Wara ngia na yâ ti ngangu kua ti mo
1 A leke zo ti ‘wara ngia na lege ti kusala ti lo.’ (Zo-ti. 2: 24). Ye oko, tongana e wara ye ti nzoni pëpe na peko ti kusala ti fango tënë ti e, bê ti e ayeke nze. Ye so alingbi ti sara si e girisa ngia ti e nga e kiri na peko na yâ ti kua ni. Nyen la alingbi ti mû maboko na e ti ngbâ lakue ti duti na nzoni bango ndo?
2 Duti na nzoni bango ndo: Dabe ti mo so azo mingi pëpe la ayeda lani na fango ye ti Jésus, me kite ayeke pëpe so lo sara kusala ti lo nzoni (Jean 17:4). Na yâ ti toli ti zo ti lungo ye, Jésus afa kozoni awe so bê ti azo mingi ayeke yeda pëpe na tënë ti Royaume so a haka ni na lê ti kobe (Mat. 13:3-8, 18-22). Ye oko, ngangu kua ti e asara aye mingi.
3 Na lege wa e lë alê ni mingi: Na yâ ti toli ti Jésus, lo fa so zo so ayeda na tënë ni ayeke “lë alê ni.” (Mat. 13:23). Tongana lê ti blé asigi na amaï, a yeke dü pëpe mbeni kete keke ti blé, me mbeni fini lê ti kobe. Alê ni so e lu, a yeke lakue pëpe afini disciple, me a yeke gbâ ti alê ti kobe so e lu na lege ti fango tënë ti Royaume. Ye so asara si e yeke na “ngia”, atâa azo ayeda na tënë ti e wala ala yeda na ni pëpe. E yeke sara si iri ti Jéhovah aga nzoni-kue (És. 43:10-12; Mat. 6:9). E yeke na pasa ti sara kua maboko na maboko na Nzapa (1 aCor. 3:9). Na mara ti “lengo ti yanga” tongaso anzere mingi na Jéhovah.—aHéb. 13:15, 16.
4 Na ndo ni, ngangu kua ti e alingbi ti ga na aye ti nzoni so e bâ pëpe. Peut-être ambeni zo so amä lani afango ye ti Jésus aga adisciple ti lo pëpe juska na ngoi so lo hunzi kusala ti lo na sese. Legeoko nga, ngongoa ti Royaume so e lu na yâ ti bê ti mbeni zo alingbi pëpe ti to nda ti maï, me ambeni ngoi na pekoni zo ni alingbi ti ga na yâ ti tâ tënë sân ti tene e hinga. Biani, kusala ti e ti fango tënë ayeke ga na aye ti nzoni mingi. Ni la, zia e “ngbâ ti lë mingi” nga e fa so e yeke adisciple ti Jésus.—Jean 15:8.
[Ahundango tënë ti manda na ye]
1. Nyen la alingbi ti sara si e kiri na peko na yâ ti kua ti fango tënë?
2. Ngbanga ti nyen a lingbi e duti na nzoni bango ndo na ndo ti sarango ye ti azo na ndo ti fango tënë ti e?
3. Na lege wa e “lë alê” ni atâa tongana azo ayeda na fango tënë ti e ape?
4. Aye wa alingbi ti ga na peko ti fango tënë ti e sân ti tene e hinga?