Découragé ape

1. Ngbanga ti nyen la e yeke na ngia ti duti aTémoin ti Jéhovah?

E YEKE na ngia mingi ti duti aTémoin ti Jéhovah. Iri ti Nzapa ayeke na ndö ti e, nga e yeke sara ye alingbi na iri ti e na lege so e fâ tënë nga e sara adisciple. E yeke na ngia tongana e wara lege ti mû maboko na mbeni zo so ayeke “nduru ti yeda na tënë ni ti wara fini ti lakue lakue” ti ga mbeni zo so amä na bê (Kus. 13:48). E yeke na mara pensé ti Jésus, so “bê ti [lo] asi singo na ngia na yâ ti yingo vulu” na ngoi so adisciple ti lo akiri na peko ti so ala wara anzoni ye na fango tënë.—Luc 10:1, 17, 21.

2. Tongana nyen la e peut ti fa so kua ti fango tënë ayeke kota ye mingi na lê ti e?

² Kua ti fango tënë ayeke kota ye mingi na lê ti e. Bazengele Paul awa Timothée, lo tene: “Mo sara hange lakue na aye so abâ mo nga na fango ye ti mo.” Na pekoni, lo tene: “Mo ngbâ gï dä, ndali ti so na sarango tongaso mo yeke sö ande mo wani nga na ala so ayeke mä mo.” (1 Tim. 4:16). Fango tënë ti e ayeke sö fini ti azo. E yeke sara hange lakue na aye so abâ e ndali ti so e yeke azo ti gbe ti Royaume ti Nzapa. E ye lakue ti sara ye so amû gonda na Jéhovah nga so ague oko na nzoni tënë so e fa (aPhil. 1:27). E yeke fa so e ‘sara hange na fango ye ti e’ na lege so e leke terê ti e nzoni ti fa tënë nga e hunda Jéhovah ti sara tufa na ndö ti e kozo si e fa tënë na azo.

3. Eskê azo kue ayeke yeda ti mä tënë ti Royaume? Mû mbeni tapande ti fa ni.

³ Atâa e sara ngangu ti fa tënë nzoni, peut-être nzoni tënë ti Royaume agbu bê ti azo ti territoire ti e ape. Bâ ye so asi na Ita-koli Georg Lindal, so afa tënë lo oko na ando nde nde na Islande ti londo na ngu 1929 ti si na ngu 1947. Lo mû ambeti saki mingi na azo, me zo oko aga Témoin ape. Lo tene: “Na bango ni, ambeni zo ni ake tâ tënë, me mingi ti ala asara sanka ni.” Même na peko ti so amissionnaire so alondo na Galaad asi nga afa tënë mingi, a sara ngu gumbaya na pekoni la ambeni zo ti Islande amû terê ti ala na Jéhovah nga ala wara batême.b

4. Tongana azo ake ti mä nzoni tënë apeut ti sara e tongana nyen?

⁴ Tongana azo ake ti mä nzoni tënë, vundu ayeke sara e. Ye so asara lani Paul apeut ti sara e; lo yeke lani na “kota vundu nga ye angbâ ti son [lo]” ndali ti so mingi ti aJuif ake ti yeda na Jésus tongana Messie so a mû zendo ti lo (aRom. 9:1-3). Peut-être mo yeke manda Bible na mbeni zo. Mo sara kue ti fa ye na lo nzoni nga mo sambela mingi ndali ti lo. Me lo sara ye alingbi na aye so lo yeke manda ape na mo doit ti zia ti sara étude na lo. Wala peut-être ade mo manda Bible na mbeni zo juska na batême ape. Eskê a yeke faute ti mo nga fango tënë ti mo anzere na Jéhovah ape? Na yâ ti article so, e yeke kiri tënë na ahunda use: (1) Aye wa la afa so fango tënë ti e alë lengo? (2) Nyen la e doit ti ku ti wara na ngoi so e yeke fa tënë na azo?

AYE WA LA AFA SO FANGO TËNË TI E ALË LENGO?

5. Ngbanga ti nyen la kua ti Jéhovah so e yeke sara aga lakue pëpe na aye so e ku ni?

⁵ Bible atene na ndö ti zo so asara ye so bê ti Nzapa aye, atene: “Ye kue so lo sara ayeke ga nzoni.” (Ps. 1:3). Me so aye ti tene ape so ye kue so e sara ndali ti Jéhovah ayeke tambela tongana ti so e ye. Gigi ti zo “asi singo na aye ti vundu” ndali ti so e kue e yeke mbilimbili-kue ape (Job 14:1). Nga, aye so azo ayeke sara ti kanga lege na e apeut ti sara si, teti mbeni ngoi, e peut ti fa tënë tongana ti so e yeke sara ka ape (1 aCor. 16:9; 1 aThes. 2:18). Tongaso, na lê ti Jéhovah, nyen la afa so e fa tënë nzoni? Zia e bâ ambeni mama-ndia so apeut ti aidé e ti kiri tënë na hunda so.

6. Nyen la afa so, na lê ti Jéhovah, e fa tënë nzoni?

⁶ Jéhovah abâ a-effort ti e nga na gbungo ngangu ti e. Tongana e fa tënë na bê ti e kue nga e sara ni na ndoye atâa azo amä e wala ala mä e ape, na lê ti Jéhovah, e fa tënë nzoni. Paul atene: “Nzapa ayeke kirikiri pëpe si lo girisa kusala ti ala nga na ndoye so ala fa ndali ti iri ti lo na lege so ala sara kua na azo ti be-vulu na ala ngbâ ti sara kua na ala.” (aHéb. 6:10). Jéhovah agirisa a-effort ti e nga na ndoye ti e ape, même tongana a-effort ti e aga na aye ti nzoni ape. Tongaso, tënë so Paul atene na aCorinthien abâ nga mo, lo tene: “Tongana a yeke tënë ti aye ti Seigneur, . . . ngangu kua so [mo] sara ayeke ngbâ senge senge pëpe”, même tongana mo wara ye ti peko ni ape.—1 aCor. 15:58.

7. Fason so bazengele Paul asara tënë ti kua ti lo ti fango tënë afa na e nyen?

⁷ Bazengele Paul ayeke lani mbeni nzoni missionnaire, lo sara si afini congrégation abâ gigi na yâ ti agbata mingi. Me na ngoi so azo akasa Paul atene lo fa ye nzoni ape, lo fa wungo ti azo so lo aidé ala ti ga aChrétien ape. Me Paul atene: ‘Mbi hon ala mingi na angangu kua.’ (2 aCor. 11:23). Legeoko tongana Paul, girisa ape so a-effort so e sara nga na gbungo ngangu ti e ayeke aye so ayeke kota mingi na lê ti Jéhovah.

8. Nyen la a yeke nzoni e girisa ape na ndö ti kua ti e ti fango tënë?

⁸ Fango tënë ti e azia ngia na bê ti Jéhovah. Jésus atokua lani adisciple 70 ti fa tënë ti Royaume, ala ‘kiri na ngia na bê ti ala’ na peko ti fango tënë ni. Nyen la asara lani si ala yeke na ngia? Ala tene: “Même asioni yingo awoko terê na gbe ti e tongana e di iri ti mo.” Me Jésus aleke bango ndo ti ala na lege so lo tene: “Ala duti na ngia pëpe ndali ti so asioni yingo awoko terê na gbe ti ala. Me ala duti na ngia ngbanga ti so a sû iri ti ala na mbeti na yayu awe.” (Luc 10:17-20). Jésus ahinga lani so fango tënë ti ala ayeke ga lakue na aye ti nzoni ape. Na popo ti azo so amä lani adisciple ti Jésus, e hinga ape azo oke la aga aChrétien. Adisciple adoit ti duti na ngia ndali ti akua so ala sara, me ala doit ti duti na ngia mingi ndali ti so ala hinga so angangu kua so ala sara azia ngia na bê ti Jéhovah.

9. Ti gue oko na aGalate 6:7-9, nyen la e yeke wara tongana e gbu ngangu na yâ ti kua ti e ti fango tënë?

⁹ Tongana e gbu ngangu na yâ ti kua ti e ti fango tënë, e yeke wara fini ti lakue lakue. Tongana e sara kue ti fa nzoni tënë nga ti fa ye, andâ e yeke “lu ye ndali ti yingo” na lege so e zia lege na yingo vulu ti Nzapa ti sara kua na ndö ti e. Tongana e “woko pëpe”, Jéhovah atene so lo yeke mû na e fini ti lakue lakue, atâa e mû maboko na mbeni zo ti wara batême wala pëpe.—Diko aGalate 6:7-9.

NYEN LA E DOIT TI KU TI WARA TONGANA E YEKE FA TËNË NA AZO?

10. Nyen la ayeke sara si azo amä e wala pëpe?

¹⁰ Kozoni kue, ye so ayeke na yâ ti bê ti azo la ayeke sara si ala mä e wala pëpe. Jésus afa so tënë so ayeke tâ tënë na yâ ti toli ti lo na ndö ti zo so alu ye na ndö ti mara ti asese nde nde so gï oko alë lengo (Luc 8:5-8). Jésus atene lani so asese ni aye ti sara tënë ti bê ti azo so ayeke nde nde so apusu ala ti sara ye na ngoi so ala mä “tënë ti Nzapa.” (Luc 8:11-15). Legeoko tongana zo ti lungo ye so, e lingbi pëpe ti sara si mbeni ye amaï na yâ ti bê ti azo so e fa tënë na ala. Kua ti e ayeke ti ngbâ ti lu nzoni ngongoa ti Royaume. Bazengele Paul atene “zo oko oko ayeke wara ande futa ti lo alingbi na kua ti lo wani,” me pëpe alingbi na aye ti peko ti kua ti lo.—1 aCor. 3:8.

11. Ngbanga ti nyen la Noé ayeke lani “wafango tënë ti ye so ayeke mbilimbili” so asara kua ti lo nzoni? (Bâ foto ti couverture ni.)

¹¹ Awakua ti Jéhovah ti ândö ayeke fa lani tënë na azo so aye ti mä ala ape. Na tapande, Noé ayeke lani “wafango tënë ti ye so ayeke mbilimbili” peut-être teti angu mingi (2 Pi. 2:5). Kite ayeke dä ape so lo pensé lani so azo ayeke mä tënë so lo fa, me Jéhovah atene na lo ape so a yeke duti tongaso. Na ngoi so Nzapa amû yanga na Noé ti leke arche, lo tene: “Mo yeke lï na yâ ti arche ni, mo na amolenge ti mo ti koli, wali ti mo nga na awali ti amolenge ti mo.” (Gen. 6:18). Na ngoi so Jéhovah afa na Noé konongo ti arche ni, peut-être lo bâ so azo mingi ayeke mä ande lo ape ndali ti so place ayeke dä ape ndali ti ala na yâ ti arche ni (Gen. 6:15). Tongana ti so e hinga, zo oko amä même lani Noé ape (Gen. 7:7). Eskê Jéhovah abâ lani Noé tongana zo so afa tënë nzoni ape? Ên-ën! Na lê ti Nzapa, Noé ayeke lani nzoni wafango tënë ndali ti so lo sara tâ gï ye so Jéhovah ahunda na lo ti sara.—Gen. 6:22.

12. Tongana nyen la prophète Jérémie awara lege ti fa tënë na ngia atâa so azo asara sanka ti tënë ni nga akanga lege na lo?

¹² Legeoko nga, prophète Jérémie afa lani tënë teti angu mingi atâa so azo asara sanka ti tënë ni nga akanga lege na lo. Lo découragé lani mingi ndali ti so awato ‘azonga lo nga ahe lo’ asara si lo pensé ti zia kua ti lo (Jér. 20:8, 9). Me Jérémie azia lani kua ni ape. Nyen la a-aidé lo ti ngbâ ti sara kua ti lo nga ti wara ngia dä? Lo zia lani li ti lo na ndö ti akota ye use. Kozo ni, tënë ti Nzapa so Jérémie ague na ni na azo andu tënë ti “nzoni gigi ti kekereke nga na beku.” (Jér. 29:11). Use ni, iri ti Jéhovah ayeke na ndö ti Jérémie (Jér. 15:16). Na yâ ti sioni dunia so, e nga kue e yeke fa tënë ti beku na azo nga iri ti Jéhovah ayeke na ndö ti e aTémoin ti lo. Tongana e zia li ti e na ndö ti akota ye use so, e peut ti duti na ngia atâa azo amä e ape.

13. Nyen la e manda na lege ti toli ti Jésus so ayeke na Marc 4:26-29?

¹³ Ti tene mbeni zo amä na bê, a yeke mû ngoi. Jésus afa so tënë so ayeke tâ tënë na yâ ti toli ti lo ti zo ti lungo ye so alango. (Diko Marc 4:26-29.) Na peko ti so zo ti lungo ye ni alu angongoa ti kobe ni, a maï yeke yeke na lo lingbi pëpe ti sara mbeni ye so ayeke sara si a maï hio mingi. Mo kue peut-être mo doit ti ku aninga si mo bâ so zo so mo yeke manda Bible na lo asara ye alingbi na aye so lo manda. Tongana ti so mbeni zo ti fango yaka alingbi pëpe ti forcé aye so lo lu ti maï tongana ti so lo ye, e nga kue e lingbi pëpe ti forcé azo so e yeke manda Bible na ala ti gue na li ni tongana ti so e ye. Tongaso, découragé ape wala zia lege ti sarango a-étude ni ape tongana mo bâ so ala gue na li ni hio hio ape tongana ti so mo ye. Tongana ti mbeni zo ti fango yaka, kua ti sarango adisciple ahunda kangango bê.—Jacq. 5:7, 8.

14. Tapande wa la afa so aye ti peko ti kua ti fango tënë ti e ayeke si yeke yeke?

¹⁴ Na yâ ti ambeni territoire, teti angu mingi e yeke bâ aye ti peko ti kua ti fango tënë ti e ape. Bâ tapande ti Gladys na Ruby Allen so ala yeke aita. Na ngu 1959, a tokua ala tongana apionnier permanent na mbeni kete gbata ti Quebec na Canada.c Ndali ti so azo ti ndo ni asara mbeto ti ye so avoizin nga na aprêtre ayeke sara wala ayeke tene, ala ye ti mä tënë ti Royaume ape. Gladys atene: “E fa lani tënë da na da ngbonga miombe lango oko oko na yâ ti ngu use, me zo oko amä e ape. Tongana e pika yanga-da si azo abâ so e la, ala yeke zi ni ape. Me e découragé lani ape.” Ambeni ngoi na pekoni, bango ndo ti azo achangé na azo mingi akomanse ti mä e. Ti fadeso, congrégation ayeke ota na yâ ti kete gbata so.—És. 60:22.

15. Kozo mbeti na aCorinthien 3:6, 7 afa na e nyen na ndö ti kua ti sarango adisciple?

¹⁵ A bezoin gbâ ti azo ti mû maboko na mbeni zo ti ga disciple. Aita kue ti congrégation apeut ti mû maboko na mbeni zo ti wara batême. (Diko 1 aCorinthien 3:6, 7.) Na tapande, mbeni ita azia mbeni tract wala mbeni périodique na mbeni zo so asara nzara ni. Ita ni abâ so ngoi ti lo amû lege na lo ti kiri ti bâ zo ni ape, tongaso lo hunda na mbeni ita nde ti gue ti bâ zo ni. Ita ni awara lege ti komanse étude na zo ni. Lo nga, lo tisa ambeni ita ti tene ala na lo ague asara étude ni, na ala oko oko kue akpengba zo ni na alege nde nde. Aita kue so wamandango Bible ni awara terê na ala ayeke tuku ngu na ndö ti ngongoa ti tâ tënë so a lu na yâ ti bê ti lo. Na sarango tongaso, azo kue so asara ngangu ti mû maboko na mbeni zo apeut ti duti na ngia na ngoi so lo wara batême.—Jean 4:35-38.

16. Ngbanga ti nyen la mo peut ti fa tënë na ngia atâa mo yeke na kpale ti seni wala mo yeke na ngangu tongana ti kozo ape?

¹⁶ Peut-être mo peut ti fa tënë nga ti fa ye tongana ti kozo ape ndali ti so mo yeke na kpale ti seni wala mo yeke na ngangu mingi ape. Mo peut ti ngbâ ti wara ngia na yâ ti kua ti kongo lê ti kobe. Bâ ye so asi na Gbia David nga na azo ti lo na ngoi so ala gue ti zi afami ti ala nga na aye ti ala na maboko ti azo ti gbungo ye ti azo na ngangu ti mara ti Amalec. Akoli ngbangbo use afatigué lani mingi na ala peut ti tiri ape, tongaso ala ngbâ ti ala ti bata akungba. Na peko ti so ala sö benda, David amû yanga ti atene a kangbi aye so a gbu na peko ti bira na azo ni kue alingbi terê. (1 Sam. 30:21-25) Kua ti sarango adisciple so e yeke sara na yâ ti dunia kue ayeke nga tongaso. Peut-être mo wara lege ape ti fa tënë nga ti fa ye mingi tongana ti so mo ye. Me tongana mo sara ye kue so mo peut ti sara, mo peut ti ngbâ ti duti na ngia mingi, lakue tongana mbeni zo ahinga Jéhovah nga awara batême.

17. Nyen la a lingbi e kiri singila na Jéhovah ndali ni?

¹⁷ E kiri singila na Jéhovah ndali ti nzoni bango ndo so lo yeke na ni na ndö ti kua so e yeke sara na lo. Lo hinga so e peut ti forcé azo ape ti mä e wala ti komanse ti voro lo. Me lo bâ tongana nyen la e yeke sara ngangu ti fa tënë nga tongana nyen la e ye lo mingi, na lo yeke futa e ndali ni. Lo fa nga na e tongana nyen ti duti na ngia ndali ti ye kue so e peut ti sara na yâ ti kua ti fango tënë (Jean 14:12). Tongana e découragé ape, e peut ti hinga na bê ti e biani so e yeke zia ngia na bê ti Jéhovah.