenga?
3 Sara kue ti mû mbage na mandango ye ni: Na ngoi so mo yeke leke tere ti mo, zia na bê ti mo ti sepela Nzapa na popo ti azo ti lo so abungbi (aHéb. 13:15). Fade azo kue ti congrégation ayeke bungbi legeoko ti manda buku so. Teti mbage so a yeke manda yenga na yenga ayo pëpe, fade a yeke mû lege na e ti leke ni nzoni tongaso e yeke gi bê ti e pëpe ti fa na amba ti e ye so e manda. Atënë ti e so e leke kozoni nzoni na so ayeke nduru ayeke pusu amba ti e ti fa ndoye na ti sara anzoni kusala; ye so ayeke sara si mandango ye ni anzere na ayapu (aHéb. 10:24). Na ndo ni, fade ngia ti e ayeke ga kota tongana zo oko oko afa tënë ti mabe ti lo na gigi.
4. Ngbanga ti nyen a hunda na e ti bata acommandement ti Jéhovah?
4 Na ndangba bï ti fini ti lo na sese tongana zo, Jésus azia kamba na popo ti batango commandement ti Nzapa na ngbango na yâ ti ndoye ti Nzapa (Jean 15:10). Na lege ti buku “Ndoye ti Nzapa”, fade e yeke kiri ti leke na bê ti e mingi ti sara ye alingbi na afango ye ti Bible na yâ ti fini ti e ti lâ oko oko, na ti “ngbâ na yâ ti ndoye ti Nzapa”.—Jude 21.