Mû maboko na azo ti mä Nzapa
1. Na Kota Bungbi ti District ‘Zia Royaume ti Nzapa aga!’ abrochure wa a sigigi na ni, na ngbanga nyen ayeke akpengba gbakuru ti kua?
1 Na Kota Bungbi ti District ‘Zia Royaume ti Nzapa aga!’, a sigigi na afini brochure use Mä Nzapa si mo wara fini ti lakue lakue na Mä Nzapa so atënë ayeke na yâ ni mingi pëpe. Teti so ambeti ayeke na yâ ni mingi pëpe, a lingbi ti kiri na pekoni hio na ambeni yanga ti kodoro. Na ngoi so a sigigi na Mä Nzapa si mo wara fini ti lakue lakue na anglais a yeda ti kiri na pekoni na ayanga ti kodoro 431.
2. Zo wa la a yeke wara ande ye ti nzoni na lege ti abrochure so?
2 Zo wa la mbilimbili ayeke wara ande ye ti nzoni na lege ti abrochure so? Zia e bâ aye so a yeke si ka mingi na yâ ti dunia:
• Na kozo gango ti lo wala na ngoi ti vizite mbeni wafango tënë asara lisoro na mbeni zo, lo bâ so zo ni ahinga ti diko mbeti pëpe wala lo yeke diko mbeti nzoni pëpe.
• Mbeni wafango tënë so ayeke fa tënë na azo so ambeti ti e ayeke mingi pëpe na yanga ti kodoro so ala yeke tene wala mbeti ni ayeke na yanga ti kodoro ti ala ni pëpe. Wala mingi ti azo ti territoire ni ayeke tene yanga ti kodoro ni nzoni mingi me ala hinga ti diko ni pëpe.
• Mbeni wafango tënë so ayeke fa tënë na yâ ti territoire na yanga ti awambongi.
• Kete molenge so ade ti hinga ti diko mbeti pëpe si babâ wala mama aye ti fa tâ tënë na lo.
3. A sara brochure Mä Nzapa tongana nyen?
3 Lege so a sara na ni: Mo yeke wara ngbâ ti ambeti na yâ ni pëpe, mingi ni na gbe ti lembeti ni a yeke wara gi nduru tënë na mbeni versê so agboto lê na ndo ti akota tënë ni. Ngbanga ti nyen? Tara ti bâ so a mû na mo mbeni brochure so a sû ni na yanga ti kodoro so mo hinga ti diko ni pëpe. Atâa tongana apendere foto ayeke na yâ ni, a yeke nzere ande na mo? Ti azo mingi a yeke nzere ande na ala pëpe. Legeoko nga, ambeti so a sû gbâ ti atënë na yâ ni ayeke sara si bê ti azo so ahinga ti diko ye pëpe ayeke nze. Ni la, a leke nzoni mingi afoto so ayeke na lembeti oko oko, a zia mbeni kete ye tongana flèche na tere ti afoto ni ti fa foto so aga na peko ti mba ti lo.
4. A sara brochure Mä Nzapa si mo wara fini ti lakue lakue tongana nyen?
4 Gi a-oko foto so a yeke wara na yâ ti Mä Nzapa ni la ayeke na yâ ti Mä Nzapa si mo wara fini ti lakue lakue. A leke ni ti sara na étude na azo so ahinga ti diko mbeti kete wala azo so ayeke manda ti diko mbeti. Zo so ayeke manda Bible na mbeni zo alingbi ti sara kusala na Mä Nzapa si mo wara fini ti lakue lakue atâa tongana wamandango ye ni ayeke ti lo na brochure Mä Nzapa. Na nduzu na mbage ti wali mo yeke wara hundango ndo so akiringo tënë ni ayeke na lê ti mbeti ni mbage na mbage. A zia aversê na tere ti akete tënë so a sû na tere ti afoto ni. Na gbe ti mingi ti alembeti ni a yeke wara a-encadré so a zia na yâ ni ambeni tënë na aversê ti sara lisoro na ndo ni, tongana a lingbi na ngangu ti wamandango ye ni.
5. Tongana nyen nga na ngoi wa e lingbi ti mû abrochure so na zo?
5 Lege ti sara kua na ni: Mo lingbi ti sara kua na brochure so na fango tënë da na da tongana mo bâ so a yeke nzoni ti sara ni, atâa a yeke kangbi mbeni mbeti nde na yâ ti nze ni. (Bâ encadré “A yeke fa ni tongana nyen?”) Tongana mo kiri ti sara vizite na mbeni zo so asara nzara ti tënë ni, mo lingbi ti tene na lo so mo yeke na mbeni ye ti fa na lo. Mû na lo brochure ni.
6. E yeke fa ye ande na lege ti abrochure so tongana nyen?
6 Teti so na yâ ti Mä Nzapa ahundango tënë ayeke dä pëpe, e yeke sara étude na ni pëpe na lege ti hundango tënë na kiringo tënë tongana ti so e yeke sara ka na yâ ti buku Bible afa. Na yâ ti ngobo ti azo kue a yeke nzere ka na ala ti mä ambaï. Tongaso sara kua na afoto so ayeke na yâ ni ti fa na zo ambaï so a sû na yâ ti Bible. Fa nda ti foto ni na lo. Sara ni na ngia. Hunda na zo ni ti sara tënë na ndo ti ye so lo bâ nga ti fa atënë ti bê ti lo. Diko aversê so ayeke na gbe ti lembeti ni, na sara lisoro na lo na ndo ni. Hunda tënë na lo ti tene lo mû mbage na lisoro ni, na gi ti bâ wala lo mä yâ ti aye ni. Tongana ala yeke sara kua na Mä Nzapa si mo wara fini ti lakue lakue, ala diko atënë nga na aversê so a zia na tere ti afoto oko oko so.
7. E lingbi ti mû maboko na wamandango Bible ni ti maï tongana nyen?
7 Mû maboko na wamandango ye ni ti maï: Peut-être lisoro ti ala ni amû na zo ni nzara ti manda ye na ti diko ye, ti tene lo wani lo lingbi ti manda ye na ndo ti Jéhovah (Mat. 5:3; Jean 17:3). Ye oko, tongana ala yeke manda ye na yâ ti Mä Nzapa, na mbeni ngoi tongana zo ni aye mo lingbi ti fa na lo dikongo mbeti, na pekoni kiri na étude ni na yâ ti Mä Nzapa si mo wara fini ti lakue lakue. Atâa brochure wa la mo manda na zo ni juska a hunzi, lo lingbi ti wara batême pëpe. A lingbi mo manda ye na lo na yâ ti buku Bible afa wala na yâ ti mbeni mbeti so ayeke mû lege na lo ti hinga ye mingi na ndo ti Bible.
8. Ngbanga nyen mo kiri singila teti afini gbakuru ti fango na tënë so?
8 Ti tene azo awara fini ti lakue lakue, a lingbi ala mä Kota Gbia ti Dunia Kue (És. 55:3). Na ye so bê ti Jéhovah aye ayeke ti tene “mara ti azo nde nde kue”, so na popo ni azo so ahinga ti diko mbeti pëpe, amanda ti mä lo (1 Tim. 2:3, 4). E kiri singila na Nzapa so e wara afini gbakuru so e lingbi ti sara na kua ti fa na azo tongana nyen ti mä lo!
[Encadré na lembeti 3]
A yeke fa ni tongana nyen?
Fa na zo ni lembeti 2-3, hunda lo: “Mo ye ti duti na mara ti ndo tongaso? [Zia zo ni akiri tënë.] Azendo ti Bible afa so Nzapa aga nduru awe ti leke dunia so si aga mbeni pendere ndo so siriri ayeke dä, na fade zo oko ayeke bâ pasi pëpe ndali ti yere wala kobela. Bâ ye so e lingbi ti sara ti duti na mara ti ndo tongaso. [Diko Ésaïe 55:3, so a zia na nduzu na lembeti 3.] Versê ni atene na e ‘ti ga’ na Nzapa na ‘ti mä’ lo. Me e yeke mä Nzapa tongana nyen?” Zi na lembeti 4-5 na sara lisoro na lo na ndo ti kiringo tënë ni. Tongana lo yeke na ngoi pëpe, mû na lo brochure ni na mä tere na lo ti kiri na ti sara lisoro na lo na ndo ti kiringo tënë ni.